ЧОННЫ ӰРӰКТІРБЕСКЕ КИРЕК
04.02.2020
Хабарлар
Кӱн сурии. Тилекейде сығысчатхан коронавирус ағырығдаң пістің республикадағы чонны хайди арачылирдаңар чоох парған Хакасия правительствозында.
Наа кискек чуғынҷах ағырығдаңар ӱзӱріг парған республика правительствозындағы санитарнай паза эпидемиядаң тоғыр комиссияда. Анда араласханнар Хакасияның хазых хайраллаҷаң, транспорт паза чол хонии, істіндегі киректер министерстволары, Роспотребнадзор, Россельхознадзор, МЧС. Чыылығны регион пазы Валентин Коновалов апарған. Ол, республика чуртағҷыларынзар айланып, таныхтаан:
- Иң пастап, пір дее ӱрӱкпеске кирек. Андағ ниме ам на полбинча, пістің имнег кирее ноо даа хомай киректерні тобырча, турғызылған пӧгіннерні толдырча. Аннаңар чонны ӱрӱктірерге кирек чоғыл, улам на Россияда коронавирусты пірдеезі чухтырбаан.
Хайди ол чоохтаан, пӱӱн пістің хазнада наа кискек ағырығ сығыс килбес ӱчӱн, аны пеер кирдірбес ӱчӱн улуғ тоғыс апарылча. Че, андағ даа полза, ноо даа нимее тимде поларға кирек.
Пу кӱнде Ағбандағы аэропортта пістің регионзар килчеткен туристтерні хайығда тутчатхан санитар-карантин сыныхтаа улам тыыдылған. Хызылчардағы аэропорт пастыра пасха хан чирінең айланған чуртағҷыларыбыс республиказар килзе, олар имҷілер сыныхтаанда 2 неделяҷа тудылчалар. Пу неделядаң Хакасияда коронавирусха ӧнетін тест-системаҷа сыныхтап пастирлар, алында анализтер Новосибирсксер ызылҷаңнар.
Имнег тураларында эпидемиологтар имнег тоғынҷыларына ӱгредіг иртірчелер. Андағ ағырығ сығыс килзе, имнег полызиин хайди орта пирердеңер тимненісті 180 тоғынҷы иртібіскен. Имнег тураларынзар чатырылчатхан кізілердеңер танығлар кӱннің сай Роспотребнадзорзар ызылча.
Чыылығда ӱзӱріг соонаң республикада пу ағырығдаң тоғыр иртірілер санитар-профилактика мероприятиелерінің планы чарадыл парған.
- Турғызылған пӧгіннерні толдырарында прай ведомство-министерстволарға чӧптіг тудынарға кирек, ідӧк муниципалитеттерге ӧткін аралазарға, ол санда чуртағҷыларға искіріглер пирерінде. Чонны ӱрӱктірбеске кирек. Піс ноо даа чуғынҷах ағырығдаң тоғыр харбазарға тимдебіс, - теен Валентин Коновалов.
Автор :
Хакасия пазының администрациязы
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы