РЕСПУБЛИКА АЙМАХХА ПОЛЫЗАР
27.03.2020
Хабарлар
Тоғыс чорығы. Хакасияның пазы Валентин Коновалов тоғыс чорығынаң Боград аймаанзар чӧрген. Анда ол аймахтың депутаттар чӧбінің сессиязында араласхан, ідӧк чуртағҷыларнаң тоғасхан
Хакасияның пазы Валентин КОНОВАЛОВ Боград аал чуртағҷызынаң тоғасча БОГРАД АЙМААНЫҢ ДЕПУТАТТАР ЧОБІНІҢ ТЕЕСТЕГІ СЕССИЯЗЫ 24 МАРТТА ИРТКЕН.
АНДА АРАЛАСХАННАР ХАКАСИЯНЫҢ ПАЗЫ ВАЛЕНТИН КОНОВАЛОВ, БОГРАД АЙМАА ПАЗЫ СЕРГЕЙ КЛИМЕНКО, БОГРАД АЙМААНЫҢ ДЕПУТАТТАР ЧОБІНІҢ КНЕЗІ НИКОЛАЙ КАРПИНСКИЙ, ДЕПУТАТТАР ЧӦБІНІҢ ХАЧЫЗЫ ОЛЬГА ЗАБОЛОТНОВА ПАЗА АЙМАХТАҒЫ ААЛ ЧӦПТЕРІНІҢ ПАСТАРЫ. СЕССИЯНЫҢ ТОҒЫЗЫН НИКОЛАЙ КАРПИНСКИЙ АПАРҒАН.
Россияның паза Хакасияның гимннері толдырылған соонда (ноға-да олар ікізінең читіре толдырылбааннар, аннаңар хайди-да изі чох пол парған. - Авт.) сӧс Хакасия пазына пирілген.
- Сессия ӧӧнінде Боград аймаа пазының ирткен чылдағы тоғыс салтарларынҷа сан пиріс тударына чарыдылча. Аймахтың тоғызында читпестер дее, чидіглер дее таныхталған. Андағ кирек прай республикада полған. Ӧӧні - тураларда чылығ, чарытхы полғаны. Боград аймаа хысхыны амыр иртірібіскен. Прай аал чӧптері Ростехнадзордаң тимненіс паспорттарын алғаннар, республикада мындағ чидіге Боград аймаа ла читкен.
Амды пазағы чылығ пирер тусха тимненерге кирек. Сірер аны пазох чахсы иртіп парыбызарына ізенчем. Пілдістіг, суғ, чылығ пирҷең сетьтер иргілен парғаннар, піреезінің иргіленгені 80 процентке читче. Че республика сірерні полызығ чох артыспас, хайди даа хабазарбыс. Аймахха республика программаларында ӧткін аралазарға кирек.
Амды сӧп-сапты тартар тоғыста реформа иртірілче. Сірернің аймааңарда сӧп-сапты тартар полигон чоғыл, андағ объекттер хонҷых аймахтарда орныхчалар. Чуртағҷылар андағ полызығлар ӱчӱн турғызылған пӧзік пааларға хоптанчалар. Чир-чайаан ис-пайы паза экология министерствозына пу киректі сыныхтағда тударға кирек. Пааларны олаңай ла кӧдірерге чарабас.
Аймахта аал хонии сферазында халғанҷы чылларда хомай нимес кӧзідімнер таныхталча. Тоғынҷаң наа орыннар тӧстелче, пӱкӱлее алза, агропромышленность комплексі чахсы тиліпче. Прайзына улам чахсы тоғыс апарарға кӱстенерге кирек.
Национальнай проекттерні чуртасха кирер тоғыста аралазыңар. Андағы программаларға кіріп алзаңар, аймахсар инвестициялар хоза кірер. Республикада нацпроекттерҷе культура туралары, школалар, спорт объекттері пӱдірілче. Сірерге правительствоның прай министерстволары хабазарлар, андағ полызыгнаң чахсы тузаланыңар.
Піс ам ӧрттер сығарынаң хоргыстығ тусха кірчебіс. Аймахта ӧрт сығарбас тоғыс апарарға кирек. 2015 чылда республикада хайдағ чобағлар полғанын прайзы пілче. Ааллар, предприятиелер ибіре хыра тарт салыңар, хуруғ ӧзімнерні тузында арығлап турыңар. Ирткен тынағ кӱннері ол тоғыс чахсы апарылбинчатханын кӧзіткен. Ағбан пилтірі аймаандағы чазыларда улуғ ӧрттер полған. Прай ниме сірернің тимненізіңернең палғалыстығ полар, - чооғын тоосхан Валентин Коновалов.
Аның соонда сессия тоғызы узарадылған, трибуназар сан пиріс тударға Боград аймааның пазы Сергей Клименко сыххан. Ол аймахтың социальнай, экономика чуртазындағы полған на отрасльда хайдағ тоғыс апарылғаннаңар искірген, хайдағ парыстар кіргеннеңер, нинҷе хорадығлар полғаннаңар саннар кӧп адаан. Аның чооғынаң, парыстар 439 миллион салковайға тиңнелген, хорадығлар 447 миллион салковай полған. Ӧӧн хайығ салылған чал ахчазын, коммунальнай полызығлар ӱчӱн тузында тӧлиріне, ідӧк социальнай полызығларны тузында читіреріне.
Хайди Клименко таныхтаан, Боград аймаа - аал хониинаң айғасчатхан орын. Киректер тың на чахсы парбинча. Тоңастығлар таариры хызырылча. Мал тударын, сӱт аларын тилідерге кирек. Хай пірее отрасльларда чидіглер пар. Ирткен соохтарда Боград аймаанда пастағызын на улуғ сайбағлар таныхталбаан.
Сергей Клименко сан пирістіг улуғ чооғын тоосханда даа, депутаттар, аны трибунадаң позытпин, сурығлар пиргеннер. Депутаттарны орындағы училищенің ӱлӱзі паза транспорт сурығлары сағыссыратхан. Кӧзідімге, Сарығ хас аалдаң аймах кінінзер дее, Ағбанзар даа парып аларға сидік. Ноябрьдаң автобус чӧрбинче. Ідӧк аал пастары чииттерні, прай чонны даа физкультуранаң паза спортнаң айғазарға тартар сурығны кӧдіргеннер.
Кӧзідімге, Знаменка аал чӧбінің пазы Сергей Слободянның чооғынаң, Боград аймаа республикада чалғыс ла аймах полча, хайзын-да хазых пиктеҷең физкультура комплексі тоғынминча. Аннаңар чоох хаҷаннаң апарылча, че амға теере аймахта арған тӧзегліг футбол ойнаҷаң улуғ даа, кічіг дее чазы чоғыл.
Ағаа Хакасияның пазы нандырған:
- Ноға мындағ сурығ сыхча? Аймах кирек пічіктерні, чахсы тимнеп, піссер ыссын. Піс аны правительство синінде кӧрерге тимдебіс. Ол чӧптерні национальнай проекттерге киріп аларга кӱстенербіс. Іди пу сурығ пӧгіл парар. Пу тоғыс аймахтаң сығарга кирек.
Сурығлар тоозылғанда, Валентин Коновалов килген чуртағҷыларнаң администрация туразында тоғасхан. Оларны сағыссыратчатхан сурығлар ӧӧнінде аалның істін иптиріне, олғаннарға ойнаҷаң орыннар чоғылына теелгеннер. Кӧзідімге, аал чуртағҷызы Надежда Ливанованың чооғынаң, олғаннарнаң хада чӧрҷең ікі ле орын пар - аалның ортызы паза Чиңіс паркы.
Валентин Олегович пу сурығны хайди пӧгерін чарытхан:
- Аал істін иптир тоғыс апарарға марығ иртірілер. Аның салтарынңа таллалған организация, чахсы кӱннер турза, пӱдіріг тоғыстарын толдырып пастир. Хакасияның пӱдіріг паза ЖКХ министерствозы ол сурығлар хайди толдырылчатханын ідӧк сыныхтағда тудар.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде