ЧОНҒА СЫН ИСКІРІГЛЕР ЧИТІРЕРГЕ
24.03.2020
Хабарлар
Ӱлгӱ. Хакасияның пазы Валентин Коновалов видеоконференц-залда правительство кізілерінең паза муниципальнай пӱдістер пастарынаң чыылығ иртірген
Чыылығның ӱзӱриине суғлар чайылчатханнаңар, ӧрттердең хорғыстаңар, чурт-коммунальнай хоных сферазының тоғызынаңар паза нацпроекттердеңер сурығлар сығарылған. Мероприятиеде араласханнар Хакасия пазының пастағы орынҷызы Николай Миронов, орынҷылары Ирина Войнова паза Татьяна Курбатова, Хакасияның пӱдіріг паза ЖКХ министрі Сергей Новиков, чир-чайаан ис-пайы паза экология министрінің тоғызын толдырчатхан Сергей Глушков, тарифтерҷе паза энергетикаҷа хазна комитедінің устағҷызы Манук Данданян, ГО, ЧС паза ПБ управление пастығы Николай Старков, МЧС-тың Хакасияҷа ГУ-зынын пастығы Александр Мулл, Ростехнадзор паза прокуратура тоғынҷылары, муниципальнай пӱдістер пастары паза даа пасхазы.
Валентин Коновалов коронавирус ағырығнаң палғалыстығ киректердеңер искірген:
- Амғы туста прай хазна ӱлгӱ органнарына хада-пірге иптіг тоғыс апарарға киректелче. Регион кӧдірілген тимненіс режимінде чуртапча. Ағбанда коронавирус ағырыға хаптырған пір ле кізі ілезіне сығарылған, ол имнег туразында тудылча. Прай органнар чонға сын искіріглер читір турзыннар. Чуртағҷыларға хорғыс чох оңдайларҷа тудынардаңар сыбыра искіріңер. Кӧп чон чыылчатхан мероприятиелер иртірерге чарадылбинча. Чалғыс чуртапчатхан улуғ частығларға алынҷа хайығ салыңар.
«Ізіг линия» тоғынча, анда кирек искіріглер аларға чарир. Иді ізеен кізілер ибде одырзыннар, имҷіні хығыртсыннар. Ӱгренҷілер каникулға ызылғаннар, студенттер ибдең ӱгренҷең оңдайға кирілгеннер. Паба-іҷелерге, оңдай полза, палаларын олған садтарынзар апарбасха чарир. Аптекаларда арачыланҷаң маскалар чоғыл, ол кирек федеральнай сурыға айлан парған. Ибде ас-тамах пилетирге кирек чоғыл, складтарда ас-тамах кӧп, прайзына чидер. Садығ тураларында паалар сыныхтағда тудылчалар. Муниципальнай пӱдістер пастарына прай тоғыстарны ӧткін апарарға кирек. Республикада оперативнай штаб тӧстелген, аннаң минустапчам, Татьяна Курбатова орынҷы полча. Муниципальнай пӱдістерде андағох штабтар тӧстеп алыңар.
Татьяна Курбатова ідӧк коронавирус ағырығдаңар чоох апарған. Аның искіриинең, ағырыға хаптырған кізінең палғалыс тутхан ӱс кізі - имнег туразында. Аннаң пір самолетта учуххан пассажирлер ибде карантинде тудылчалар. Коронавирустығ хазналардаң айланған 10 кізі стационарда сыныхтағ иртче, 90 азыра кізі, ибдең сыхпин, карантинде тудылча. Муниципальнай пӱдістер пастарына постарының тоғызында Хакасия пазы чарадиинаң паза ӧӧн санитар имҷі чӧптерінҷе тудынарға кирек. Піс чонның алнында нандырығлығбыс. Имнег учреждениелері тоғынарға тимделер.
Амды чуртағҷылар пасха хазналардаң айланчалар, іди Таиландтаң 200 азыра кізі учух килген, ағырығлар чоғыл. Харатастағы А.И.Лебедьтің адынаң реабилитация кінінде ағырчатханнар полбас, ибде полхаң оңдай чох кізілер анда поларлар. Аннаңар ӱрӱгерге кирек чоғыл. Олғаннар каникулға ызылғаннар. Улуғлан парған, ағырчатхан кізілерге хорғыс пар. Иблеп чӧріп, чоннаң чоох алызарға кирек. Пірдеезі ӱрӱкпезін. Социальнай сетьтерде тайма искіріглер кӧп.
Коронавирустаңар чоохтар тоозылғанда, Николай Старков суғлар чайылар паза ӧрттер сығарынаң хорғыстардаңар искірген. Аның чооғынаң, амды піс хар хайылчатхан тустың пастағы чардығын кӧрчебіс. Абазада, Ағбан пилтірі, Асхыс, Алтай аймахтарында чир участоктарына паза ораларға суғ кіргені таныхталған. Алтай аймаанда суғны тохтадарға «Майрыхский» разрез техниканаң хабас пирген. Хубачар паза Абаза хыриндағы пусты чара чачырадарға тимненчелер.
Республикадағы чазыларда алты ӧрт таныхталған. Орджоникидзе аймаанда ӧрттің чалбаа пір километрге читкен. Ӧрттерні ӱзірерге 354 ӧме тӧстелген, 394 техника тоғынарға тимде. Пу сан пылтырғызынаң ікі хати кӧп, че аннаң даа тӱзімніг тузаланминчалар. 1 апрельдең республикада ӧрттердең тоғыр режим кирерге пӧгінчебіс. Пос кӧңнінең ӧрт ӱзірҷең дружиналарға ахча позыдылар. Амды муниципальнай пӱдістернің тимненізі сыныхталча, пӱкӱлее алза, прай тоғыс сыныхтағда тудылча.
Сергей Новиков ЖКХ сферазы хайди тоғынчатханнаңар искірген. Аның чооғынаң, прай система олаңай режимде тоғынча. Ікі муниципальнай пӱдіске - Шира паза Асхыс аймахтарына - алынҷа хайығ салылча. Котельнайларға хара тас читкіҷе тартылча. Ол 14 кӱнге чидер иде пилетелерге кирек. Коммунальнай полызығларнаң тузаланған ӱчӱн тӧлеглерні чыыры 70 - 90 %-ке тиңнелче. Пу тоғыс уйан апарыл сыхты, іди Ағбанда тӧлеглер 100 % чыылҷаң полза, амды 87 ле %. Тӧлеглер иң тӧбін чыылчалар Абазада паза Боград аймаанда - 70 %. Ирткен ікі неделяа министерствозар алты айланыс кірген: Ағбаннаң - тӧрт, Харатастаң - ікі. Читпестер табырах тӱзеділген. Амды котельнайларға хара тас тартар наа чӧптезіглер идерге кирек. Тоғынҷыларға чал ахчазын тӧлирінҷе алымнар хызырылча. Тураларға чылығ пирҷең тус тоозылча, пазағы соохтарға тимненіп пастирға кирек.
Министр чооғын тоосхан соонда, муниципальнай пӱдістер пастары постарының чирлерінде тоғыс хайди апарылчатханнаңар сан пиріс тутханнар.
Ирина Войнова национальнай проекттерні регионда чуртасха кирер сурығларны кӧдірген. Хайди ол таныхтаан, прай муниципалитеттерге бюджеттеңер закон хоостыра ікі миллиард салковай читірілген. Контракттар, тізең, пір миллиард азыра ла салковайға иділ парған. Пӱӱл пір дее контракт иділбеен. «Демография» нацпроектче Шира аймаанда олған сады пӱдірілген, че оборудование ағыларға, аны турғызарға чӧптезіг иділбеен. Алтай аймаанда футбол ойнаңан чазы идеріне контракт чоғыл. Туралар аразын иптир программаҷа чӧптезіглер иділбинче. Муниципалитеттер пу тоғысты табырах толдырарға маңзырабинчатсалар, ахча пасха кӧстеглерге ызылар. Пу сурыға Валентин Коновалов хайығ айландырған.
- Пӱдіріге, чолларға теелчеткен национальнай проекттерҷе контракттарны 31 мартха теере идіп аларға кирек. Андағ тоғысты сӧӧ тартчатхан муниципалитеттерні хатығлирбыс. Оборудование аларын сӧӧ тартпаңар. Амды ӧрттер сығарынаң хорғыстығ тус чағдап килді. Ааллар ибіре минерализованнай полосалар тартыңар. Ідӧк пазағы соохтарға амох тимненіп пастирға кирек, - теен Хакасия пазы.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы