ХАБАРҶЫЛАРНЫҢ - НАА КИБІР
24.07.2019
Хабарлар
Пайрам. От айының 21-ҷі кӱнінде Алтай аймааның «Сельская правда» газетазы 75 чылын таныхтады. Пайрамға удур редакция тоғынӌылары газета сығарызынаң 31 чыл устаан Владимир Груздевке хумартхы чарды асханнар
От айының 19-ҷы кӱнінде айас полған. «Сельская правда» газетаның туразы тастында аймах чон чыылысхан: ветераннар паза хығырығӌылар, Алтай аймааның устағ-пастаа, республиканың паза город-аймахтар газеталарының ӧӧн редакторлары паза хабарҷылары. Оларны удурлааннар редакцияның чиит тоғынҷылары ӧӧн редактор Галина Кузьминаның устаанынаң. Тура тӧрінде сцена идерге чарадылған. Чиит ведущайлар пайрамнығ мероприятиені газетаның тархынынаң пастааннар.
1944 чылда от айының 21-ҷ кӱнінде «Большевик Алтая» газетаның пастағы сығарызы ах чарыхха сыххан. 75 чыл изере газета Алтай аймааның чуртазын чарытча, аның тилізін паза сидік сурығларын кӧзітче, чуртағҷыларынаңар - аймахтың ӧӧн кӱзінеңер - пасча.
Газета пу чылларға ӱс хати адын алыстырған. Ол «Коммунист Алтая», «Знамя Коммунизма» паза «Сельская правда» ат ал чӧрген, халғанҷы ады, минің кӧрізімнең, аймах чуртағҷыларына иң не чағын.
Ӧӧн редактор полғаннарның санында Пётр Щербинин, Нина Новичихина, Елена Груздева, Владимир Груздев, Светлана Трофимова, Виктор Аткнин, Ирина Чичинина паза пасхазы. Че иң не кӧп, 31 чыл, пу тоғыста істен салған Владимир Груздев.
1963 чылдаң пасти 1994 чылға теере ол газетаның ӧӧн кӧрізін тӧстеен тиирге чарир. Аның хумартхызына чарыдып, амғы тоғынҷылар ӧмезі редакцияның туразында хумартхы чарды ілерге чаратхан. Танығлығ кирекке Владимир Михайловичтің ікі хызы хығыртылған. Олар паза «Сельская правда» газетаның ӧӧн редакторы Галина Кузьмина хумартхы чардыны асханнар. Чоохтирға кирек, пӱӱнгі кӱнде ол тиксі республикада хабарҷаа чарыдылған пастағы хумартхы чарды полча. Андағ оңдайнаң «Сельская правда» газетаның ӧмезі хабарҷылар чуртазына наа кибір кирібісті.
Мыннаң газетаның 75 чылына чарыдылған пайрамнығ мероприятие тоозылбаан. Чыылған аалҷыларға редакцияның полисаднигінде хазың паза харағай хорбыларын одыртарға оңдай пирілген. Редакциядағылар аалҷыларға ла нимес, че ідӧк хығырығҷыларға чахсы сыйыхтар тимнеп салтырлар. Олар алынҷа таныхталғаннар. Хығырығҷылар аразында хайраллалған иң иргі газетаа марығ чарлалған. Андағ пір ле хығырығҷы табылбаан. Прайзына сыйыхха чірчелер читірілген.
Піс, тізең, «Хабар» газетаның ӧмезі, ідӧк «туңма» ӧмені, «Сельская правда» пістің газетабыстаң кічіг нооза, пайрамынаң алғыстапчабыс паза хығырығҷылар саны ӱзілбезін тіп алғапчабыс.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде