ПАЗОХ КИЛЕРЛЕРӀНЕ ӀЗЕНЧЕБӀС
05.06.2019
Хабарлар
Культура. Ирткен неделяда М.Ю.Лермонтовтың адынаң орыс драма театрынзар Курган городтың драма театрының артисттері ааллап килгеннер
ПАЗОХ КИЛЕРЛЕРІНЕ ІЗЕНЧЕБІС
Таныхтирға кирек, халғанҷы чылларда театрлар аразында мындағ чорыхтар кибірге кірібісті. Аймах театрларға, хазнабыстың регионнарынҷа чӧріп, опытнаң ӱлезерге «Улуғ чорыхтар. Регионнар аразындағы программа» проект хабасча. Олох проектче Кургандағы театрның артисттері піссер килгеннер.
Чоохтирға кирек, полған на театрның пос оңдайы пар. Аннаң олар пасхалалчалар. Кургандағы хазна театрының артисттері, Ағбанзар киліп, орындағы театрларнаң, кӧрігҷілернең танызып, чалахай кӧңнілерінең хабарҷыларнаң ӱлескеннер. Россияның саблығ артизі Сергей Радьков 30 чыл азыра, сценазар сығып, Кургандағы чуртағҷыларға ӧрініс сыйлапча.
- Піс «Улуғ чорыхтар. Регионнар аразындағы программа» проектче ӱзінҷі хати чорыхха сыххабыс Пістің артисттерібіс ағбандағыларға тӧрт ойын кӧзіткеннер, олғаннарға - «Елена Премудрая» ойынны. Палаҷахтар хаҷан даа аны хынып кӧрчелер. Артисттернiң ойыны олғаннарның кӧңніне кірген, анзы мині ӧріндірче. Улуғ частығ кӧрігӌілерге піс «Здравствуйте, я ваша тетя!», «Моя жена - лгунья», «Морфий» ойыннарны турғысхабыс. Чоохтирға кирек, «Морфий» Михаил Булгаковтың произведениезі хоостыра турғызылған ойын Москвадағы критиктернің кӧңніне уғаа кірген. Ирткен чылда пістің спектакльыбысты «Алтын масканың» эксперттері пӧзік паалааннар. Аннаңар ол хазнабыстын иң чахсы ойыннары санында пол парған Ойын Ағбан чуртағҷыларының кӧңнін кӧдірген паза наа сағыстар тӧріткен тіп ізенчем, - чоохтаан Сергей Радьков.
Кургандағы артисттернің ойыннарын чуртағҷылар ӱс кӱн аразына кӧріп алғаннар. Кӧрігҷілер артисттерге алғыс сӧстерін читіргеннер. Паза ойын соонда сағыстарынаң Орыс драма театры артисттерінең ӱлескеннер.
Артисттернің гастрольлары тоозылғанда, пістің кӧрігҷілерібіс килер чылда піссер пазох пірее театр ааллап килеріне ізенчелер.
Автор :
Ольга ТОМОЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы