ХАКАСИЯНЫҢ ВОСПИТАТЕЛЬӀ ЧИҢІСЧІЛЕР САНЫНДА
27.11.2019
Хабарлар
Поғдархас. Ӱр ниместе Москвада пос тілі ӱгретчілерінің тиксі Россия марии ирткен. Анда пістің чир-суғӌыбыс, Ағбандағы «Василек» олған садының воспитательі Наталья Трунова мастер-класста 2-ӌі орынға турысхан
Улуғ чорыхтаңар паза марығдаңар Наталья Николаевна піди чоохтапча:
- Марығда аралазарға оой ла полбаан. Пастап заочнай чардыхты иртіп аларға, анаң постаңар паза хакас тілі урогынаңар видео, суурып, ызарға кирек полған. Мағаа Хакасиядағы ӱгредіг киреен тилітчең паза ӱгретчілер квалификациязын кӧдірҷең институттың тоғынӌылары Мария Сергеевна Арчимаеванаң Надежда Яковлевна Толмачева чахсы хабас пиргеннер. Оларның чӧптеріне, пілістеріне паза опыдына тӧстеніп, позымны турыстыра кӧзіткем тіп сағынчам. Марығның араласчылары уроктарын ӱзӱргеннер, минің мастер-клазым сала пасха пӱдірілген. Анда мин тоғыста хайдағ оңдайларнаң тузаланчатханымны кӧзіткем.
Республиканың ӱгредіг паза наука министрінің орынҷызы Юрий Сагалаков, Хакасия ӱчӱн турызып, узын пӧзік синде кӧзіт пирген паза сыйыхтығ орын алған ӱчӱн, Наталья Трунованы чылығ алғыстаан.
- Хакасиядағы хакас тілі ӱгретчілері Россия синінде иртчеткен мастер-класста постарын сыбыра турыстыра кӧзітчелер. Анзы республикада пос тілі ӱгретчілерінең кӧп тоғыс апарылчатханын таныхтапча. Пӱӱл, тiзең, марыға пастағызын на, ӱгретчіні нимес, воспитательні ысхабыс. Анзы улам чӱрексіністіг полған. Че Наталья Николаевна, позын прай сариинаң чахсы кӧзідіп, артыхтарның санында пол парған. Анзынаң піс аны прай чӱреебіснең алғыстапчабыс, тоғызыңар мыннаң мындар ідӧк тӱзімніг парып одырзын, - чоох тудып, таныхтаан Юрий Гаврилович.
Улуғ марығ ӱгретчілерге иң пурун наа пілістер, кӧстеглер пирче. Чиңісчі воспитатель, Москвадаң айланып, ідӧк позының алнында улуғ пӧгіннер турғысча.
- Мин амды палаларны пасха чоннарның культуразынаң таныстырарға пӧгін тутчам. Піс чоннарның тіллерін, сарыннарын, кибірлерін ӱгрен турарбыс, - чарытча ол.
Наталья Николаевна тиктең нимес пу сағысты чуртасха кирерге пӧгін тутча. Аның группазында, хакас паза орыс палалардаң пасха, украиннернің, ингуштарның, туваларның олғаннары пар. Олар прайзы хакас тілін хынып ӱгренчелер, пасха даа чоннарның тіллерін ідӧк ӱгренерҷіктер.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы