«ТУЛАҒА» ЧИИТТЕРНІҢ ХАЙИИН ТАРТЧА
31.01.2020
Хабарлар
Концерт. Хакас филармониязында «Ӱлгер» ансамбльның «Тулаға» алыптығ нымахтар иирі ирткен
Хакасияның чон артизі Вячеслав Кученовтың устаанынаң «Ӱлгер» ансамбль ӱзінҷі чылы «Тулаға» проектті чуртасха кирче. Аның ӧӧн noriнi - хакас хайҷыларның кибірлерін хайраллиры, чоныбысты алыптығ нымахтарнаң таныстырары.
Мының алнында полған на хакас аалда хайҷылар полңаң. Че чуртас оңдайлары алысханда, улуғлар сын чирзер парыбысханда, хайҷылар кибірі ундудыл сыххан. Амды «Ӱлгер» ол кибірні айландырар тоғысты апарча. Пӱӱлгі концерт Семён Кадышевтің паза Пётр Курбижековтың пайрамнығ тӧреен кӱннеріне чарыдылған. Сентябрьда Чоохчыл аалда чуртаан чир-суғҷыбыстың 135 чазы таныхталар, ноябрьда, тізең, Пётр Курбижековтың - 110 чазы.
Чоохтирға кирек, ансамбльда алызығлар пол партыр. Артисттернің ӧмезіне ХГУ-ның искусство институдының музыка колледжінің студенттері Юрий Шалгыновнаң Кристина Кольчикова хозылғаннар. Ідӧк чалахай иирде Вячеслав Кученовтың хығыртиинаң Россияның саблығ артизі Евгений Улугбашев араласхан.
«Тулаға» концертті Владимир Доржу асхан. Кӱстіг ӱнніг хайҷы «Хан Мирген» алыптығ нымахты ысханда, залдағы чон тынминыбысхан чіли пілдірген. Таланттығ чир-суғҷыбыс морсымнығ хайлапча, тиктең нимес 2018 чылда ирткен «Хай-мӧрій» чоннар аразындағы хайҷылар мариинда Гран-приге турысхан. Чапсых полған Вячеслав Асочаковты истерге. Чиит кізі, ыыхнаң ойнап, Семён Кадышевтең пазылған «Алтын Хан Хыс» нымахты толдырған. Пурунғыда даа, амғы даа туста хайңылар ӧӧнінде чатхан саап хайлапчалар. Ыых тартып хайлиры -Уйбат суғ хастада чуртаан хакастарның кибірі. Илееде тус «Ӱлгерде» Антонида Тюльберова істен парир. Хакас абахай кӧрігҷілерні, «Тасха Матырның» ӱзігін толдырып, аптаан. Хакастар ипчі чонға хайлирға чаратпаҷаңнар, аннаңар ырҷы кип-чоохты сарнабысхан тиирге чарир.
Алындағы концерттернең тиңнестірзе, пӱӱл алыптығ нымахтар ииріне чон чахсы чыылысхан. Кӧрігҷілернің илеедезі - чииттер. Сизінгенде, оол-хыстар Юрий Шалгыновнаң Кристина Кольчикованың сығарын сахтааннар. Чир-суғҷыларыбыс алыптығ нымахтарны хайди толдырарлар ни? Юрий Шалгыновты кӧрігҷілер пӧзік устығ музыкант чіли таныпчалар. 2016 чылда ол, хомыснаң ойнап, Дельфийскай ойыннарда алтын медаль утханда, хакасиядағыларның ӧрінізі пу чир полбаан. Пылтыр хакас оолға симфоническай оркестрнең хада Пастағы май площадьында концерт иртірерге ӱлӱс тӱскен. Ам, тізең, чир-суғҷыбыс хайҷы чолын пасча. Анзы ӧріністіг. «Тулаға» концертке Юрий «Алтын Арығ» алыптығ нымахты таллап алған. Таланттығ музыканттың ӱні кӱстіг паза сіліг, Вячеслав Кученовтың устаанынаң хайлирға ӱгреніп алар.
Кристина Кольчикова Кызлас аалдаң. Хакас хыс аймах-пасха синде иртірілчеткен марығларда ӧткін араласча. Ырҷы, ӱс хыллығ хомыснаң ойнап, «Алтын Тайҷы» алыптығ нымахты сарнаан.
Халғанҷызын сценаа Евгений Улугбашевнең Вячеслав Кученов сыхханнар. Хайди таныхтаан Евгений Александрович, ол «Улгер» ансамбльның артисттерін истіп аларға пӧгінген. Че Вячеслав Кученов аны алыптығ нымахтар иирінде аралазарға чӧптеп алтыр. Саблығ ус «Алтын Чӱс» нымахтың ӱзігін толдырғанда, сах андох кізінің алнында пурунғы алыптар турыбысханнар, ирбен оттың чызы сабыл килген чіли пілдірче. Хайҷыларны хамнарнаң удаа тиңнестірчелер, анзы тиктең полбас.
Вячеслав Кученов «Айдолай» алыптығ ньімахтың пизінҷі чардығын толдырған. «Ӱлгер» ансамбльның хоос устағҷызы «Айдолайны» хаҷанох толдыразынаң ыс пирерҷік, неке. Че амғы чонны алыптығ нымахтарны истерге ӱгредерге кирек. Піс телевизор, Интернет пастыра ӱтертінерге кӧнік парғабыс, аннаңар пурунғыдаң хайраллалған нымахтарны оңарарға кӱзібіс читпинче. Мында Вячеслав Кученовтың пик хылиина морсынарға кирек. Ізенчебіс, аның сағынған сағызы толар.
Ідӧк концертте «Кӱн сузы» ансамбль араласхан. Артисттер сіліг теелбектернен кізілернің кӧңнін кӧдіргеннер.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде