ШКОЛАЛАРҒА - ӰР САҒААН СЫЙЫХТАР
25.12.2019
Хабарлар
Ӧрініс. 23 декабрьда Хакасия правительствозы туразы алнында. Пастағы май площадьында, республиканың 16 школазына наа автобустарның клӱстері пайрамни читірілген
ЧЫЛ ТООЗЫЛЧАТСА, РЕСПУБЛИКАНЫҢ АЙМАХ ПУЛУҢНАРЫНДАҒЫ ШКОЛАЛАРҒА КИБІРЛИ НАА АВТОБУСТАР ЧИТІРІЛЧЕ. АЙМАХТАРНЫҢ ӰГРЕДІГ УПРАВЛЕНИЕЛЕРІНІҢ УСТАҒӋЫЛАРЫ ПАЗА ШКОЛАЛАР ДИРЕКТОРЛАРЫ НАА ТЕХНИКАНЫҢ КЛӰЗІН ХОЛҒА АЛАРЫН ЧИДІКПИН САХТААННАР. НАА ЧЫЛ АЛНЫНДА ОЛ УҒАА ЧАХСЫ СЫЙЫХ! ӰГРЕНҶІЛЕР ДЕЕ НАА АВТОБУСТЫ САХТАПЧАЛАР.
- Наа автобустар иң кирексіпчеткен школаларға пирілче. Амды олғаннар сидіксінiс чох аймах марығларда, олимпиадаларда аралас турарлар. Ирткен чылнаң тинестiрзе, пӱӱл пістің школаларыбысха 10-ға кӧп техника пирілді. Ол Хакасияның ӱгредіг паза наука министерствозы федеральнай кiннең чахсы тоғынчатханын таныхтапча.
Ӱгренчілернің чуртазына хорғыс чох полар ӱчӱн, автобустарда ГЛОНАСС системазы турғызыл парған. Ӱр ниместе, Саяногорсксар чорыхнаң чӧргенде, Майна поселоктағы школаа наа автобус читіргебіс.
Пӱӱл сарығ ӧңніг, аймах шарларнаң чазалған автобустар Абазазар, Саяногорсксар, Алтай, Асхыс, Пии, Боград, Орджоникидзе, Ағбан пилтірі, Таштып паза Шира аймахтарзар чол тутханнар. Абаза, Саяногорск городтарға паза Алтай, Шира, Пии аймахтарына пірер автобус пирілген, Асхыс, Ағбан пилтірі, Орджоникидзе, Таштып аймахтарына - ікілер, Боград аймаана ӱс автобус сыйлалған.
Таныхтирға кирек, республиканың 12 муниципальнай пӱдізінде 95 автобус 3256 паланы ибдең школазар тарт чӧрче. Пӱӱнгі кӱнде школа автобустарында тахографтар паза ГЛОНАСС системазы турғызыл парғаннар.
Пастағы май площадьында чазағлығ турчатхан автобустар олаңай чуртағҷыларның хайиин тартхан. 17, 22 паза 34 орыннығ автобустарның водительлері, наа техниканың тінін тудып, иблерінзер нанарын чидікпин сахтапчатханнар. Пірее шоферлар наа автобустың каподын азып, анда ниме-де кӧрглепчеткеннер. 34 орыннығ автобус прайзынаң килкім кӧрінген. Аны Таштыптағы 1№ школа-интернатха сыйлап пиргеннер. Таштыпсар Индіркі Хурлығас, Чоғархы Хурлығас ааллардаң палаларны школаа ағылчалар. Водитель Александр Гаврилович Сагалаков ікі аалдаң 42 олғанны тарт чӧрче. Ол 18 чыл школа автобузының водительі полып тоғын парир. Хайди ол таныхтапча, водитель полары - ол уғаа нандырығлығ тоғыс. Паза олғаннарнаң тоғынарға аның кӧңніне кірче. Амды наа, истіг автобуста ӱгренҷілерге уламох чахсы полар тіп сағызынаң ӱлескен ол.
Шира аймаандағы Хара кӧл аалдағы школаа 22 орыннығ автобус сыйлалған. Школа директоры Екатерина Фёдоровна Шушаначева наа автобустың клӱзін Валентин Коноваловтың холынаң алған соонаң чалахай кӧңніліг водительзер пастырған. Екатерина Фёдоровнаның таниинаң, водитель ӱс рейснең олғаннарны Хара кӧл аалзар ағылча. Пастап Чабак паза Сеектіг аалдағы палаларны читірче, анаң Талкин хара суундағыларны, анаң пазох Сеектіг аалзар чол тудып, андартын школаа парарға тимненчеткен иркеҷектерні Хара суғзар ағылчаттыр. Пір сӧснең чоохтаза, водительнің тоғызы нандырығлығ. Пасха ааллардаң Хара кӧлзер 58 ӱгренҷіні тарт чӧрчелер. Амды директорның ӧрінізіне оларның 22 орыннығ ікі автобус полар.
Автор :
Ольга ТОМОЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде