ААЛЛАР ТИЛІЗІНЕ - ХАЗНА ХАБАЗИИ
30.12.2019
Хабарлар
Ӱлгӱде. Хакасия пазы Валентин Коновалов ирткен неделяда Москвада тоғыс чорығынаң пол килді
Улуғ хырлас айының 26-ҷы кӱнінде Хакасия пазы Валентин Коновалов Россияның хазна чӧбінің чыылиинда араласхан. Анда Россия Президенті Владимир Путиннің устаанынаң хазнабыстың аал хонии тилізі сурығлары ӱзӱрілген. Ӧӧн хайығ 2020 - 2025 чылларда чуртасха кирілер аалларның тиксі тилізінҷе хазна программазын чуртасха киреріне айландырылған. Килчеткен чылдаң пасти аалларда 25 чылға теере чылда 3%-ке теере ставканаң пирілер льготалығ ипотека тоғынып пастир.
Хакасия чуртағҷыларының ӱзінҷі чардығы аалларда чуртапча, аннаңар аал хонии тилізі, аал чуртағҷыларына тоғыс табары паза аалларда истіг оңдайлар тӧстирі пістің республикаа кирек сурығлар полча.
- Республиканың аал хонииның ӧӧн кӧстеглері - ит паза сӱт малын, хойларны ӧскірері паза ӧзімнернең айғазары. Хакасия ааллар хабазиина паза тилізіне кӧстелген аймах программаларда ӧткін араласча, ол санда чиит сӧбірелерге паза специалисттерге аалда чурт пӱдірерінҷе, фермерлерге хоныхтарын тилідерге гранттар пирерінҷе, кічіг паза ыраххы ааллардағыларға мал ӧскіреріне ахча тӧлирінҷе. Амғы паза наа проекттернің чуртасха маңнаныстығ кирілгені тиксі регионның экономиказының ӧзізіне хабазар, - пасча Валентин Коновалов социальнай сетьтердегі позының пӧліктерінде.
Чоохтирға кирек, улуғ хырлас айының 25-ҷі кӱнінде республика пазы пістің чир-суғҷыларыбыснаң тоғасхан. Ол «Хакас чир-суғҷылар» пірігістің тоғызын нааҷылирын Москвадағы ӧткін чир-суғҷыларыбыснаң, ол санда Игорь Кызласовнаң паза Людмила Костякованаң ӱзӱрген. Пу сурығны пӧгерінҷе чахығ Хакасияның Москвадағы тӧреміл представительствозына пирілген, хайзынаң устапча Валентин Коноваловтың орынҷызы Юлия Исмагилова.
Автор :
Хакасия пазының администрациязы
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде