ХЫСХЫНЫҢ ХАЙХАСТАРЫ
10.12.2019
Хабарлар
Кӧзідіг. С.П.Кадышевтің адынаң культура кінінде ӱс кӧзідіг тоғынып пастады. Оларның пірсі «Наа чылның кибірлері» адалча
Культура кінінің туразында чыл ибіре аймах кӧзідіглер иртчелер, че, минің кӧрізімнең, иң чапсых тоғыстарны узанҷыхтар Наа чылға удур чайапчалар. Анзы тиктең нимес. Наа чыл - пістің хазнада иң хынчатхан ӱлӱкӱн. Аны улуғлар даа, кічіглер дее чидікпин сағыпчалар.
Мӱчел хоостыра 2020 чыл Кӱске чылы полар, аннаңар сибер холлығларның кӧбізі пу аңыҷахтың омазын чайап саларға кӱстенген. Тойымның чуртағҷызы Татьяна Пивоварова чаҷыннан толғалған хобырахтардаң (палочки. - Авт.) Кӱске ханын паза аның туғаннарын ӱр салтыр. Ойнаҷахтар тіріге тӧӧйлер, тӱрче одырып, ойлап парыбызарға тимделер. 9 частығ Артём Василенко Шира аалдаң, ол камакты иирілген чіптең палғап салтыр.
Минің кӧңніме Айана Торокованың тоғызы кірген. Хызыҷах Асхыстағы олған искусство школазында ӱгренче. Ол ӱгретчізі Мадина Ахпашеваның устаанынаң теердең карандаштар турғысчаң чірчені чайабыстыр. Чірче тасты кӱске омаларынаң чазалған. Аны кӧрерге дее ӧріністіг. Чоохтирға кирек, Мадина Мустафовнаның олғаннары аймах кӧзідіг-марығларда тӧреміл араласчалар. Кӧзідімге, 2017 чылда кӱскӱзін аның ӱгренҷізі Артём Чебодаев Москвада ирткен «Уникум» тиксі Россия мариинда узын сынаан. Хакас оолах «Устың ӱгренҷізі» номинацияда чиңіс тутхан.
Чапсых тоғыстардаң Наталья Середаның частарын хайди даа таныхтирға кирек. Сорығдағы узанҷых, ағаста кӱскені паза сырны киртіп, аңыҷахтың чалахай кӧңнін чахсы кӧзіт пирген. Кӱске кӧрігҷілерні таңдағызынзар ізеніснең кӧрерге, посха киртінерге кӧӧктірчеткен осхас.
Татьяна Кременчук Асхыс аймаандағы Пилтір аалдаң. Ус холлығ ипчі крючокнаң ниме дее палғабызар оңдайлығ. Кӧзідіге Татьяна Валерьевна кӧклӧлерін сығарған. Ойнаҷахтарның пӧзии - 50 сантиметр, полғанының на кӧгенее, пӧрии, ӧдігі пар. Кип-азахты суурыбызарға чарир. Узанҷыхтың чооғынаң, ол чуртты чазаҷаң паза палалар ойнаҷаң кӧклӧлер чайапча. Татьяна Кременчук Культура туразында істенче, ікінҷі чылы олғаннарны палғирға ӱгретче. Пастап ол кирек киліспес тіп чочынтыр, че палалар кружокка хынып чӧрчелер. Часхызын С.П.Кадышевтің адынан культура кінінде олғаннар аразында кӧзідіг-марығ иртер, чайаачы ус анда ӱгренҷілерін араластырарға пӧгінче.
Чыл таниинаң пасха, кӧзідіге аймах оңдайнаң чайалған сыбыҷахтар, Соох апсахтар, Хар хызыҷахтар, тӱлгӱҷектер, адайахтар, ӱгӱҷектер сығарылғаннар. 11 частығ Айго Угдыжекова «Ай ӱстӱнде одырчатхан Хар кізілер» тоғыс чайап салтыр, Дарья Куюкова - Кӧлееде веногын. Пӱӱл Наа чыл сыйыхтарын салҷаң хапчығастар кӧп. Ус холлығлар, оларны сіліглеп, прай кӧңнілерін салтырлар.
Узанҷыхтар чуртаснаң тиңе хаалирға кӱстенчелер. Кӧзідімге, Ольга Чусова «Хайди чилбігенні ӱгредіп аларға» мультфильмдегі Ах паза Хара фурияларны чайап салтыр. Пу ойнаҷахтар палаларның кӧңніне кірер, оларнаң сыбыны чазабызарға чарир.
«Наа чылның кибірлері» кӧзідігнің ікінҷі чардығы - хоостар. Тоғыстарның ӧӧн сағызы: хысхы
- хайхастығ тус, ол ӱлӱкӱннерге, хынығ ойыннарға пай. Ағбан пилтіріндегі «Разноцветье» студияның араласчыларын махтирға кирек. Ӱгретчі Татьяна Зуколның устаанынаң саарбахтар таңнастығ хоостар чайапчалар. Кӧзідімге, Милена Мончик адайын сомнап салтыр, Ольга Дружининаның тоғызында тайға аразында парчатхан поездті кӧрерге чарир. Ол чағдапчатхан Наа чылны таныхтапча полбас па.
Араласчыларның санында - Асхыстағы хоосчылар Леонид Канзычаковнаң Денис Саражаков. Чайаачы устар пейзаж жанрға хынадырлар. Леонид Николаевичтің хоозы «Соох декабрь» адалча. Суғ хазында ӧсчеткен хазың ағастар айас кӱнге ӧрінчелер тіп пілдірче. Денис Саражаков «Харлығ хыра» тоғызында, хысхы туста кӱс алынып, узупчатхан чир-чайаанны кӧзіт пирген.
Ідӧк культура кінінде хоосчы Александр Крячиктің «Холстың паза сырларның хайхазы», сомҷы Сергей Аревшатовтың «Национальный колорит» кӧзідіглері иртче. Прай тоғыстарнаң 23 декабрьға теере танызып аларға чарир.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы