ЧИИТ ТӦЛГЕ КӦЗІДІМ ПОЛЧАЛАР
30.07.2019
Хабарлар
Чаа-талай флодының кӱні. Ағбанда Чиңіс паркындағы Успас от хыринда Россияның Чаа-талай флоды кӱніне чарыдылған пайрамнығ мероприятиелер ирткен
Россияның Чаа-талай флоды кӱніне чарыдылған мероприятие тузында
Чыл сай июль айның халғанҷы тынағ кӱнінде пістің хазнада Чаа-талай флодының кӱні таныхталча. Пӱӱл ідӧк Ағбанда 28 июльда Чиңіс паркындағы Успас от хыринзар иртеннең бескозыркалығ, тельняшкалығ кізілер чыылыс сыхханнар. Кӧбізінің холларында Чаа-талай флодының паза Андреевскай флагтар полған. Флотта служба ирткен талайҷы-ветераннарнаң хада оларның сӧбірелері, палалары даа килгеннер. Кибірге кір парған оңдайнаң талайҷылар Успас от алнында стройға турыбысханнар. Площадьта флоттағы службаа чарыдылған кӧглер истілчеткен.
Пайрамнығ мероприятие иртірерінде араласханнар Хакасияның чааҷылар комиссары полковник Виктор Максимчук, аның ветераннарнаң тоғыс апарарынҷа улуғ полысчызы подполковник Олег Пагельс, республиканың Ветераннар чӧбінің кнес орынҷызы, Халыхтар палатазының араласчызы Юрий Седых, Чаа-талай флодында кӧп чыл служба ирткен ветеран, 2-ӌі рангтың капитаны Геннадий Козюков паза даа пасхазы.
Олег Пагельстің «Турыңар! Тиңнезіңер!» командазы соонда пайрамнығ митинг пасталған. Талайҷы-ветераннарны ӱлӱкӱннең алғыстирға Геннадий Козюков сыххан. Аның чаа кип-азааның хурында талайҷы-офицерлерге пирілчеткен кортик (кинжал-пычах) ілінген. Геннадий Григорьевич, чыылысхан чонны ӱлӱкӱннең алғыстап, Россияның чаа флодынын тархынынаңар чоох апарған. Аның чооғынаң, амды Россияның Чаа-талай флоды тӧстелгенін I Пётрнаң на палғалыстырчалар. Че аның алнындағы тустарда Игорь паза Олег князьтарның улуғ кимелері, Византиязар походнаң чӧріп, ыырҷыларны чиңіп алҷаңнар. Аннаңар Россияның Чаа-талай флоды тӧстелгенін ол тустарнаң палғалыстырарға кирек.
Хайди Виктор Максимчук чооғында таныхтаан, Россияның Чаа-талай флодында чааҷы службазын апарарға Хакасиядаң чыл сай 50-ҷе чиит оол ызылча.
- Пу пайрамнығ мероприятиеде улуғлан парған кізілер, ортын частығлар, службадаң ӱр ниместе айланған чииттер дее араласчалар. Анзы тӧллернің чахсы палғалызын таныхтапча. Сірер олғаннарға, чииттерге чахсы кӧзідім полчазар. Сірерзер кӧріп, олар чааӌы полыбызарға кӱстенерлер, патриотизмге кӧнігіп, Чир-суубысты арачылирға чааӌы службазын таллап аларлар, постарының чуртазын чааӌы службазынаң палғалыстырарлар, - теен чааҷылар комиссары.
Митингте ідӧк Юрий Седых, чоох тудып, талайҷы-ветераннарны ӱлӱкӱннең алғыстаан. Прайзына ол пик хазых, чахсы чуртас, таңдағы кӱнге киртініс алғаан. Полған на алғыстас соонда ветераннар, чааҷы службазындағы чіли, ӱс хати «Ура!» хысхырыснаң нандырғаннар. Митинг пасталар алнында Россияның паза Хакасияның гимннері толдырылған.
Олег Пагельс чыылысхан чон алнында Хакасияның чааҷылар комиссарының запастағы талайҷыларға теестегі званиелер пирілчеткеннеңер приказын хығыр пирген, оларның аразында хакас фамилиялар илееде истілген.
Амды піснең хада чоғылларны сағысха киріп, пір минута сым турары чарлалған соонда, Успас от хыринзар веноктар паза чахайахтар салылған. Анаң талайңы-ветераннар площадьча Чааҷылар сабланызы хумартхы тас ибіре, Успас от хыринҷа стройнаң хаалааннар. Мыннаң мероприятие тоозылған.
Мин анда тельняшка кискен орыс фамилиялығ хакас омалығ иреннең ӱр нимес чоох алысхам. Ол Игорь Михайлович Берсенёв полған, ағаа 42 час, Ағбан пилтіріндегі Весенний аалдаң. Чыл сай мындағ мероприятиеде араласча. 1994 -1996 чылларда Алтынзархы флотта служба ирткен. Аның чооғынаң, ол суғ алтынҷа чӱсчең кимелердең тоғыр кӱресчең кічіг корабльда мотористтер пӧлиинің командирі полған. Корабльлар Кольскай чарым олтырыхтағы Снежнегорск город хыринда турҷаңнар.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде