ПРЕЗИДЕНТ ЧОНЗАР АЙЛАНҒАН
27.03.2020
Хабарлар
Кӱн сурии. 25 мартта Россия президенті Владимир Путин телевидениеӌе чонзар айланған. Хазна устағӌызы айланызында коронавирус тарапчатханын тохтадар пӧгіннең килер неделяны тынанӌаң ит саларға чарадығ алғанынаңар искірген
Россияның аарлығ чуртағҷылары! Аарлығ арғыстар! Сірерзер пісті прайзыбысты сағыссыратчатхан сурығӌа айланчам. Піс кӧрчебіс, хайди тилекейде коронавирус тарапчатханы улғаатча, - піди чооғын пастаан хазна устағӌызы.
Владимир Путиннің искіриинең, Россия, килістіре оңдайларнаң тузаланып, пу чуғынӌах ағырығның тарирын тохтадарына сағам сыданча. Че олох туста таныхтаан: орныхчатханы хоостыра пістің хазна пу хорғыстаң хыйа пол полбас.
Хости хазналарда ағырығ тың тарапча, аннаңар ағырығны толдыразынаң тохтатчаң оңдай чоғыл. Президент чуғынӌах ағырығ тарирын тохтадар пӧгіннең килер неделяны, 28 марттаң, суббота кӱннең, 5 апрельге, позырах кӱнге, теере, прай Россияда тынанӌаң ит саларға чарадығ алылғанынаңар искірген. Олох туста анзы тоғынӌыларның чал ахчазына теелбес, ахча оларға тоғынған чіли тӧлелер.
Чуртасха кирек прай структуралар, ол санда имнег учреждениелері, аптекалар, садығ туралары, ахчанаң тоғынчатхан учреждениелер, транспорт паза прай синдегі ӱлгӱ органнары тоғызын тохтатпастар.
- Хати таныхтапчам, узун тынағ кӱннері ағырығ табырах тарапчатханын тохтадар пӧгіннең кирілче, - искірген Владимир Путин чонзар айланызында. Хазна устағӌызы чонға пу кӱннерде ибде поларға чӧп пирген.
- Хазнаның прай чуртағӌыларынзар айланчам. «Мағаа ол теелбес!» тіп сағысха тудынмаңар. Ол полған на кізее теелерге айабас. Андада кидеркі хазналарның кӧбізінде, Европада паза тиңіс азыра полчатхан ниме піссер дее чит килер. Прай чӧптерні хайди даа толдырарға кирек, - айланған ол чонзар.
Анзынаң пасха, Владимир Путин коронавирус ағырығның тарапчатханын тохтадар пӧгіннеңӧк Конституцияа кирер тӱзедіглерӌе «тиксі чон ӱн пирізі» 22 апрельде иртпес тіп чарлаан. Конституциям ӱн пирісті хаӌан иртірерінӌе чарадығ соонаң алылар осхас.
Ідӧк Россия президенті социальнай арачыланыс сурығларынӌа хайдағ чарадығлар алылғанын искірген.
Пастағызы. Прай социальнай пособиелер паза льготалар чағынғы алты айда пір дее справкалар чох узарадыл турарлар, пір дее чирзер чӧрерге кирек чох полар. Илбек Чиңістің 75 чылына ветераннарға паза тыл істенӌілеріне кӧрілген тӧлеглер, хайзылары май ӱлӱкӱннеріне теере пирілерге кирек полғаннар, апрельдӧк пирілер.
Ікінӌізі. Палалығ сӧбірелерге хабазығ полар. Президент іӌе капиталын алар праволығ полчатхан прай сӧбірелерге чағынғы ӱс ай изере, ӱс часха теере полған на кічіг пала ӱчӱн, ай сай пизер муң салковай хоза тӧлирге чӧпнең сыххан.
Ӱзінӌізі. «Больничнайда» пол парған алай тоғызын чідір салған кізілерге полысчаң оңдайлар кӧрілер. Хазна устағӌызы стажы паза чал ахчазы асхынах полчатхан тоғынӌыларға больничнай листче тӧлеглер уғаа тӧбін пол парчатханын таныхтаан. Аннаңар ол тӧлеглерні айдағы пір МРОТ-таң тӧбін нимес ит саларға пӧгін турғысхан. Ол норма пу чыл тоозылғанӌа тоғынар тіп чарлаан президент. Тоғыс чохтарға тӧлеглерні ідӧк МРОТ синіне читіре кӧдір саларлар.
Тӧртінӌізі. Президент банктарға потребитель паза ипотека кредиттерінӌе «каникул» пирерге чӧп пирген. Чоох парча сидік чуртас оңдайларына кір парған, айдағы парыстарын 30 %-тең кӧпке чідірген чуртағӌылардаңар.
Владимир Путин алынҷа хайығ салған кічіг паза ортын бизнеске хабазарына. Оларны НДС-таң пасха прай налогтарны тӧлирінең чағынғы алты айға позыдарға чӧп пирген. Чарыда чоохтаза, оларға налогтарны тӧлирі соонзар чылдырылча.
Паза хазна устағӌызы Россиядаң хырығ озаринзар парчатхан парыстарӌа чарадығ алған. Проценттер паза дивиденттер кӧрімінең офшорларзар парчатхан прай ахчаларға налог ставказын кӧдірібізерге чахығ пирген.
- Амғы туста андағ ахчаларның ікі ӱс чардығына, сынынаң чоохтаза, ол алынҷа кізілернің парыстары, аймах-пасха схемаларнаң тузаланған сылтаанда, налог ставказы ікі проценттіг ле пол парча. Олох туста чуртағӌылар постарының улуғ нимес тее чал ахчазынаң парысха налогты 13 проценттіг тӧлепчелер. Пу ниме, нымзах чоохтаза, орта нимес, - таныхтаан Владимир Путин.
Президент постың парыстарын дивидент кӧрімінең хырығ озариндағы счеттарынзар ысчатханнарға ол дивиденттерге налог ставказын 15 проценттіг ит саларға пӧгін турғыс салған.
Анзынаң пасха банксар салған ахчазынаң парысты 1 миллион салковай азыра алчатхан чуртағӌыларға, чоох парча салылған ахчадаңар нимес - проценттердеңер ле, 13 проценттіг парысха налог турғызылар. Андағ налог тилекейдегі хазналарның кӧбізінде пар, пістің хазнада андағ парысха налог чох полған.
Автор :
Kremlin.ru сайттаң алып тимнеен Альберт ТОЛМАШОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы