ХАЙДИ ЧИР-ЧАЙААННЫ ХАЙРАЛЛАП ХАЛАРҒА?
28.02.2020
Хабарлар
Экология сурии. Хакасияда чир-чайаанны паза киині хайраллир сурығ аннаң андар ӱзӱрілче. Ирткен неделяда Хакасия пазы Валентин Коноваловтың устаанынаң экологияҷа тоғысчы группаның теестегі чыылии ирткен
Чыылығда Хакасия пазының орынҷылары, министрлер, Алтай аймаа пазы, республикадағы Ростехнадзор паза Роспотребнадзор управлениелерінің тоғынҷылары, Халыхтар палатазының кізілері паза халыхчылар араласханнар. Хакасияда разрезтер тоғыстарын ӧткін апарчатханда, халғанҷы чылларда экология сурии иң хатығ турча. Алтай паза Пии аймахтарының чуртағҷылары паза чир-чайаан ӱчӱн сағыссырапчатхан халыхчылар разрезтердең тоғыр харбазығ апарчалар. Анзы пілдістіг, хазыхха ӱрег ағылчатхан тозыннығ киинең кем тынарға хынадыр за?!
Тоғысчы ӧмеде иң ӧӧн хайығ салылған Алтай аймааның экологиязына. Аннаңар муниципалитеттердең чыылығда Татьяна Раменская ла араласхан. Пу аймахта разрезтер тоғыстарын тудығ чох апарчатханнарында, чир-чайаан ідӧк табырах кірленче. Че киизер тасталчатхан химикаттар чуртағҷыларның хазиина пір дее теелбинчеттір. Аннаңар тоғысчы ӧменің чыылиинда искірген Хакасияның хазых хайраллаҷаң министрі Владимир Костюш. Аның сан пирізінең, 2015 - 2019 чылларда Алтай аймаанда тыныс органнары ағырығларынаң ирееленчеткен, онкологиянаң ағырчатхан чуртағҷыларның саны хозылбаан.
- Хакасияның пасха аймахтарынаң тиңнестірзе, Алтай аймаанда разрезтер тоғынчатхан ӱчӱн ол-пу ағырығларнаң ағырчатхан алай ба ӱрепчеткен кізілернің саны хозылбаан, - теен Владимир Фёдорович.
Чыылығда ідӧк Хакасияның чир-чайаан ис-пайы паза экология министрі Сергей Арехов киині паза чир-чайаанны арығлирынҷа комплекс планынаң таныстырған. Іди, кии кірленмес ӱчӱн, бензиннең тоғынчатхан халых транспорттың санын хызырарға кирек. Мындағ тоғысты хазнаның кӧп регионында апарчалар. Анда автобустарның, газельлернің орнына городтар орамаларынҷа троллейбустар алай ба трамвайлар чӧрчелер. Ідӧк бензинні газха алыстырыбызарға чарир.
Алынҷа тураларда пес одынып, кии ідӧк илееде кірленче. Аннаңар Хакасияның чир-чайаан ис-пайы паза экология министерствозы Ағбанның хай пірее микрорайоннарын чылығ пирҷең сетьтерзер піріктірерге чӧп пирген. Чир-чайаанға тайға ӧрттері улуғ ӱрег ағылчалар. Ирткен чылда Иркутск облазында улуғ ӧрттер полғаннаңар, андағы ыс Хакасиязар читкенӧк. Аннаңар республикада ӧрттер сых парбас паза оларнаң харбазар ӱчӱн, нацпроекттер хоостыра илееде наа оборудование алылар. Улуғ хайығ салылар разрезтер тоғынчатхан аймахтарға. Предприятиелер орныхчатхан орын ибіре киині сыныхтир тоғыс апарылар. Ӧнетін приборларнаң аны сыныхтирға оой полар. Планда кӧріл парған тоғыстар толдырылза, 2024 чылға Хакасияда кии 20-30 процентке арығлал парарға кирек.
Тоғысчы ӧменің чыылиинда Хакасия пазы Валентин Коновалов прай муниципалиттердең планға хозар чӧптер ызарға чахығ пирген. Олар мартта иртер теестегі чыылығда ӱзӱрілерлер.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде