ИҢ ЧАРЫХ ӰЛӰКӰН ПОЛЗЫН
27.12.2019
Хабарлар
Ағбандағы 22 № школаның 4-ҷі класстағы ӱгренҷізі Саяна ЧЕПЧИГАШЕВА Правительство сыбыӌаанда араласхан
Правительство сыбыҷаа-2019. Пу пайрам республиканың драма театрында ирткен. Андар Хакасияның аймах-городтарының иң хыйғахах, иң чайаачы, иң ӧткін ӱгренҷілері чыылысханнар
АҒБАНЗАР МЫНДАҒ ЧОРЫХНАҢ ОЛАР ЧАХСЫ ӰГРЕНЧЕТКЕН, АЙМАХ ПРЕДМЕТТЕРҶЕ ОЛИМПИАДАЛАРДА, ЧАЙААЧЫ ПАЗА СПОРТ МАРЫҒЛАРЫНДА СЫЙЫХТЫҒ ОРЫННАР АЛЧАТХАН ӰЧӰН ТАНЫХТАТХАННАР. ПРАВИТЕЛЬСТВО СЫБЫҶААНДА ОЛАРНАҢ ХАДА ІДӦК ЧУҒА ЧУРТАПЧАТХАН СӦБІРЕЛЕРДЕГІ ПАЗА АЙМАХ ШКОЛА-ИНТЕРНАТТАРДАҒЫ ОЛҒАННАР АРАЛАСХАННАР.
НАА ЧЫЛНЫҢ ӦӦН МАТЫРЛАРЫ СООХ АПСАХ ПАЗА ХАР ХЫЗЫҶАХТАҢ ПАСХА РЕСПУБЛИКАНЫҢ ПРАЙ МУНИЦИПАЛЬНАЙ ПӰДІСТЕРІНЕҢ КИЛГЕН 7 - 14 ЧАСТЫҒ ООЛАХ-ХЫЗЫҶАХТАРНЫ ХАКАСИЯ ПАЗЫНЫҢ ОРЫНҶЫЗЫ ТАТЬЯНА КУРБАТОВА АЛҒЫСТААН.
- Аарлығ олғаннар, ӱгретчілер паза іӌе-пабалар! Чарадыңар Хакасия пазы Валентин Коноваловтың чарадиинаң сірерні чағдапчатхан 2020 чылнаң алғыстабызарға, - теен Татьяна Курбатова. - Уғаа ӧріністіг сірерні мында кӧрерге - иң хыйғаӌахтарны, иң чайаачыларны. Мыннаң мындар даа сірер ӱгредігде, спортта, чайаачы киректерде постарыңны чахсы ла саринаң кӧзідерзер тіп ізенчебіс. Наа чыл - ол олғаннарның на хынчатхан ӱлӱкӱні нимес. Піс тее, улуғлар, аны хаҷан даа чидікпин сағыпчабыс. Ноға ба? Ол кӱн пісті олған тузыбыссар апарыбысча паза хайхастар сыйлапча нооза. Аннаңар сірернің ол тузыңар ідӧк пір дее чобағ чох иртсін. Сағынған сағыстарың толзын.
Устағӌы кізінің мындағ сӧстерінең чаразарға кирек. Піс кічігде Наа чылны сынап хайхастар ағылӌаң тус тіп санаӌаңмыс. Ӱлӱкӱн иртчең орында - ол аалдағы клуб полӌаң - сыбыны ойнаӌахтарнаң чазабысчаңмыс, ах чаӌында Соох апсахнаң Хар хызыӌахты хоостаӌаңмыс. Ибде, тізең, хубулынӌаң кип-азахты тимнеӌеңміс. Тиксі алза, прайзынаң сіліг чазанып, Соох апсахнаң Хар хызыӌахха иң артых кибелісті чоохтирға кӱстенӌеңміс. Тадылығ сыйых алып алар ӱчӱн. Анаң Наа чыл матырларынаң хада улуғ ӧріністе, сыбы ибіре пас чӧріп, Наа чылдаңар сарынны хынып толдырӌаңмыс. Хынығ иртчеңнер ол ӱлӱкӱннер. Че амғы тустағы осхас Правительство сыбыӌаана чӧрген ползабыс, нымахта пол килген чіли пілдірерӌік піске...
Пу кӱнде, тізең, Правительство сыбыӌаана килген палаларның харахтары пір дее чылтыраспинчатханнар. Аймах матырларға хубулған олғаннар даа саннығ ла полған. Оолахтарның кӧбізі ах кӧгенекнең хара ыстан кис килтір. Хызыӌахтар ідӧк амғы тусха килістіре тонан салтырлар. Паза ӱлӱкӱнні иртірчеткеннерге холларында телефоннығ саарбахтарны ойыннарға сығарарға сидік полған. Палалар, сомға суурынып, сах андох Интернеттің аймах сетьтерінде «хайынчатханнар». Амғы тустағы чииттернің мындағ оңдайларын піліп, неке, пу пайрамның тӧстегӌілері оларға сомға суурынӌаң орыннар илееде тимнеп салтырлар.
Анаң театр залында «Трам-пам-пам и все-все-все» нымах кӧзіділген. Ол туста даа олғаннарның кӱлімзіреені тың пілдіртпинчеткен. Сынны чоохтаза, пу кӱнде палаларны Ағбанзар ағылған ӱгретчілернің не ӧрінізін кӧрерге чарир полған. Оларның санында Асхыс аймаандағы Пилтір аалдағы 2 № школаның пасха хан тіллер ӱгретчізі Зинаида Асочакова ідӧк ӱгренӌілерінің полғанын на махтаан, оларнаң поғдархазын чазырбинчатхан.
Нымах кӧріп алғанда, хубулған палалар Соох апсахха кибелістер хығырғаннар, сарыннар толдырғаннар. Салтарында, Правительство сыбыӌаанда полған 600 палаа прайзына тадылығ сыйыхтар читірілген.
Правительство сыбыӌаа чыл сай чахсы иртірілче нооза - иң сіліг сыбы турғызылча, артисттер ойыннар иртірчелер, нымахтар турғысчалар. Чайаачы олғаннарға Хакасия правительствозы адынаң ідӧк иң артых сыйыхтар пирілче... Мында тус алызығларына хайығ салылды...
Автор :
Александра СУНЧУГАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде