АҒБАНДА - ХОККЕЙ ОЙЫННАРЫ
03.12.2019
Хабарлар
Спорт. Ағбанда «Саяны» спорткомплексте РСФСР-ның саблығ пӱдірігҷізі, Ағбанның аарластығ кізізі Геннадий Вяткиннің адынаң меспектіг хоккейҷе городтағы турнир азылды
Ирткен пятницада Ағбандағы «Саяны» спорткомплексте 2008-2009 чылларда тӧреен оолағастар аразында меспектіг хоккейҷе турнир азылған. Анда Ағбанның, Новосибирсктің, Кемеровтың паза Хызылчарның чиит спортсменнерінің командалары араласханнар. Ағбандағы «Саяны», Кемеровтағы «Кузбасс», Хызылчардағы «Енисей-2008», «ЕнисеИ-2009» хоккеисттер ӧмелері марығласханнар.
- Аарлығ олғаннар паза Ағбанның аалӌылары! - турнирні азып, Ағбан город пазының тоғызын толдырчатхан кізінің орынҷызы Алексей Лёмин айланған. - Кибірли иртчеткен городтағы турнир РСФСР-ның саблығ пӱдірігҷізі, Ағбанның аарластығ кізізі Геннадий Африканович Вяткинге чарыдылча. Марығ араласчыларына, пуста ниик чылып, чапчаң хайынарға, наа чиңістер алғапчам. Амғы чиңістер сірерге Россия паза тилекей синіндегі пӧзік чидіглерзер чол асчалар. Хоккей ойыннары ӱлӱкӱнінең сірерні!
- Чалахай кӱннең прайзын! - чоох тутхан Хакасияның спорт министрі Владимир Кретов. - Пу турнирні мин иртіріл сыххан тустаң пілчем. Пастап аны улуғлар аразында иртіргеннер, соонаң андар олғаннарны кирібіскеннер. Пу марығда араласхан оолағастар амды улуғ хоккейде ойнапчалар. Геннадий Африканович кӧп чахсы кирек иткен, пу стадионның пӱдіриинде араласхан.
Г.А.Вяткиннің оолғы Владимир Геннадьевич хоккеисттерге алғас сӧстерін читірген: «Аарлығ олғаннар паза марығны иртірчеткеннер! Геннадий Вяткиннің адынаң теестегі турнир пӱӱл 24-ӌі хати иртче. Пістің сӧбірее мындағ марығ чыл сай иртірілчеткені поғдархастығ. Сірерге сіліг ойыннар паза чиңістер алғапчам!»
Ӱс кӱн ирткен турнирде Сибирь городтарындағы олғаннарның 8 командазы араласхан. Пастағы кӱнде Ағбандағы «ДЮСШ-2007» командадағылар Хызылчардағы «Енисей-2008» команданын спортсменнерін 2:1 саннаң утханнар. Марығның ӧӧн чарғыҷызы Владислав Пугаев Ағбандағы кічіг спортсменнер чахсы тимнен салғаннар, табырах чӱгӱрер оңдайлығлар тіп таныхтаан. Хайзы командалар пӱӱл пуссар пастағызын на сыхханнар. Че ойыннар оларны чидіглерге кӧстепче.
Автор :
Елена САГАТАЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы