ХАБАРҶЫЛАРНЫҢ СУРЫҒЛАРЫНА НАНДЫРҒАН
26.07.2019
Хабарлар
Тоғазығ. Хакасияның пазы «Хакасия» газета тоғынӌыларынаң тоғасхан
Хабарӌылар пирген сурығларның пастағызы региондағы пӱӱнгі сидіксіністерге теелген. Валентин Коновалов республикада сидіксіністер сынап кӧп, че оларӌа улуғ тоғыс апарылча тіп чарытхан.
- Хорадығларны хызырарынӌа, парыстар алӌаң наа оңдайлар тілирінӌе, экономикабысты, алғыдып, алыстырарынӌа. Піс тоғынчабыс паза чыл тоозыларына экономика тилізі стратегиязынаң таныстырарға пӧгінчебіс. Піс Россияның пӱдіріг паза чурт-коммунальнай хоных министерствозынаң, ЖКХ реформазына хабасчаң чыындынаң регионзар, кӧзідімге, Харатас городсар, федеральнай ахча кирерінӌе ӧткін тоғынчабыс. Экология суриин алынӌа таныхтирға кирек, ол пӱӱнгі кӱнде республикаа уғаа ағырсымнығ, - чоохтаан Хакасияның пазы.
Ідӧк Валентин Коновалов Харатастың коммунальнай сферазынаңар паза харатасчылар городын тилітчең оңдайлардаңар чоохтап пирген: Харатастың, сынап, сидіксіністер кӧп, коммунальнай сфера хайығ чох полған. Че піс прайзыбыс оңарчабыс, ол тыхтағны чайғы туста толдыразынаң паза чахсы толдырыбызарға кирек. Іди полбаза, ол саайға ағылар. Харатастың тилізінеңер чоохтаза, кічіг паза ортын бизнеске, социальнай идінӌектерге хабасчаң пістің нинӌе-де программа пар. Сидіксініс пір кӱнге алай пір чылға ла пӧгіл парбас, мында системалығ тоғыс паза стратегия кирек.
Чолларның пірсі - агропромышленность комплексін тилідері. Хакасияның пазы ӱр ниместе республикада хой паза ӧскі ӧскірерінӌе регионнар аразындағы конференция ирткенін таныхтаан:
- Конференция араласчылары Россияның аймах субъекттерінең килгеннер. Олар республиканың аал хониин тилітчең чахсы оңдайлар парына хайхааннар. Піс ол кӧстегӌе тоғынарбыс.
Анаң мал тутчатхан ӱчӱн тӧлеглердеңер сурығ пирілген:
- Таныхтирбын, ол тӧлеглерні пірдеезі чох итпеен. Республиканың финанстар министерствозы ол кӧстегҷе ахча позытхан. Пір ле ниме - иділген чарадығзар алызығлар кирілген. Ол аал хонии министерствозының чӧбі хоостыра иділген. Программаның ӧӧн кӧстее чідірілгені ілезіне сығысхан. Ол аалда мал тутчатханнарға хабазарына кӧстелген полған, че салтарында улуғ хоныхтарға полысчаң пол чӧрібіскен. Бюджет ахчазы пасха кӧстеглерге хорадылған пол парча, пасха саринаң - олох кресен-фермер хоныхтары саны хызырыл сыххан. Мал саны кӧп полза, ол пос хонии нимес, ол - бизнес. Тӧлелӌең маллар санын хызырғаны программаа аның пастағы пӧгінін айландырары полча.
Анаң Валентин Коновалов «Кимдегі Сибирь» комплекстіг инвестиция проектінеңер чоохтап пирген:
- Хакасия, Тува республикалар паза Хызылчар крайы удур-тӧдір пик палғалыс парғаннар. Проект иң не пурун анзын тыыдарына, чарыда чоохтаза, автомобиль чолларынӌа, тимір чолларӌа логистиканы тилідеріне кӧстегліг. Проект регионнарның пірге тоғынарын тыыдар. Пістің пар стратегия проекттері, хайзылары регионның экономиказына уғаа киректер.
Тоғазығ тоозылчатханда, орындағы архитектурада, ол санда республиканың ӧӧн городында, национальнай культураа хайығ салардаңар чоох парған:
- Республиканың пасхалӌаң сариларына кӧп арах хайығ саларға кирек. Пу сурығ аймах сарилығ, мында туризм отрасльының тилізі паза туристтер санын хозары пірік парған. Пӧгінніг хайығ салғаны паза система кирек. Хакасияның кӧп орын, хайзы аймах-пасха саринаң посха хайығ тартча. Тынағ сферазы тиліпче, тархыннығ орыннар уғаа кӧп. Пістің республиканы улам хайығлығ идеріне специалисттернің улуғ тоғызы киректелче. Ол Хакасия экономиказын тилітчең оңдайларның пірсі.
Автор :
Хакасия пазының администрациязы
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде