ӰГРЕДІГ ПАЗА ІСТЕНІС ЧИДІГЕ АҒЫЛЧА
30.04.2019
Хабарлар
Акция. Ӱр ниместең пірге хазна сыныхтағлары иртіп пастирлар. Тиксі Россияда ағаа удур «Чиңіске 100 балл» акция иртірілче. Хакасияда ол чӧрім хоостыра Н.Ф.Катановтың адынаң Хакас национальнай гимназия-интернатта тоғазығ ирткен.
Пӱӱл «Чиңіске 100 балл» акция пизінҷі хати ирткен. Анда хазнаның 50 азыра регионы араласча, ол санда Хакасия. Республикада ол чӧрім ікінҷізін иртірілген.
Іди национальнай гимназия-интернатта улуғ класстар ӱгренҷілері аалҷыларнаң тоғасханнар: Хакасия Оӧркі Чӧбінің культураҷа, ӱгредігҷе паза наукаҷа комитет кнезі оксана Разварина, Хакасияның ӱгредіг паза наука министрі Лариса Гимазутина, аның орынҷызы Юрий Сагалаков, республикадағы журналисттер пірігізінің кнезі Ольга Ширковец, А.М.Топановтың адынаң Хакас национальнай драма театрының ӧӧн режиссёры Марас Чебодаев паза артизі Алиса Толмачёва, Ағбан пилтіріндегі школаның ӱгретчі-психологы Елена Савельева. Ідӧк олғаннарның ирткен чылларда ЕГЭ салтарларынҷа пӧзік балл алып алған чииттернең чоохтазып алар оңдай полған. Тоғазыға ХГУ паза ХТИ студенттері кил парғаннар.
Ӱгренҷілер аалҷыларзар сыныхтағ паза ӱгредіг хоостыра аймах сурығларнаң айланғаннар паза чӧптер сурғаннар. Іди Хакасия Оӧркі Чӧбінің культураҷа, ӱгредігҷе паза наукаҷа комитет кнезі Оксана Разваринаның таниинаң, маңнаныссар чол школадаң пасталча. Ол туста чииттер чуртаста кем полып тоғынардаңар сағынып пастапчалар. «Маңнанысха чидер ӱчӱн кӱннің сай тоғынарға кирек!» - теен Оксана Владимировна.
Хакасияның ӱгредіг паза наука министрі Лариса Гимазутина олғаннарға ЕГЭ-даң чочыбасха чӧп пирген. Аның кӧрізінең, пірге хазна сыныхтағлары оларға прай даа вузтарзар ізік асча. Че школа тоосчатханнар сыныхтағ салтарларынаң чӧпсінминчетселер, ӱгредіг министерствозында оларға орта чол таллап аларға полыс пирерге тимделер тіп таныхтаан ол.
- Хаҷан даа хығырарға кирек! Піс книгалардаң піліс алчабыс. Книгалар пісті сағынарға, ӱзӱрерге ӱгретчелер. Кӧп хығырчатхан кізінің хаҷан даа позының кӧрізі пар. Андағ тоғынҷылар хайда даа аарлалчалар, - ӱгренҷілерге чӧп пирген Хакасияның журналисттер пірігізінің кнезі Ольга Ширковец.
А.М.Топановтың адынаң Хакас национальнай драма театрының тоғынҷыларынаң олғаннар пілерге хынғаннар, хайди олар сценаа сығар алнында чӱрексініснең харбасчалар. Алиса Толмачёваның чооғынаң, сценазар сығар алнында ол ам даа сағыссырапча, прай ниме ундубысхан чіли пілдірче, че чон алнынзар сыхсох, чӱрексініс чох пол парча. Кізінің иді-сӧӧгі пір дее ниме ундубинча теен ол. Аннаңар ӱгренҷілерні сыныхтағлардаң чочыбасха хығырған.
Таныхтирға кирек, Хакасиядағы техническай институттың студенті Виктория Бурдуковская школа тоосчатханда орыс тілінҷе пірге хазна сыныхтаан 100 баллға толдырған. Ол сыныхтағларға кӱннің, че кӧмезердең тимнен турғанынаңар чоохтаан. Ідӧк олғаннар пілерге хынғаннар, ноға ол Хакасияда ӱгренерге халған. Викторияның чооғынаң, ол пір чылға чағын Хызылчарда ӱгренген, че чир-сууна сағынып, нандыра айлан килген. Іди полған на аалҷы ӱгренҷілерге туза чӧптер читірерге сіренген.
9-ҷы класстың ӱгренҷізі Яна Ачитаева ОГЭ сыныхтағларына тимненче. Чӱрексіпче, че анзында хомай ниме кӧрбинче. «Ӱгренҷілер ӧӧнінде хайдағ задание киліс парарын пілбинчеткеннеңер чочынчалар», - тіпче хызыҷах. Яна 11 класс тоозарға пӧгінче, аннаңар хайдағ специальностьча ӱгренерге парарын ам даа пӧкпинче. Че пілче, аның тоғызы чоннаң паза социальнай наукаларнаң палғалыстығ полар. Аннаңар пӱӱл ол обществознание паза англия тілі хоостыра сыныхтағ тударға чаратхан.
- Піссер улуғ чидіглерге читкен аалҷылар килгеннер, аннаңар пу тоғазығ піске туза полар тіп сағынчам, - таныхтаан 9-ҷы класстың ӱгренҷізі Наталья Чочиева. - Чӧптер профессия таллирға паза сыныхтағ алнында чӱрексінiсті амырадарға полызар тіп сағынчам.
Таныхтирға кирек, пу акцияның ӧӧн пӧгіні - школа тоосчатханнарның паза оларның іҷе-пабаларының чӱрексінізін амырадарға, орта тимнензе, полғанының на пӧзік балл тоғынып алар оңдайы парын кӧзіт пирерге.
Автор :
Екатерина ИНДЫГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы