ПӰКӰЛЕЕЗІНЕҢ ТИМГЕ СЫХ ПАРДЫ
10.01.2020
Хабарлар
«Ӱгредіг» нацпроект. Пылтыр октябрь айда Ағбанда Крыловтың орамазындағы 110 № турада орныхчатхан лицей пайрамни азылған. Аның иркінін иң пурнада пасталығ класстар ӱгренӌілері алтааннар
Наа чыл алнында, тізең, лицейге 5 - 11 класстарны ӱгредерге чаратчатхан лицензия читірілген. Ортымах класстағылар анда хысхы тынағ кӱннері соонаң ӱгреніп пастирлар.
Ағбан городтың пазы Алексей Лемин пу пайрамда ідӧк пастағы ӧзек сапхан улуғ масханы сыйлаан. Хайди ол чарытхан, городтағы пӱдіріглер тимге сых парзалар, пастағы ӧзекті сапхан тирігні оларның музейлерінзер пирер кибірнің пастағҷызы Николай Булакин полча. «Піс аны узаратчабыс, - теен Алексей Викторович. - Ол тиріглер пӱдірігҷілернің паалаҷаа чох тоғызын таныхтапчалар нооза».
Чоохтирға кирек, пу 1600 ӱгренҷее кӧрілген лицейнің пӱдірии 2017 чылның февральынаң сығара пасталған. Ол Хакасияда «Ӱгредіг» нацпроект хоостыра тимге сығарылған пастағы пӱдіріг полча! Лицейде ікі спорт, конференция, концерт заллары, нанотехнология паза робототехника кабинеттері пар. Саннығ лаборатория, экспериментотека тоғынчалар. Наа ӱгредіг учреждениезінде ідӧк издательствонаң телестудия кӧріл парғаннар. Имнег кабинеттерінде, ол санда тіс имнеҷең специалисттің кабинедінде, прай наа оборудование.
Ағбандағы лицей «Россияның иң чахсы школалары» тиксі хазна синіндегі марығның чиңісчізі полча.
Паза аның тархынынаң Хакасиядағы робототехника тилізі пик палғалыстығ. Пу ӱгредіг учреждениезінде техника конструированиезі паза моделирование кіні орныхча. Ағаа хоза, анда чайғы проект академиязы тоғынча. Лицеисттер чыл сай Россия синіндегі «Робофест», «Профест» паза даа пасха фестивальларда иң артыхтарның санында полчалар. Лицейде ӱгренчеткен палалар ідӧк, чайаачыларынаң иң артыхтар полып, «Сириуста» пілістер алчалар, «Артекте» тынанчалар.
Чайаачы палаларнаң прай 131 кізі тоғынча. Оларның аразындағы 97 ӱгретчінің ікізі наукалар кандидады полча. Пис магистр паза 20 азыра чиит специалист істенче.
Пӱкӱлеезінең тимге сых парған лицейнің устағ-пастаан, ӱгретчілерін паза ӱгренҷілерін ідӧк Хакасия пазының орынҷызы Татьяна Курбатова алғыстаан. «Лицеисттерге паза ӱгретчілерге азых ла чол алғапчам. Оларның чидіглері мыннаңох кӧп ползын. Мин тиксі республика, ол санда лицейнің тилізіне хозым идерге тың кӱстенербін», - теен Татьяна Анатольевна.
Нандырығлығ сӧс алып, Ағбандағы лицей устағҷызы прайзына улуғ алғыс читірген - Хакасия правительствозына, ӱгредіг паза наука министерствозына, Ағбан городтың устағ-пастаана, пӱдірігҷілерге.
«Че иң улуғ алғыс Николай Генрихович Булакинге. Ол пастағы ӧзекті сапханнаң сығара лицейнің пӱдіриин хайығда тутхан. Пӱдірігҷілернең, піснең чоохтазарға, чӧптезерге кӱннің кил парҷаң. Лицейні пайрамни олох асхан. Аннаңар 2019 чылның октябрьында пістің ӧме лицейге аның адын пирердеңер чӧпнең сыххан. Пӱӱнгі кӱнде ӱгредіг учреждениезінің адын алыстырарына пічіктер тимнелчелер», - ӱлескен Ирина Лаврентьевна.
Автор :
Александра КАРАМЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы