АЛЫЗЫҒЛАРНАҢ ЧАРАСЧАБЫС...
04.02.2020
Хабарлар
Ӱзӱріг. Хакасия правительствозында Россияның Конституциязынзар кирілчеткен алызығларӌа тимнелген закон проекті ӱзӱрілді
Алғым чыылыға республиканың толдырығлығ, закон сығарҷаң паза орындағы ӱлгӱ органнарының, партиялар паза халых пірігістерінің кізілері чыылысханнар, ол санда Хакасия пазы Валентин Коновалов, Ӧӧркі Чӧп кнезі Владимир Штыгашев паза Россияның Хазна Думазының депутады Юрий Афонин.
Кӱн суриина Россия президентінің Конституцияа кирер алызығлардаңар пастаанҷа тимнелген «Азых ӱлгӱнің алынҷа сурығларын хайығда тударын чахсыландырарынаңар» закон проектінің ӱзӱрии сығарылған. Валентин Коноваловтың кӧрізінең, алызығлар сынында чуртасха хаҷанох кирілерге кирек полған, аннаңар президент оларны Россияның ӧӧн законы синінде тыыт саларға чаратханы чӧпсіндірче. Республика пазы Хазна Чӧбінің орны паза тузазы ӧӧн законда чарадыл парары регионнарға наа оңдайлар пиреріне ізенче.
Владимир Штыгашевтің искіриинең, парламент президиумы, алызығларны ӱзӱріп, оларнаң толдыразынаң чарас салған. Аның кӧрізінең, Россия Конституциязына кирілер алызығлар ол пастағы ла хаалағ, аннаң андар Хазна Думазына даа, регионнарның закон сығархаң ӱлгӱ органнарына даа илееде законға алызығларны кирерге тимде поларға кирек. Че Конституцияа кирілчеткен алызығлар чон ӱзӱриинең, ӱн пирізінең алыларын уламох танығлығ кирекке санапча Владимир Николаевич.
Пу алызығларға ідӧк улуғ ізеніснең кӧрчелер муниципальнай пӱдістер пастары. Тиксі хазнаны алза, полған на регион пос оңдайли чарат салған нооза: хайда оларны таапчалар, хайда турғысчалар, хайда, тізең, уламох сидік оңдайлар чарадыл парған. Орындағы пастыхтарға пу сурығда пір системаа тудынарға киректелче.
Че иң ағырсымнығ сурығ - регион бюджеттерін толдырары. Владимир Штыгашев аны федеральнай ӱлгӱ синінде искеннеріне ӧрінче. Президент айланызы хоостыра, регионнарға читіре алылбинчатхан парыстарның 2/3 чардығы айландырыл турар. Че паза пір сурығ ағаа ам даа тыс пирбинче: чир паза чир-чайаан ис-пайынаң тузаланарынҷа чарадығны федеральнай кін, регионның сағыс-кӧрізін санға албин, пирчеткені. Совет тузында, тізең, ікі клӱс правилозы тоғынған. Пу ағырсымнығ сурығҷа Владимир Николаевич илееде ӱр чоохтанған. Ол пу оңдайны айландырарға кирек тіп санапча.
Паза пір сағыссырасты читірген Хакасияның профсоюзтар федерациязының кнес тоғызын толдырчатхан Евгения Ольховская. Аның искіриинең, тоғысчы ӧмелерде Конституцияа алызығлар ідӧк ӱзӱрілчелер, че кізілер оларны читіре оңар полбинча осхастар. Пу танығны истіп, Юрий Афонин чоннаң улуғ чарыдығлығ тоғыс апарыларға кирек, иң пастағызын, искіріглер таратчатхан оңдайлар пастыра, тіп таныхтаан.
Юрий Вячеславович, тізең, Конституцияа кирілер алызығларны тимнирінең кӧні палғалыстығ кізі, ол тоғысчы ӧмее кірче, закон проектіне тӱзедіглер 6 февральға теере алылчалар тіп таныхтаан, 11 февральда Хазна Думазы аны ікінҷі хығыриинда алар. Чоохтирға кирек, Хазна Думазының депутаттары закон проектін пастағы хығыриинда пір ӱннең аларға чарасханнарынаң чапсытханнар. 432 депутат! Андағ кирек хаҷан даа полбаан, неке. Че ікінҷі хығырии сала хазыр ӱзӱріглернең парарға кирек. Ноға? Тиксі хазнадаң чыылчатхан тӱзедіглер хайдағ ла сурығларға теелбинче. Чыылчатхан чӧптерні паза тӱзедіглерні тоғысчы ӧме тиксі ӱзӱрер. Юрий Афонин чыылығ араласчыларына прай чӧптерні читірерге молҷаан.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы