УЧЁНАЙЛАРНЫҢ ПІРГЕ ТОҒЫЗЫ
12.11.2019
Хабарлар
Презентация. Чарыхха «Очерки истории Советской Хакасии (1917-1991 гг.)» монография сых парды.
Аны ХакНИИЯЛИ-ның паза Н.Ф.Катановтың адынаң Хакас хазна университедінің ученайлары хада-пірге тимнееннер: Надежда Данькина, Алексей Дроздов, Татьяна Кискидосова, Елена Мамышева, Анна Мохова, Владимир Печерский, Евгений Реутов, Эдуард Сагалаков, Михаил Степанов, Юлия Троякова, Елена Тиникова, Валентина Тугужекова, Вячеслав Филиппов, Александр Шекшеев. Оларнаң тархын наукаларының докторы, профессор Валентина Тугужекова устаан, тархын наукаларының кандидады, доцент Михаил Степанов нандырығлығ редактор полған. Хайди олар чарытханнар, пістің кічіг чир-суубыстың 1917 - 1991 чыллардағы тархынына чарыдылған книга он чыл мының алнындох пазылып пастаан. Кирек материаллар, тізең, ікі чыл мының алнында чыыл парғаннар. «Аны сығарарға ахчанаң сидіксіністер полған. Анаң пу чыл Санкт-Петербургтағы Россияның наукалар академиязынын материальнай культура тархыны институдының устағ-пастаанзар айланғабыс. Олар піске книганы чарыхха сығарарға ахчанаң полыс пиргеннер. ХакНИИЯЛИ-ның 75 чылына сыйых ит пиргеннер тиирге чарир», - теен Валентина Николаевна.
«Очерки истории Советской Хакасии (1917-1991гг.)» монография 500 экземплярлығ сығарылған. Пу тоғыс тархын наукаларынаң, юриспруденциянаң, социальнай философиянаң айғасчатхан специалисттерге, политологтарға тузалығ полар. Республика школаларында Хакасия тархыны уроктарын апарчатхан ӱгретчілер аннаң ідӧк хынып тузаланарлар.
- Пілдістіг, андар кӧп тоғыс кирілбин парған. Аннаңар піс пу проектті узарадар пӧгіннігбіс. Кӧстег итчебіс Совет Союзы соондағы чылларға. Аны аймах иргі пічіктернең, сомнарнаң чазир сағыс пар, - тееннер ученайлар.
Автор :
Александра СУНЧУГАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде