АНЫМҶОХ, СОСХА ЧЫЛЫ! ИЗЕН, КӰСКЕ ЧЫЛЫ!
30.12.2019
Хабарлар
**************************************************************************************
**************************************************************************************
Хайди искірілген чыылығда, республика 2019 чылда нацпроекттер хоостыра 4 миллиард 3 миллион салковай федеральнай ахча киріп алған. Ол ахчаа республикада наа социальнай объекттер пӱдірілген паза ам даа пӱдірілче, кӧп объектте тыхтағ тоғыстары толдырылған. Кӧзідімге, пӱӱл Хакасияда 3 ФАП, пір имнег амбулаториязы, 6 олған сады, 2 аалда Культура туразы, пір муң ӱгренчее кӧрілген улуғ школа (Ағбанда), 8 спортзал паза пір азых стадион пӱдіріл парған. Ідӧк 3 олған имнег туразы, 11 поликлиникадағы олған пӧлии паза 5 аалда Культура туразы тыхталған.
Таныхтирға кирек, килер 2020 чылда республика ӱлгӱлері нацпроекттерче улам кӧп ахча киріп аларға пӧгінчелер - 4 миллиард 758 миллион салковай. Ол ахча пасталған пӱдіріглерні, ол санда хазых хайраллирына тың киректелчеткен республиканың радиология корпузының пӱдіриин узарадарына паза нааларны пастирына парар. Мындағ полған 2019 чыл тӧреен чирібісте - Хакас Республикада.
Аарлығ хығырығҷылар, сірернің полғаныңар ла піске аарлығ. Сірер прайзы улуғ аарласха турыстығзар, пос тілін пілчеткен паза тілібіске чуртирға полысчатхан хакас газетазына пазынчатханыңар ӱчӱн. 2020 чыл пістің республикада Хакас тілі чылы тіп чарлалған, тӧреен тілібісті хайраллап, пос газетазына пазын саларға ундубаңар паза хончыхтарны, арғыстарны, туған-чағыннарны пазынарға кӧӧктіріңер. Тілібіс чуртапчатханда, чоныбыс чіт парбас!
Чағдапчатхан Наа чылнаң, аарлығ хығырығҷылар! Чахсы ӱлӱстіг паза пик хазыхтығ полыңар!
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде