УС ИПЧІЛЕРНІҢ ХАЙХАСТЫҒ ТОҒЫСТАРЫ
11.03.2020
Хабарлар
Кӧзідіглер. 6 мартта С.П.Кадышевтің адынаң культура кінінде 8 Мартха чарыдылған «Иң хынчатхан кізілерібіске», «Ус холлығларның хайхастары» паза «Чир-чайаанның тоозылбас-парбас сілии» ӱс кӧзідіг азылған
Таныхтирға кирек, мындағ кӧзідіглер азылчатханына кӧп чон чыылызадыр. Хоосчылар, устар, сомҷылар, олаңай кӧрігҷілер, чыылызып, кӧзідіге сығарылған тоғыстарны паалапчалар.
Кӧрҷең паза паалаҷан хоос тоғыстар аймаана хайхирға ла халча. Ус холлығлар нинҷідең, чібектең чазанҷыхтарны, ибде тузаланҷаң хоос тоғыстарны чайапчалар.
Амғы кӧзідігде 60 устың 200 артиинаң тоғызы араласча. Олар 8 Мартха, Чыл пазына чарыдылчалар. Алтынзархы соох чирлердеңер сомнарны кӧрерге чарир. Кӧзідіге ус ипчілернің тоғыстары сығарылғаннар. Хоосчы паза сомҷы иреннер, чоох тудып, ипчілерні чылығ алғыстааннар.
- Аарлығ чайаачы ипчілер! - алғас сӧстерінең айланған Россия хоосчылары пірігізінің кізізі Виталий Кызласов. - Алғыстапчам сірерні 8 Март ӱлӱкӱннең! Пик хазых паза пӧзік чидіглер алғапчам. Сірер хоос тоғыстар пастыра чонға кӱсті паза сілігні читірчезер. Сығарылған тиксі тоғыстар хайхастығлар!
Сомҷы Олег Ковалев сомнар пастыра тундра сілиин кӧріп аларға чарир тіп искірген. Кӧзідігде Надежда Баркованың паза Ирина Ковалеваның сомнары араласчалар. Олар Новый Уренгойның чуртағҷылары полчалар. Хакасияда соох чирлердегі осхас чир-чайаан нимес нооза. «Хараа полза, полярнай тоозылбас хараа пасталча, кӱн полза, хаҷан даа тоозылбасхадағ. Чайғы хысха, хысхы узун поладыр...» - кибеліс сӧстерінең алтынзархы чирлердеңер чоохталған. Сомнарда порчоларны сыйбапчатхан кӱн сустарын, иртенгі тубанны, наңмыр соондағы ӧзімнерні, таң атчатханын, хоостарнаң
чазалған кӱнні кӧрерге чарир.
«Ус холлығларның хайхастары» кӧзідігде хоостар араласчалар. Ол Чыл пазына чарыдылча. Прай даа тоғыстар пӱӱл, 2020 чылда, чайалғаннар. Хоосчы паза сомҷы Лариса Баканова, компьютер графиказынаң тузаланып, «Соко» адалчатхан чапсых хоосты тимнеп салтыр. Анда хам пӧриин кис салған ипчінің омазы хоосталған.
- «Соко» сӧс нимені таныхтапча? - хоосчыдаң сурыбысхам.
Хоосчы Софья Асочакованың чайаачы ады-солазы «Соко» полча, - нандырған суриима Лариса Баканова. - Піс аннаң хада удаа чайаачы чорыхтарға чӧрчебіс, сағыс-кӧрізібіснең ӱлесчебіс. Пу оманы ағаа чарыдып хоостаам, ідӧк адап салғам.
Кӧзідігдегі хоостарда аклай, кӱн чахайағы, сиңне порчоларны кӧрерге чарир. Ол тоғыстардаң часхының чылығ тынызы сабылчатхан осхас. Философия наукаларының докторы Лариса Анжиганова «Сиихтас чахайахтары» паза «Ландыштар» хоостарны тимнеп салтыр. Россия хоосчылары пірігізінің кізізі Надежда Кобыльцованың улуғ тоғыстары хайығ тартчалар. «Тун пайрам» хооста тынанып одырчатхан ипчілер омалалған полза, «Часхы. Ӧңненіс» тоғыста чиит кеен хыстарны кӧрерге чарир.
Мындағ кӧзідіглерде полған на хоос тоғыс алынҷа хайығ тартча тиирге кирек. Сыйыхтарға декоративно-прикладной искусство тоғыстарын алып аларға оңдай пар. Нинҷідең сіліг монҷыхтар, аймах ойнаҷахтар тимнелгеннер. Ипчілер ағастаң, тостаң, теердең, киистең, тойдан хоос тоғыстарны чайап полчатханнарын мындағ кӧзідіглер чахсы читірчелер.
Автор :
Елена САГАТАЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы