ХАКАС ТІЛІН ХАЙРАЛЛИРЫНАҢАР
13.03.2020
Хабарлар
Баиновтын хығырығлары-2020.
Ирткен неделяда Алтай аймааның Аршаннар аалындағы ортымах школада «Баиновтың хығырығлары-2020» наука-практикалығ конференция ирткен
Ол Хакас тілі чылына паза Илбек Ада чаадағы Чиңіске 75 чыл толчатханына чарыдылған. Аның ӧӧн пӧгіннері - хакас тілін, культуразын тилідері, республика тархынынаңар пілістерні алғыдары, саблығ хакас поэт Моисей Романович Баиновтың чайаачызына хайығ айландырары.
«Баиновтың хығырығлары-2020» конференция 2007 чылдаң сығара иртірілче. Таныхтирға кирек, чыл сай аның иртірілчеткен сині ӧзіп одырча. Пӱӱл ол республика синінде иртірілген, анда 100 азыра кізі араласхан. Олар Ағбаннаң, Асхыс, Алтай, Пии, Ағбан пилтірі, Таштып, Шира аймахтарынаң килглееннер. Ідӧк Хакасияның ӱгредігні тилітчең паза піліс кӧдірчең институдының, писательлер пірігізінің, Литераторлар туразының, Алтай аймааның улуғлар чӧбінің кізілері полғаннар. Хығырығларның араласчыларын Алтай паза Пии аймахтарындағы школаларның ӱгренілері паза ӱгретчілері, ыр-сарыннаң удурлап, ӧріндіргеннер.
Чыылысхан чонзар Казахстандағы Ахмет Байтурсыновтың адынаң Костанайдағы хазна университедінің инновационнай технологиялар кінінің устағызы Сауле Айткужинова паза Костанай облазының Камыстин аймаандағы газетаның ӧӧн редакторы Ермурат Бекмухамедов видео пастыра айланғаны танығлығ полған. Олар хакас паза казах тіллернің чағын полчатханын, тархын-нары пик палғалыс парғанын таныхтааннар паза полған на чонға тӧреен тілні хайраллирына ӧӧн хайығ айландырарға кирек полчатханнаңар сағыстарынаң ӱлескеннер.
Наука-практикалығ конференцияның тоғызы Илбек Ада чааға чарыдылған кӧзідіг азылғанынаң пасталған. Тиксі тӧрт секция тоғынған, оларда саблығ хакас писательлернің чайаачызынаңар, аның чиит тӧлнің чир-сууна хынызын тилідерінде туза полчатханынаңар, хакас тілін паза культуразын хайраллирында хайдағ наа кӧстеглер парынаңар искіріглер полған. Секциялар тоғызы тоозылғанда, аймах мастер-класстар иртірілген. Мында конференция араласчылары хазых ойыннаң танысханнар, тӱктең кӧклӧ идерге ӱгренгеннер, 3D ручканаң хоостааннар.
Баиновтың хығырығларында кӧдірілген сурығлар Алтай аймаанда хакас тілін тилідер тоғысты мыннаң мындар апарарына улуғ хозым полча тізе, саба полбас. Итсе, мындағ улуғ мероприятиелер полған на араласчаа тузалығ полча, аймах организацияларға хада-пірге тоғысты тӱзімніг апарарға полысча.
Автор :
Татьяна КЫШТЫМОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде