ЧАПСЫХ ПАЗА ТУЗАЛЫҒ СМЕНА
25.09.2019
Хабарлар
Ӱгредіг. Республикадағы чайаачы олғаннарның «Альтаир» кіні пу ӱгредіг чылындағы тоғызын пастабысты
Ағбанда 16 сентябрьдаң 5 октябрьға теере иртчеткен сменаның кӧстее - технология кирее. Анда тиксі Хакасиядан таллағ иртібіскен 30 олған араласча. Ол 7 - 10 класстар ӱгренҷілері - аймах олимпиадалар, марығлар, наука-практикалығ конференциялар чиңісчілері. Чайаачы оолах-хызыҷахтарнаң Хакас хазна университедінің, Сибирьдегі федеральнай университеттің Хакасиядағы пӧлиинің, региондағы ӱгредіг киреен тилітчең институттың ӱгретчілері тоғынчалар.
Паза Н.Ф.Катановтың адынаң национальнай гимназияда орныхчатхан «Альтаир» республиканың хоза ӱгредіг кінінең хада пик палғалыстығ. Іди ӱр ниместе олғаннар андағы «Кванториумда» пол килгеннер.
Пу технопарк Хакасияда 2015 чылдаң тоғынча. Анда олғаннарға наука-істезігліг паза инженерно-техническай тоғыстарнаң айғазар оңдай пирілче. Олар пис кӧстегҷе - квантумнарҷа - ӱгренчелер: Аэроквантум, Робоквантум, Геоквантум, Биоквантум,
ІТ-квантум паза Хайтек-цех. Тиксі 15 ӱгредіг программазы кӧріл парған. Оларның санынзар ідӧк математика, шахмат, промдизайн, промышленность робототехниказы кірчелер.
Мындағ оңдайнаң чайаачы оолах-хызыҷахтар, инженер ӱгредиинең танызарынаң пасха, аймах проекттер тимнирге кӧнікчелер. Ол пӧгіннерге «Кванториумда» пӧзік технологиялар прай пар. Технопарксар чӧрчеткен 12 - 18 частығ палаларға занятиелер тикке иртірілче. Андар, ағбандағылардаң пасха, республиканың пасха город-аалларындағы ӱгренҷілерге дее чӧрерге чарир.
Аның пу ӱгредіг чылындағы мындағ тоғызы 16 сентябрьдаң пасталған. «Альтаир» кіннің стажерлары «Хокотонда» араласханнар.
Хайди чарытхан технопарктың устағҷызы Александр Пахно, «Хокотон» - ол «Кванториум» технопарк ӱгретчілерінің проекті. Орта чоохтаза, олғаннар аразында иртірҷең марығ. Ол палаларның сағызын чахсы алғытча. Аны хоостыра олар «Голдберг машиназын» пӱдірчелер. «Домино» ойын оңдайынҷа. Анда нименең дее тузаланарға чарир. Ӧӧн пӧгін - чыып саларға сидік конструктор, хайзынҷа кічіг синніг шарик оой ла ӧӧр кӧдіріл парар. Олғаннар аның чӧріс механизмін постары сағын табарға кирек.
«Альтаир» кіннің араласчылары іди алты командаа чарылып марығласханнар. Оларға пу тоғысха ӱс час пирілген. Салтарында, пастағы орынны «Кот и его команда» холға кирген. 2-ӌі орынға «Шарифзян» сыххан, 3-зі «Домино» полыбысхан, халғанҷы ӱс орынны «Овощебанда», «Альта Квантум» паза «Альтаир» ӱлезіп алғаннар.
Мындағ чапсых ӱгредіглердең пасха, «Альтаирнің» араласчылары аймах экскурсияларға чӧрчелер, мастер-класстарда араласчалар. Оларға ідӧк пос туста ученай-писательлернең тоғазығлар иртірілче. Смена тоозыл парза, олғаннарға республиканың чайаачы олғаннар кінінде полғаннаңар сертификаттар пирілер.
Таныхтирға кирек, Хакасия - Россияның пастағы регионы, хайда, «Сириус» федеральнай кіннең хада-пірге тоғынардаңар чӧптезіг хоостыра, мындағ кін азарға чарадығ алылған. Ол амды ӱс кӧстегҷе ӱгредіглер апарча: наука, спорт паза искусство.
Автор :
Александра КАРАМЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы