«ШАХТЁРДАҢ» СЫҒАРА «САЯНЫҒА» ТЕЕРЕ
28.02.2020
Хабарлар
Кӧзідіг. 26 февральда Л.Р.Кызласовтың адынаң Хакас национальнай чир-суғ ӱгренҷең музейде «Шахтёрдаң» сығара «Саяныға» теере» кӧзідіг азылған
Кӧзідіг Хакас Республиканың «Саяны» меспектіг хоккей командазының пайрамнығ чылына чарыдылча. 40 чыл мының алнында СССР-ның чемпионадында наа паза пірдеезіне таныс нимес «Саяны» команда араласхан. Ол команда Ағбанда тренер Виталий Лазицкийнің холында тӧстелген.
- Ағбандағы хоккейнің тархыны пар, - теен музей тоғынңызы Максим Чертыков. - Чибіргі чыллардох хоккей ойнирға хынчатхан ооллар хысхызын, Ағбан суғ тооп парза, пусча мерчік сӱр чӧрӌеңнер. Пастағы айғы Степной орамада урылған. Илбек Ада чаа чыллары соонаң меспектіг хоккей Хакасияда чахсы тиліп сыххан, Коммунар, Таштып, Шира, Табат аалларда ӧнетін командалар тӧстелгеннер. Харатастың «Угольщик» (соонаң «Шахтёр». - Авт.) паза Ағбанның «Динамо», «Спартак» командалары иң кӱстіглер тіп саналӌаңнар.
Чапсых спорт кӧзідиин Хакасияның меспектіг хоккей федерациязының президентi республиканың Ӧӧркі Чӧбі кнезінің пастағы орынҷызы Юрий Шпигальских асхан. Ол пу ӱлӱкӱнге хуруғ холлығ килбеен. Юрий Александрович холдаң холға чӧрҷең кубокты ағыл килген. Анда «Советскай Россия» сыйии ӱчӱн меспектіг хоккей турнирі. Ағбан, 1988 чыл» пазылғанын ол прайзына хығыр пирген.
- Пу кубок Владимир Николаевич Штыгашевтің кабинедінде турған. Ол андада облисполкомның кнезі полған. Ол тустаң сығара Владимир Николаевич кубокты хайраллаан. Амды мин аны музейге читірчем, - теен ол.
Пу кӱннерде республиканың чир-суғ ӱгренҷең музейінде «Шахтёр», «Урожай», «Колос», «Саяны» командаларның иргі сомнарын кӧріп аларға чарир. Сомнарда іле кӧрінче, мының алнында стадионға кізілер сыңмаңаң, андағ улуғ ойыннар полҷаң. Музейде «Саяны» команданын тренерлерінің сомнары парох. Пастағы тренер Виталий Александрович Лазицкий «Саянынаң» 1980 - 1988 паза 2013 - 2014 чылларда устаан. Аның соонаң 10 тренер алысхан. 2018 чылдаң сығара пістін саблығ меспектіг хоккей командазынын тренері Евгений Владимирович Ерахтин полча.
Хазыр ойын тузында хоккей матырлары пиртін тее, палығладып таа алчалар. Оларны «Саяны» команданың имҷізі Павел Ефимович Асочаков имнепче. Хызылчардағы хазна имнег институдын тоосхан специалист 1984 чылдаң сығара амғы тусха теере, тиксі 35 чыл, хоккеисттернің хазиин хайығда тутча. Аның холынҷа команданың пір ле тӧлі иртпеен. Ол Хакасияның спортында улуғласнан тузаланча.
Кӧзідіг азылғанда, мин Хакасиянын спорт паза физкультура организацияларында 40 чыл азыра істен париған Артём Никитич Асочаковнаң чоохтазып алғам.
- Сигізон чылларда Хакасияда улуғ спорт тӧстирге сағыс тӧреен. Алтон чылларда футбол пістің республикада полған, аннаңар хоккей піске килістіре полар сағынып, команда тӧстеебіс. Пу спорт кӧрімі чонға даа хынығ нооза, - сағысха кирген Артём Никитич. - Пу команда тӧстелбеен полза, «Саяны» стадион даа чох поларӌых, Хакасияда чоннар аразындағы турнирлер дее иртпесчіктер. Пістің команда Финляндия, Швеция, Норвегия командаларынаң тоғасхан. «Саяны» сылтаанда пістің спорт пӧзік синге кӧдіріл парған.
Артём Никитич Асочаков Асхыс аймаандағы Пилтір аалда тӧреен. Ол істеніс чолын тӧреен-ӧскен аалындағы школада физкультура ӱгретчізінең пастаан. Республикадағы спорт тилізіне кӧп хозым итче. Хакасияның спорт паза туризм министрінің пастағы орынҷызы полғанох. Пӱӱнгі кӱнде Россияның спорт министерствозында инструктор-методист полча, Сибирьдегі паза Алтынзархы Кавказтағы федеральнай округтарның спорт резервін тимнирінҷе нандырығ тутча.
Хакасияның «Саяны» командазынаңар кӧп чоохтирға чарир, че прай анын чидіглерін Л.Р.Кызласовтың адынаң чир-суғ ӱгренҷең музейде кӧріп аларға уламох хынығ полар: аймах чылларда ирткен марығларның кубоктарын, медальларын, хоккей матырларының кип-азахтарын паза ойнаҷаң меспек-тайахтарын.
Автор :
Татьяна ТЮТЮБЕЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде