СӦБІРЕЛЕРДЕ ПОС ТІЛІ ХАЙРАЛЛАЛЗЫН
29.11.2019
Хабарлар
2020 чыл - Хакас тілі чылы. Пу неделяда Хакасияның ӱгредіг паза наука министерствозы Хакас тілі чылын пайрамни асты
Хакасияның ӱгредіг паза наука министерствозы Хакас тілі чылына чарыдылған мероприятиені сӧбіреде пос тілін хайраллапчатхан, аннаң чоохтасчатхан чуртағҷыларны таныхтирынаң пастаан. Олар прайзы «Тӧреен тіл - чонның худы» республиканың сӧбірелер фестивальында чиңісчі полыбысханнар.
- Палаларын пос тіліне ӱгредерге кӱстенчеткен іҷе-пабаларға улуғ алғыс читірчем. Сірер хакас тілінің тінін пик тут парчазар! Республикадағы прай хакас сӧбірелер ідӧк кӱстенген ползалар, тілібісті хайраллирдаңар сурығ андағ ағырсымнығ полбасчых, пеке, - таныхтаан чооғында Хакасияның ӱгредіг паза наука министрінің орынҷызы Юрий Сагалаков.
Чоох тутхан соонаң Юрий Гаврилович «Тӧреен тіл - чонның худы» сӧбірелер фестивальында ӧткін араласхан, тӧреен тілін ӧтіре пілчеткен олғаннарға сыйыхтар читірген. Андағ ікі оолах полған. Олар Алтай аймаандағы Аршаннар паза Ағбан пилтірі аймаандағы Томыҷахтар аалларның оолағастары Артемий Котожековнаң Тимур Торбостаев. Пу ікӧлең алғыстас пічиин паза улуғ нимес сыйыхтар алған. Артемий тахпахтап таа полча, кибелістерні дее ӧтіг хығырча, Тимур Торбостаев, тізең, ідӧк тӧреен тілінең чахсы чоохтасча.
Ағбан городтағы Кочелоровтар сӧбірезі ідӧк пос тіліне хайығ салчатхан ӱчӱн таныхтатхан. Олар «Сӧбірелернің чайаачы тоғыстары» номинацияда иң артыхтарның санында полыбысханнар. Чиит іҷе Екатерина Кочелорова 3 паза 4 частығ Айана паза Азарика хызыҷахтарын іңе-чіпнең орта тузаланарға ӱгрет салған. Амды палаҷахтар іҷенің устаанынаң кӧклӧҷектеріне ол-пу ниме-ноолар тігерге кӱстенчелер. «Тӧреен тіл - чонның худы» республика мариинда пу ус холлығ сӧбіре 2-ҷі орынға турысхан. Оларға алғыстас пічии паза мультиварка читірілген.
Анаң «Хакас чонның киктезі» номинацияда Алтай аймаандағы Конгаровтар паза Ағбан пилтірі аймаандағы Торбостаевтер сыйыхтатханнар, «Сӧбіре чилегезі» номинацияда, тізең, Ағбандағы Труновтар паза Харатастағы Миндибековтар сӧбірелері таныхтатханнар.
Хакас тілі чылын чахсы кирекнең пастап, Хакасияның ӱгредіг паза наука министерствозы пу тоғысты аннаң андар узарадарға сағыс тутча. Килчеткен чылда хакас тіліне улуғ хайығ салчатхан сӧбірелерні таныхтиры аннаң андар узарадылар. Ідӧк пасха даа мероприятиелер иртірілері кӧрілче.
- 2020 чылда «Пос тілі - тіріг тіл» республика мариин иртірерге пӧгінчебіс. Анда олғаннар Хакасия писательлерінің произведениелері хоостыра ойыннар турғызарлар, сарыннар толдырарлар паза даа пасхазы. Иң артыхтарын 4 сентябрьда, Хакас тілі кӱнінде, таныхтирбыс. Ідӧк чағдапчатхан чылда Хакасияда пос тілі ӱгретчілерінің регионнар аразындағы форумын иртірербіс. Андар Алтай, Тува республикаларның, Кемеров облазының паза даа пасха регионнар ӱгретчілерін аралазарға хығырарбыс. Форумда піс пос тілін хайраллирынҷа паза тилідерінҷе хайдағ тоғыстар апарчатханыбысты чарыдарбыс паза пасхазын истіп аларбыс, - чарытча Хакасияның ӱгредіг паза наука министрінің орынҷызы Юрий Сагалаков.
Хайди орта пазылған пу сӧстер:
Сӧбіредең чуртас пасталча,
Тӧлнің худы анда чуртапча.
Ағабыс алғаан ирке тілібіс
Айдас тӧлде успин чӧрзін!
Автор :
Оксана СУНЧУГАШЕВА Сом Дмитрий СУНЧУГАШЕВТИ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде