АҒБАНДА - НАА БАССЕЙН
04.03.2020
Хабарлар
Наа пӱдіріг. 2 мартта Ағбанда Торосовтың орамазында ӱр пӱдірілген хазых пиктеӌең физкультура комплексі (ФОК) азылды
ПУ КОМПЛЕКСТІ ТУЗАЛАНЫСХА КИРЕРІН АҒБАННЫҢ ЧУРТАҒҶЫЛАРЫНА ӰР САҒИРҒА КИЛІСКЕН. АНЫ 2013 ЧЫЛДА ПӰДІРІП ПАСТААННАР. ТОРОСОВТЫҢ ОРАМАЗЫНДА ФОК-ты ПӰДІРЕР ОРЫНДА ӦЗЕКТІ АҒБАННЫҢ ПАЗЫ ПОЛҒАН НИКОЛАЙ БУЛАКИН ЧИРГЕ КИРЕ САПХАН. КОМПЛЕКСТІ ГОРОД ӦӦНІНДЕ ПОЗЫНЫҢ АХЧАЗЫНА ПӰДІРГЕН, АННАҢАР ПІРЕЕДЕ, АХЧА ЧИДІСПИН, ПӰДІРІГ ТОҒЫСТАРЫ СӦӦ ТАРТЫЛ ПАРЧАТХАННАР. АМДЫ АНДА ІКІ ХАДЫЛЛЫҒ СІЛІГ ПӰДІРІГ ТУРЫБЫСТЫ.
Хазых пиктеҷең физкультура комплексі алнында илееде чон чыылыс парған. Оларның аразында полғаннар Хакасия пазының орынҷызы Татьяна Курбатова, республиканың спорт министрі Владимир Кретов, Ағбан город пазы Алексей Лёмин, город депутаттары чӧбінің кнезі Альберт Тупикин, Ағбан город пазының орынҷылары, администрация тоғынҷылары, спорт школаларының устағҷылары паза даа пасхазы.
Хайди анда искірілген, наа комплекске «Тепсей» ат пирілген. Ол тағның ады, пу тағ тӧзінде ікі суғ пірікче, ӱс ағын анда хозылча. Комплекс республика паза город бюджеттері ахчазына пӱдірілген. Анда узуны 25 метр суғҷа чӱсчең тӧрт чоллығ бассейн, фитнес-зал, тренажёрлар залы паза даа пасха кирек пӧліктер пар.
Город пазы Алексей Лёмин, чыылған чонны спорт ӱлӱкӱнінең алғыстап, чоох тутхан:
- Пӱӱл Ағбанда тӧрт спорт туразы тузаланысха кирілер, ол теесте «Тепсей» пастағызы полча. Пу пӱдіріг оой нимес апарылған, комплекс Николай Генрихович Булакиннің пастаанаң пӱдіріл сыххан. Таныхтирға кирек, пу спорт объектін ӧӧнінде город пӱдірген, ағаа прай 130 миллион салковай позыдылған, аның 93 миллионы - муниципалитет ахчазы. Комплексті пӱдірер проект «Единая Россияның» программазынҷа тимнелген, че аның соонда даа ол нинҷе-де хати алыстырылған. Бассейн ідӧк кинектернең тоғынарға кӧстелген, комплекс пасха даа кӧп кӧстегҷе тоғынар. 1 сентябрьдаң мында олғаннар суғҷа чӱзерінең айғазып пастирлар. Бассейн олаңай кӱннерде 7.00 - 21.45 частарда тоғынар. Прайзын спорт ӱлӱкӱнінең алғыстапчам!
Чооғын тоозып, Алексей Лёмин Булакин ӧзек кире сапхан кувалданың паза комплекс клӱзінің танығларын «Тепсей» ФОК-тың директоры Елена Злобинаа читірген.
Хакасия пазының орынҷызы Татьяна Курбатова республика правительствозының ӧрінізін читірген. Аның чооғынаң, мындағ айдас объект орындағы чуртағҷыларға улуғ туза ағылар. Анда спортнаң айғазар прай оңдайлар пар. Аның ӱчӱн Ағбан городтың устаана улуғ алғыс читірерге кирек. «Наа чидіглер сірерге, алнындағы чолларың чарых ползын!» - теен Татьяна Анатольевна.
«Тепсей» комплекстің ізии алнында тартылған хызыл чаламаны хыплааннар Татьяна Курбатова, Алексей Лёмин паза Елена Злобина. Анаң чыылған чонны спорт объектінің істін кӧрерге хығырғаннар. Прайзына бахилы пирілген, гардеробта чылығ кип-азахты суурып, кізілер ікінҷі хадылынзар кӧдірілгеннер.
Мында чоохтирға кирек, бассейн ікінҷі хадылында орныхча. Суғҷа чӱсчең спорт школазында пастағы чылы ӱгренчеткен читі частығ оолағастарның паза хызыҷахтарның тӧрт командазы кӧзідігліг марығ иртіргеннер. Оолағастар кроль оңдайынаң чӱскеннер, хызыҷахтар - учазынаң чадып. Іди эстафетаны «Карапузы» команда утхан.
Директор Елена Злобинаның чооғынаң, суғның чылии +25 градусха тиңнелче, бассейндегі суғ ап-арығ, ол ӱс фильтрҷе иртче. Анда читі частығ палаҷахтарға пір дее хорғыс чох чӱзерге чарир. Ідӧк бассейнде кинектерге чӱзер оңдай пирілче. Коляскалығ кинекті пасхысча кӧдірҷең механизм пар, ідӧк аны коляскадаң суғзар тӱзірҷең механизм тоғынча.
Іди кинек Дмитрий Чешев (учазынаң палығладып, позы пас чӧр полбинча, коляскада одырып чӧрче), бассейнзер механизм полызиинаң тӱзіп, суғҷа чӱскен. Хайди директор искірген, Дмитрийнің суғҷа чӱсчең I спорт разряды пар. Ам ол кинектер аразындағы марығларға тимненче. Ідӧк Дмитрий Турциядағы Босфор пролив кизіре чӱс парыбызарға пӧгін тутча.
«Тепсейде» кип-азах суурҷаң, алыстырҷаң кабинкалар, душевойлар, имҷее алынҷа пӧлік пар. Фитнес-зал улуғ, анда хыстар тренировка иртірчеткенін кӧріп аларға чарир полған.
Пастағы хадылындағы фойеде комплекстің тоғынчатхан тузы, тренажёрлар залынаң, бассейннең, фитнес-залнаң тузаланар абонементтер паазынаңар искіріглер хызылых.
Хайди Алексей Лёмин таныхтаан, ам азылған «Тепсей» хазых пиктеҷең физкультура комплексіне хоза пӱӱл ибіре сиденнелген футбол ойнаҷаң чазы паза столда теннис ойнаҷаң кін тузаланысха кирілер. Городта илееде спорт объекттерін пӱдірер пӧгіннең национальнай проекттер программазына кіріп аларға кирек. Андағ планнар чуртасха кирілзе, Ағбанның чуртағҷыларына спортнаң айғазар улам кӧп оңдай полар. Чонға хазых чуртас апарарына хабазары город администрациязының ӧӧн пӧгіннерінің пірсі полча.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы