ІЗІГ ЧИИС СООХТЫ ТОБЫРАРҒА ПОЛЫСЧА
15.01.2020
Хабарлар
Чурт чохтарны азырапчалар
Полызығ. Хысхы соохтарда городтарда чурт чохтарны азырир кирек апарылча. Пу киректе волонтерлар, чонға хабазығ пирҷең учреждениелер араласчалар
Пӱӱлгі хысхы уғаа соох иртче тіп полбассың. Сырлама соохтар турбааннар. Че андағ даа полза, пу туста Ағбанда чурт чохтарны азырир кирек апарылча. Городтың ӧӧн чырғалынаң хости тасхар хыстапчатхан чурт чохтарға пос кӧңнінең полысчатханнар кухнязы кӱнӧрте азыладыр. Андар азыранып аларға кил парчатханнар пар.
Альбина Сербигешева пу чӧрімде пос кӧңнінең араласча. Аннаң, танызып, чоох алысхабыс.
- Мындағ киректі волонтерлар чӧріміне дее санирға чарир, - чоохтаан Альбина Сербигешева. - Піс 6-7кізі, пу кирекке пос кӧңнінең хозылып, чонны азырапчабыс. Мындағ кізілерге полызарға кирек тіп санапчам. Чон чӱрее андағ ла хатығ нимес нооза. Ас-тамах аларына хайзы-да ахчанаң полыс пирче. Пір идінӌек тушенкалығ каша пиредір. Пӱӱнге піс ӱгре, тушенкалығ перловай каша, сахарлығ чей тимнеп салғабыс. Тадылығ чиис пар полза, ідӧк пирчебіс.
Чурт чохтар хысхыда канализация хутухтарында хончалар. Соох туста оларға хонҷаң орын полған полза, чахсы поларҷых тіпче Альбина. «Хызылчарда чурт чохтарға хонҷаң орын пар. Ағбанда ноға андағ тура азыбыспасха?» - сурығ турғысча ол.
Чуртастың сидік оңдайларына кір парғаннарға полызарға кирек тіп сағыснаң пу чӧрім араласчылары оларны азырапчалар. Итсе-де, олар халғанҷы чылларда чыл ибіре суббота кӱнде чурт чохтарны пір орында, чыып, азырапчалар.
Автор :
Елена САГАТАЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы