ПАР АНДАҒ ТОҒЫС - ЧИР-СУУН АРАЧЫЛИРЫ
22.05.2019
Хабарлар
ПРИЗЫВНИКТЕРНІҢ ПАСТАҒЫ КОМАНДАЗЫ МОСКВАДА НАЦИОНАЛЬНАЙ ГВАРДИЯ ВОЙСКОЛАРЫНДА СЛУЖБА ИРТЕР, АРМИЯА 12 ООЛ ПАРЫБЫСХАН. ОЛАРНЫ ӰДЕЗЕРГЕ ТУҒАН-ЧАҒЫННАРЫ КИЛГЕННЕР.
ПАЙРАМНЫҒ МЕРОПРИЯТИЕ ПАСТАЛҒАНДА, ПРИЗЫВНИКТЕРНІҢ СТРОЙЫ АЛНЫНЗАР ЧИҢІС ЗНАМЯЗЫНЫҢ ХОБЫРҒАНЫ СЫҒАРЫЛҒАН. ЧИИТ ООЛЛАРНЫ ХАКАСИЯ ПАЗЫНЫҢ ОРЫНҶЫЗЫ ЮРИЙ КУРЛАЕВ АЛҒЫСТААН.
- Аарлығ призывниктер, Хакасия пазының адынаң сірерні хығыртығ кӱнінең алғыстапчабын. Сірер пастағы ӱдезігде армияа парчатханнарың, уғаа поғдархастығ. Пістің оолларыбыс полған на регионда Хакасияның адын пӧзік ал чӧрчелер. Таңда сірер улуғ чуртассар хаалағ идерзер, паба-іӌеңер хости полбас. Полған на чарадығны постарың аларзар паза аның ӱчӱн нандырарзар. «Пар андағ тоғыс - чир-суун арачыли-ры» сӧстер полған на чааӌының сағызында ползын.
- Сірернің службаңар уғаа тузалығ полча. Аны турыстыра иртіп, ибзер хазых айланыңар, - чооғында таныхтаан Юрий Николаевич.
Ідӧк чииттерзер республиканың чааҷылар комиссары Виктор Максимчук айланған.
- Войсколарзар читсе, сірер Тирігліг кӱстернің чардығы поларзар. Чааҷы службазы оой нимес. Полған на сидіксіністі тобырарға тимде поларға кирексер. Командирлернің чооғын хаҷан даа толдырыңар. Срочнай служба соонда сірернің піреезі контракт службазын даа таллап алар. Службаңар чахсы иртсін, - алғаан Виктор Максимчук.
Ӱр ниместе піс Илбек Чиңістің 74 чылын таныхтаабыс. Ол чаада матырлар постарының махачы хылиин кӧзіткеннер. Анзын киречілепче оларның сыйыхтары. Че пірее туста сыйыхтар матырларын таппин халҷаңнар. 15 октябрьда 1944 чылда кічіг сержант Алексей Алексеенко танктағы пулеметнаң ыырҷының онҷа чааҷызын паза офицерін чох иткен. Че снаряд чачыразына пулемеды тоғынмин сыххан. Іди дее полза, палығлатхан Алексей Алексеенко, орнын тастабин, ыырҷыны автоматтаң ат сыххан. Махачы тудынған ӱчӱн ол Хызыл Чылтыс орденіне турысхан. Че сыйых ағаа читпеен. 75 чыл пазынаң ол сыйыхтың удостоверениезі Алексей Алексеенконың харындазы Анатолий Александровичке читірілген. Анатолий Алексеенко ідӧк призывниктерні алғыстаан, оларға службаны чахсы иртібізерге, ағаларына турыстыра поларға алғаан. Удезігде мындағ чапсых кирек полғаны чииттернің кӧңнін уламох кӧдірген полар.
Алғыстас сӧстері соонда юнармия чӧрімнің араласчылары призывниктерге памяткалар читіргеннер. Пайрамнығ мероприятиетоозылғанда, оолларға туған-чағыннарынаң анымҷохтазып аларға тус пирілген.
Илья Чаптыков Асхыс аймаанаң хығыртылған. Пу чағында ол 18 чазын таныхтады. Школа соонаң, ирткен кӱскӱзін, ол чааҷылар институдынзар кірерге пӧгінген, че хазии киліспин парған. Чарым чылға хазиин пиктеп алып, амды ол нацгвардия войсколарынзар хығыртылған. Армия соонаң ол арачылағҷаа ӱгренерге пӧгін тутча. Чааҷы службазы ағаа МЧС-сар кіріп аларға оңдай пиреріне ізенче.
Іҷезі Маргарита Васильевна оолғы армияа парчатханына чӱрексіпче.
- Мин ікінҷі оолғымны армияа ӱдесчебін. Улуғ оолғым Николай Ағбандағы тимір чол бригадазында служба ирткен. Че Илья пастап ӱгреніп алзын тіп сағынғам, - чоохтапча Маргарита Васильевна.
Олох кӱн иирде призывниктернің пастағы командазы поездтіг Москвазар чол тутхан.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде