«ЧАХАЙАХ» ОЛҒАН САДЫ ІЗИИН АСТЫ
18.12.2019
Хабарлар
Танығлығ кӱн. Ирткен тынағ кӱнінде Асхыста 120 палаа кӧріл парған «Чахайах» олған сады пайрамни азылған. Ол «Демография» нацпроект хоостыра пӱдірілген
АНДА ХАКАСИЯ ПАЗЫ ВАЛЕНТИН КОНОВАЛОВ, РЕСПУБЛИКАНЫҢ ӰГРЕДІГ ПАЗА НАУКА МИНИСТРІ ЛАРИСА ГИМАЗУТИНА ПАЗА АСХЫС АЙМАА ПАЗЫ АБРЕК ЧЕЛТЫГМАШЕВ АРАЛАСХАННАР.
ОЛҒАН САДЫ АЗЫЛАРЫН ПАБА-ӀҶЕЛЕР ДЕЕ, ОЛҒАННАР ДАА ЧИДІКПИН САХТААННАР. ХАЙДИ ТАНЫХТААН ОЛҒАН САДЫНЫҢ УСТАҒҶЫЗЫ ОЛЬГА АРАШТАЕВА, МЫНДА 1,5-3 ЧАСТЫҒЛАРҒА ӰС ЯСЛЯ ГРУППАЗЫ ПАЗА 3 - 7 ЧАСТЫҒЛАРҒА ТИМНЕГЛІГ ПАЗА УЛУҒ ПАЛАЛАР ГРУППАЛАРЫ ТОҒЫНАР. ПОЛҒАНЫНЗАР ЛА 20 ОЛҒАН ЧӦРЕР.
- Ясля группалары пастағы хадылында орныхчалар, олғаннарға ойнаҷаң пӧліктерде чылығ поллар салылған. Полған на пӧлік уғаа чарых, оларның улии 52 м2 тиңнелче. Ідӧк пістің тӧзек-частых чунчаң пӧлік тимнелген, андар пӱӱнгі кӱнге килістіре оборудование турғызылған. Анзы пістің тоғынчыларыбысха уғаа тузалығ полар. Ідӧк ас-тамах тимнечең пӧлік пӱдірілген, - таныхтаан Ольга Николаевна. - Аннаң пасха пістің физкультура, музыка, сенсорнай паза имчі пӧліктері пар.
Кічіглер группаларында ікілер воспитатель паза ікілер няня тоғынар, улуғ палалар группаларында - пірер ле няня, тоғынҷылар читкіҷе алылған. Тиксі алза, «Чахайах» олған садында 45 кізі тоғынча, оларның санында психолог паза логопед. Асхыста «Чахайах» пастағы олған сады, хайзында ясля группалары тоғынар. Олғаннар чӧрер пӧліктер чарых ӧңнернең сырлалған. Кухняда чахсы оборудование турғызылған, поварларға кип-азах алыстырчаң пӧлік тимнелген. Олғаннарға сыннары хоостыра одырчыхтар паза столлар турғызылған. Олған сады ибіре видеокамералар турча, приемнайда хадағҷылар дежурство апарарлар. Тасхар полған на группаа алынҷа площадкалар пӱдірілген, хайзыларында чилеңместер паза пасха даа ойнаҷахтар турғызылған.
Олған садын «Синодекор» ООО пӱдірген, субподрядчик «Хакасгражданстрой» ООО полған. Улуғ аалҷыларны удурлирға олған садының тоғынҷылары паза палалар сыхханнар. Хызыл чаламаны хыплирға Хакасия пазы Валентин Коноваловха, Асхыс аймаа пазы Абрек Челтыгмашевке, республиканың ӱгредіг паза наука министрі Лариса Гимазутинаа паза пу олған садынзар чӧрер Ильяға ӱлӱс тӱскен. «Чахайахтың» ізии азылғанда, аалҷыларға экскурсия иртірілген.
Олған сады азылғаны олаңай ӱлӱкӱн нимес, ол улуғ пайрам, часка паза ӧрініс полча. Ӱлӱкӱнге олғаннарның сағыстарын толдырған, проектті тимнеен паза олған садын пӱдірген кізілер килгеннер. Сӧс пирілген Хакасия пазы Валентин Коноваловха:
- Пӱӱн сірерге ӧріністіг кӱн, олған сады азылды. Пӱӱл піс ӱзінҷі олған садын асчабыс. Ол чылығ, алғым паза истіг полар, кӧп чыл паба-іҷелерні паза олғаннарны ӧріндірер. Мында палалар ойнирлар, ӱгренерлер, удур-тӧдір чоох алызарлар. Ізенчем, олған сады прайзына кӧп ӧрініс ағылар. Ол нацпроект хоостыра пӱдірілген, хайзын піс президенттің чахиинаң чуртасха кирчебіс. Пӱӱл ідӧк Ағбанда паза Алтай аймаандағы Кӧк хайа аалда олған садтары азылар. Аның ӱчӱн хазна ӱлгӱлеріне, Россия президенті Владимир Путинге алғызыбыс читірчебіс. Аймах программалар орындағы ӱлгӱлерге чахсы объекттерні пӱдірерге оңдай пирчелер.
Чооғын тоозып, Хакасия пазы олған садына сертификатты Ольга Араштаеваа читірген. Ідӧк Хакасия правительствозының алғыстас пічиинең олған садын пӱдірерінде араласхан организацияларның кізілері сыйыхтатханнар. Пайрамда ідӧк чоох тутхан Абрек Челтыгмашев.
- Пӱӱн піс олған садының тӧреен кӱнін таныхтапчабыс, анзын піс ӱр сахтаабыс. Аның ӱчӱн иң пастағызын республиканың ӱгредіг паза наука министерствозына паза министр Лариса Николаевна Гимазутинаа алғызым читірчем. Пістің аймаабыс пастағыларның санында «Демография» нацпроектке кіріп алған. Аны хоостыра пӱдіріге кӧріл парған ахчаның 9 %о-ін Асхыс аймаа позытхан. Дотацияларға чуртапчатхан аймахха ол уғаа кӧп ахча полча.
Улуғ тоғыс толдырылған. Пазағы чылда ідӧк Пилтір аалда паза Асхыс поселокта олған садтары азылар, - таныхтаан Абрек Васильевич.
Алғыстас сӧстері соонда танығлығ кирек тузы чит килген. «Синодекор» ООО-ның директоры Татьяна Абросимова паза «Хакасгражданстрой» ООО-ның директоры Олег Манжула Ольга Араштаеваа олған садының клӱзін читіргеннер. Татьяна Абросимованың чооғынаң, «Чахайах» олған сады амғы кирексіністерге нандырчатхан технологиялар хоостыра пӱдірілген, олғаннарның тилізіне прай оңдайлар тӧстелген. Ольга Араштаева пӱдірігҷілерге улуғ алғызын читірген. Алғыстастар тоозылғанда, олғаннар улуғ нимес концерт кӧзіт пиргеннер.
Хайди таныхтаан Асхыс аймаа пазының пастағы орынҷызы Галина Новикова, олған садын пӱдіреріне паза оборудование аларына проект хоостыра 102 миллион салковай позыдылған, ол санда 10 миллион салковай - аймах бюджедінең паза 5 миллион артиинаң салковай - республика бюджедінең. «Чахайах» олған сады кӧп тоғыс толдырчатхан площадка оңдайынаң пӱдірілген. Мында олғаннарны ӱс тілге ӱгредерлер: хакас, орыс паза англия. Анзы кічіг палаларға уғаа тузалығ полар.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы