ӦӦНӀ - ЧОН КИРТІНІЗІНЕ ТУРЫЗАРЫ
12.11.2019
Хабарлар
Конференция тузында
Конференция. «Единая Россия» партияның Хакасиядағы пӧлиинің 27-ҷі чыылии ирткен.
Анда тиксі пис сурығ ӱзӱрілген. Иң пурнада сӧс пирілген «Единая Россия» партияның Хакасиядағы пӧлиинің хачызы Сергей Можаровха. Ол 2019 чылдағы тоғыстың сан пирізін иткен. Аның чооғы пылтыр ирткен Хакасия пазына паза Ӧӧркі Чӧпсер табығлардаңар пасталған. Хайди прайзы пілче, андада республика устағҷызына КПРФ-тың кізізі табылған, «Единая Россияның» парламенттегі депутаттар саны, тізең, 27-дең 17-тее тӱс парған. «Аннаңар піске табығҷыларның киртінізін нандыра айландырар тоғысты алғым апарарға киректелген. Аның салтары пӱӱлгі хати табығларда кӧрін парған. Іди пістің партияның ӱс кізізі Хакасияның Ӧӧркі Чӧбінің депутады полыбысхан. Амды пістің фракциядаң парламентте 21 кізі. Пӱӱл муниципальнай пӱдістер пастарына табығларда пістің ідӧк ӱс кізі чиңіс тутхан. Килер чылда полар табығларға піске прайзына уламох чахсы тоғынарға кирек», - теен Сергей Можаров.
«Единая Россия» партияның уставы хоостыра политсовет араласчыларының саны чыл сай 10 %-ке наачылаларға кирек. Хакасиядағы пӧлікте ол сан пис кізее тиңнелче. Пу чылдағы чыылығда іди политсоветтең Ағбанның мэрі полған Николай Булакинні, Абазаның устағҷызы Валентина Филимонованы, Шира аймааның пазы Сергей Зайцевті, Саяногорскнаң устаан Леонид Быковты, Орджоникидзе аймааның пазы полған Алексей Попковты сығарыбысханнар. Оларның орнына партияның Таштып аймаандағы пӧлиинің араласчызы Александр Исаков, Пии аймаандағы пӧліктің хачызы Юрий Кощеев, Ағбандағы пӧліктің хачызы Татьяна Макарова, Абазадағы хачы Сергей Чубуков паза Ағбандағы Виктор Шигорев табылғаннар.
Пуох чыылығда «ЕР» партияның президиум араласчылары санынаң Николай Булакинні сығарыбысханнар. Аның орнына Альберт Тупикинні тапханнар. Юрий Шпигальских амды Сергей Комаровтың орнына полар. Сергей Владимирович президиумнаң сығыбызарға чараттыр. Ол Минсуғ город пазының орынчызы полча.
Пӱӱнгі кӱнге «ЕР» партияның региондағы пӧлиинің политсоведінде прай 48 кізі, президиумда - 15.
Конференцияда ідӧк «Единая Россияның» Москвада иртер 19-ҷы съездінде аралазар делегаттарны тапханнар. Кирексіністер хоостыра табылчатхан делегаттарның кӧріндіре чидіглері поларға кирек. Абрек Челтыгмашев Асхыс аймаа пазының табығларында чиңіс тутхан. Ағбандағы пӧліктің хачызы Татьяна Макарова федеральнай синдегі проекттер мариинда утхан, Абазадағы Лариса Пелагеина ідӧк табығларда чахсы салтарлар кӧзіткен. Аннаңар чыылысхан 156 кізінің кӧбізі пу ӱзӧлеңе ӱнін пирген. Амды олар Москвада ӱлгӱ партиязының улуғ чыылиинда аралазарлар.
Автор :
Александра КАРАМЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде