ХАКАС ГИМНАЗИЯ ӰГРЕНҶІЗӀНІҢ ЧИҢІЗІ
23.04.2019
Хабарлар
Ӱгретчі Людмила САГОЯКОВА ӱгренҷізі Данил АРТЁМОВНАҢ хада
Чидіг. Н.Ф.Катановтың адынаң хакас гимназияның ӱгренiҷізі Данил Артёмов тиксі Россиядағы ӱгренҷілернің паза студенттернің наука-істезігліг, проект паза чайаачы тоғыстары мариинда чиңісчі полыбысхан.
Пу наука-істезігліг, проект паза чайаачы тоғыстар марии «Обретённое поколение - наука, творчество, духовность» адалған. Ол Москва облазында «Непецино» тынағ туразында ирткен. Анда наука паза істезіг тоғыстарынаң айғасчатхан 14 - 25 частығ ӱгренҷілер паза студенттер араласханнар.
Таныхтирға кирек, марығның заочнай чардығына Россияның 66 субъектінең 702 араласчының проекті кірген. Очнай чардығына, тізең, 180 араласчы килген, ол санда пістің чир-суғҷыбыс Данил Артёмов.
9 класс ӱгренҷізі марығда «Ӱгренчеткен тіллернің хай пірее категорияларынҷа тиңнестірігліг ӱзӱріг» тоғызынаң араласхан.
Англия тілі ӱгретҷізі Людмила Гавриловна Сагоякованың устаанынаң Данил, хакас паза англия тіллерні фонетика, грамматика паза лексика саринаң тиңнестіріп, оларның тӧӧй паза пасхалалчатхан оңдайларын тапхан. Чиит істезігҷінiң кӧрізінең, тіллер тиңнестірии тілдегі алызығларны чахсы сизінерге паза тиксі тілдеңер пілістерні алғыдарға полысча. Мындағ тоғыс ӱгренҷілерге паза ӱгретчілерге туза полар. Істезігліг тоғызы ӱчӱн Данил пастағы степеньніг дипломнаң таныхтатхан.
Марығда араласхан тоғыстарны эксперттер чӧбі паалаан. Андар пӧзік ӱгредігліг учреждениелернің 100 азыра докторы паза наука кандидады кірген. Салтарында, марығда араласхан чииттернің тоғыстары хысхаҷахти книга-чыындыда сығарылған.
Ағаа хоза марығ тузында ӱгретчілерге наука паза методика семинарлары иртірілген. Ӱгретчілер форумында олар ӱгредіг системазының тилізін, наука паза ӱгредіг тоғыстарының салтарын ӱзӱргеннер, чииттернең опыттарынаң ӱлескеннер.
«Интеграция» Россия чииттерінің наука, чайаачы паза инновация тоғыстарының национальнай тиліс системазы» тиксі Россияның халых пірігізі национальнай гимназия директоры Марина Николаевна Сагатаеваа марығ араласчыларын тимнеен паза ысхан ӱчӱн алғызын читірген.
- Пістің марығларыбыс хазнаның пілістіг ис-пайын хайраллирында улуғ хозым итче, наа чайаачы тӧл ӧскірче. Ол - Россияның технология, экономика паза культура ӧзізінің таңдағызы, - таныхтапчалар тӧстегҷілер.
Автор :
Хакас национальнай гимназияның пресс-службазы
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде