ЧИИТТЕРНІҢ ТУЗАЛЫҒ ЧАЙҒЫЗЫ
24.07.2019
Хабарлар
Форум. «Хара суғ» хакас ибіҷектер комплексінде «Этнова-2019. Чылығ Сибирь» чииттернің этно-туризм форумы тоғызын 9-ҷы хати пастапча. Пӱӱл ол 22 июльдаң 29 июльға теере ікі сменаа чарылып иртче
«Этнова. Чылығ Сибирь» чоннар аразындағы чииттер форумы 2011 чылдаң сығара иртірілче. Ол чыл сай республикача кӧс чӧрче. Кӧзідімге, ирткен чылда Таштып аймаандағы «Сюгеш» саналығ чылчаң комплексте полған. Пӱӱл, тізең, форум Боград аймаанда «Туманный» санаторий хыринда орныхчатхан «Хара суғ» комплексте иртер. Іди форум араласчылары чыл сай Хакасияның аймах-пасха хайхастығ пулуңнарынаң танысчалар.
Пӱӱл «Этнова», ирткен чылдағызы чіли, ікі сменаа чарылча. Пастағызы, студенттерні чыып, 22 - 25 июльда иртер. Ікінҷі сменазы тоғынчатхан чииттерге чарыдылар. Аның тузы 26 - 29 июльға кӧріл парған.
Ирткен кӱннерде «Этнова» форумның пастағы сменазы пайрамни азылған. Анда республиканың ӧткін чииттері араласханнар. Оларны алғыстирға килген Хакасияның ӱгредіг паза наука министерствозының чииттер киреенче пӧлік устағчызы Татьяна Карташова. Олох кӱнде оол-хыстар удур-тӧдір танысханнар, кибірли От инені азырааннар паза национальнай ойыннар ойнааннар.
Форумның ӧӧн пӧгіннері - ӧсчеткен тӧлні чииттер политиказы, бизнес, туризм тилізіне тартары, нация-лар аразындағы ынағласха хайығ салары паза істеніс рыногында поста-рын артых саринаң кӧзідер оңдайла-рын кӧдірері.
Форум араласчылары ӱс кӱн аразына кӧп чапсых пілістер алып алар оңдайлығлар. «Этновада» аймах-пасха площадкалар тоғынча нооза. Чыл сай оларның саны паза темалары алызып одырча. Чииттернің иң хынчатхан площадкаларының пірсі - ол проекттер тимниріне чарыдылған площадка. Мында оол-хыстар сағынған сағыстарын проект хоостыра чуртасха кирерінҷе, хайди аны орта чонға кӧзіт пирерінҷе пілістер алчалар, хайди чахсы ӧме тӧстеп аларға паза хайди чӱрексініс чох чон алнында чоох тударға ӱгренчелер. Ағаа хоза, чииттерге ӱгредіг, культура, туризм программалары тимнел парған.
Форумда ідӧк республиканың иң чахсы эксперттері паза Россиядағы саблығ тренерлер араласчалар. Олар чииттерге чапсых пілістер пирерге хаҷан даа тимделер.
Автор :
Тимнеен Екатерина ИНДЫГАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде