ӦТКІН МУНИЦИПАЛИТЕТТЕРГЕ ХАБАЗЫҒ ПОЛАР
03.03.2020
Хабарлар
Чыылығ. Ирткен неделяда Хакасия пазының орынҷызы Ирина Войнованың устаанынаң Ағбандағы «Минің пос киреем» кінде улуғ чыылығ ирткен. Анда республиканың экономика тилізі министерствозының устағ-пастаа муниципальнай пӱдістердегі специалисттернең хада республикада туризмні тилідердеңер чоох апарғаннар
Хакасияда 13 улуғ муниципальнай пӱдіс. Полғанында ла туризм пасха-пасха синде тиліпче. Кӧзідімге, Шира аймааның кӧллерінзер чайғызын кӧп турист тынанарға килче, Орджоникидзе аймаанзар чон хысхызын саналығ чыларға чыылча. Аннаңар пу муниципальнай пӱдістерде туризм хомай нимес тиліпче. Олох туста Харатас городха, Боград аймаана махтанҷаң сылтағ чоғыл. Оларға туристтерні тартчаң оңдай чоғыл.
Ирткен чылда муниципалитеттерге туризмні тилідерге ахча хомай нимес позыдылған. Аннаңар хай піреезі туристтерні тартар тоғысты чахсы апарған. Тиксі Хакасияда, тізең, 2019 чылда пасха регионнардаң паза хазналардаң килген туристтернің саны 10 процентке ӧс парған. Че, хайди чыылығда таныхтаан Хакасия пазының орынҷызы Ирина Войнова, муниципалитет пастарына паза специалисттерге туризмнең айғазарға сағынчатхан алай ба амды туризмнең айғасчатхан идінҷектерге хабазарға кирек.
- Идінҷектерге ахчанаң на нимес, пасха даа полызығ пирерге чарир. Кӧзідімге, чир сурии иң ағырсымнығ полча. Муниципалитеттерде идінҷектерге чир алып аларға алай ба арендаа пирерге табырах полыс пир турарға кирек полча. Ідӧк олар чарытхы суриина хомзынчалар. Мында муниципаликеттернің идінҷекке полыс пирер оңдайлары парох, - чооғында таныхтаан Ирина Ивановна.
Туризмнең айғазарға сағынчатхан идінчектернің саны хозылза, оларның аразында хазых конкуренция полар, муниципалитеттерзер туристтер тартыларлар паза бюджетке хоза налог кірер. Хайди идінҷектерге хабас пирерге? Пу чыылығның ӧӧн сурии полған. Туризм киреенде істенчеткеннернің иң ағырсымнығ сурии - ол профессиональнай кадрлар чидіспинчеткені.
Аннаңар олар постары чыылығда искіргеннер. Пу сидіксіністі Хакасияның экономика тилізі, республиканың ӱгредіг паза наука министерстволары паза Хакас хазна университеді хада пӧгерлер.
- ХГУ туризм сферазына специалисттерні тимнирге тимде. Амды піске муниципалитеттердең кемге хайдағ специалист тимнирдеңер сурыныс пічіктері кирек, - чарытхан Хакасияның экономика тилізі министрі Николай Евдокимов.
Ӏдӧк чыылығ араласчылары полған на муниципалитетке туризм тилізі ӱчӱн нандырчатхан тоғынды кирек тіп пір чӧпке килгеннер. Амды аймахтарда культуранаң алай ба чииттер киреенең айғасчатхан специалист хоза туризмні «апарча». Мындағ тоғыс туза ағылбинча.
- Амды піс полған на муниципальнай пӱдістең туризмні тилідердеңер сағыс, кӧріс сахтапчабыс, - айланған чыылығ араласчыларынзар Ирина Войнова. - Хайдағ муниципальнай пӱдіс орында туризмні тилідерге кӱстенер, оларға хабазарбыс. Бюджетте ахча пар, идінҷектерге субсидия пирербіс.
Сынап таа, туризмнең айғасчатхан идінҷектер пастаана хабазар оңдайлар пар. Хайди чоохтаан Хакасияның тиліс фондының директоры Денис Пауль, идінҷектернің сурығлар полза, оларға чарир мойбизнес19.рф сайтсар кіріп, сурығларнаң айланарға. Ідӧк «Минің бизнезім» кінзер посха килерге чарир. Анда чуртағҷыларның пастаана хабас пирердеңер специалисттер алғыда чарыт пирерлер. Ӏдӧк идінҷектерге муниципальнай пӱдістердегі МФЦ-зар айланарға чарир.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы