ЧИИТ ЫРҶЫЛАРНЫ САБҒА СЫҒАРАРҒА
12.11.2019
Хабарлар
От ыры-2019. Пӱӱл «От ыры» эстрада ырҷылары аразындағы марығ 18-ӌі хати иртті. Анда наа паза чиит чылтыстар, табылып, адалғаннар
Пу марығның ӱзінҷі чардығында кӧрігҷі алнынзар иң кӱстіг ырҷылар сыхханнар. Салтарлар 8 ноябрьда ирткен Гала-концертте иділген. Таныхтирға кирек, ойынны кӧрерге кӧп чон чыылған. Кізілер Хакасияның прай даа аймахтарынаң килглептірлер.
Сценазар марығның улуғ частығ араласчылары ирткенннер. Олар чонны айраннаң паза ирбеннең аластааннар. Хакасияның чон артизі Людмила Арыштаева, ырҷыларның чолын азып, композитор Георгий Челбораковтың сарынын толдырған. Хакасияның чон артизі Герман Танбаев чон алнынзар «наа ырҷыларны сабға сығарарға» хыйғынаң сыххан. Амғы чарғыҷылар санында Хакасияның чон артизі Мария Янгулова, Хакасия культуразының саблығ тоғынҷызы Юрий Киштеев, композитор Сергей Толмашов паза жюри кнезі Россияның саблығ артизі Екатерина Кыштымова полғаннар.
Хакасияның культура министрі Леонид Ерёмин «От ыры» мероприятиені тӧстеен паза апарчатхан кізілерге алғызын читірген.
«От ыры» марығның ікінҷі чардығында араласчылар хакас ырларын толдырғаннар. Анда 28 ырҷы араласхан. Ам ирткен Гала-концертке жюри таллап алғаннары сыхханнар. Олар тилекейдегі саблығ сарыннарны толдырғаннар. «Алауда» ӧменің чииттері сценаа «Бон Джови» толдырчатхан «Its ту Ііfe» сарыннаң сыхханнар. Пу чиит ӧме ӱр ниместе тӧстелген. Анда гитараларнаң, барабаннаң ойнапчатхан ооллар паза ікі ырҷы хыс араласча.
Виктория Димчикова «Стена» сарынны ырлаан. Виктория хаҷан-да, Хара талай хазында ырҷылар аразында чиңіс тудып, Гран-при сыйыхха турысхан. Ол «От ыры» марығда сыбыра аралазадыр. Анжелика Ооржак Н.Ф.Катановтын адынаң Хакас хазна университедінің студенті полча. Анжелика Шакираның сарынын ниик кӧдірілісте толдыр пирген.
Кӱстіг ӱнніг ооллар Муслим Магомаевтің ырларын таллап алтырлар. Александр Саражаков «Мелодия» ырны сарнаан. Айат Канысов «Лучший город земли» паза Алексей Казыгашев «Синяя вечность» сарыннарны уғаа чахсы толдырғаннар.
Чииттернің соонаң сценазар «Бурановтағы ууҷалар» сыхханнар. Шира аймаанаң «Хызыл чул» паза «Таныҷах» ӧмелерзер улуғ частығлар чӧрчелер. «От ырында» олар «Червона рута», «Лада» саблығ ырларны сарнааннар. «Хызыл чул» ӧме пӱӱл чайғызын тӧстелтір. Аннаң пеер чайаачы кӧңніліг ууҷалар аймах мероприятиелерде араласчалар, чорыхтарға сыхчалар. Олар «От ыры» марыға туртухпин килгеннер. Пётр Шадрин Григорий Лепстің «Купола» сарынын толдыр пирген. Хырлап ырлапчатхан ирен сарыннарны ниик читірче. Тиктең нимес кӧрігчілер аның ӱчӱн ӱннерін пиргеннер. Пётр Шадрин «Кӧрігчі кӧңніне кірген ырҷы» сыйыхты алған.
Татьяна Балахчина, Дарья Тачеева джаз кӧглерін ырлааннар. Таныхтирға кирек, олар пу кӧстегҷе сарыннарны пӧзік синде толдырчалар. Руслан Баинов Дмитрий Хворостовский сарнаан «Ностальгия» ырны читірген. Прай пу сарыннар кӧрігҷее таныстар, чон оларны хынып искен. Полған на ыр соонаң хазыр айа сабызы паза ӧӧктестер, хысхырыстар пол турғаннар.
Концерттің пастағы чардығы соонаң жюри кемге хайдағ сыйых пирердеңер чӧптезерге парыбысхан. Ол туста чыылған чонны «Улгер» фольклор ӧмезі, Герман Танбаев, Дмитрий Сафьянов, Наталья Албычакова, Фаина Чебодаева, Клавдия Чебодаева, Сергей Толмашов паза Николай Разумов кӧглернең ӱтерткеннер. Мының алнында олар «От ыры», «Хысхы саңнары» марығларда араласханнар.
Иирнің соонзар чиңісчілер адалғаннар, сыйыхтар читірілгеннер. Прайзына араласхан ӱчӱн дипломнар пирілген. Ідӧк араласчыларны алынча сыйыхтарнаң таныхтааннар. «Чон кибірлерін хайраллапчатхан ӱчӱн» сыйыхты Шира аймаандағы «Танычах» ӧме алған. «Ізеніс» ат Александр Саражаковха пирілген. «Наа ӧме» сыйыхты «Алауда» ансамбль холға кирген. Улуғларның аразында III орын «Хызыл чул» ӧмее паза II орын Альбина Алахтаеваа пирілген. Чииттердең III орынға Айат Канысов паза Руслан Баинов турысханнар. II орынны Карина Бастаеваа паза Алексей Казыгашевке читіргеннер. I орынны джазты толдырчатхан Дарья Тачееванаң Татьяна Балахчина ӱлескеннер. Валерия Кыржинакова, «Молитва» ырны толдырып, Гран-прині холға кирген. В.М.Торосовтың адынаң Хакас типографиязының директоры, Улуғлар чӧбінің кізізі Вячеслав Тутатчиков, чон аразынаң таланттарны таап, ілезіне сығарчатхан ӱчӱн, Герман Танбаевке алғызын читірген. Хакасияның Оӧркі Чӧп депутады, марығның ӧӧн спонсоры Евгений Челтыгмашев кӱстенчік чииттерні махтаан, ырлирға чайалғаннар кӧп полчатханын таныхтаан. Чалахай иирде кӧрігҷілернің кӧңні толған полар. Чон эстрада ойыннарын кӧрерге, сарыннарны истерге хынадыр.
Автор :
Елена САГАТАЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы