РУСАЛ РЕСПУБЛИКА ЧУРТАЗЫНДА ӦТКІН АРАЛАСЧА
08.04.2020
Хабарлар
Чӧптезіг. РУСАЛ паза Хакасия правительствозы 2020-2023 чылларға чуртас-экономика саринаң пірге тоғынардаңар чӧптезігде хол салғаннар
ХАКАС РЕСПУБЛИКАНЫҢ ПАЗЫ ВАЛЕНТИН КОНОВАЛОВ ПАЗА РУСАЛ КОМПАНИЯНЫҢ РЕГИОН ПОЛИТИКАЗЫНҶА, ӰЛГӰ ОРГАННАРЫНАҢ ХАЙЫЗЫҒЛАРҶА ВИЦЕ-ПРЕЗИДЕНТІ ЕЛЕНА БЕЗДЕНЕЖНЫХ, ВИДЕОПАЛҒАЛЫС ТУДЫП, 2020-2023 ЧЫЛЛАРҒА ЧУРТАС-ЭКОНОМИКА САРИНАҢ ПІРГЕ ТОҒЫНАРДАҢАР ЧӦПТЕЗІГДЕ ХОЛ САЛҒАННАР. ПУ ЧЫЛДА ЛА РУСАЛ ЧӦПТЕЗІГ ХООСТЫРА ХАКАСИЯНЫҢ ӰГРЕДИИН ТИЛІДЕРІНЕ 103,4 МИЛЛИОН САЛКОВАЙ ПОЗЫДАР. АХЧА «ӰГРЕДІГ» НАЦИОНАЛЬНАЙ ПРОЕКТТІҢ МЕРОПРИЯТИЕЛЕРІН РЕГИОНДА ЧУРТАСХА КИРЕРІНЕ, ІДӦК САЯНОГОРСКТАҒЫ 6 № ШКОЛАДА ТИКСІ ТЫХТАҒ ТОҒЫСТАРЫН ТООЗАРЫНА ПАРАР.
РУСАЛ-ның ахчазына Хакасияда чыл сай школалар паза олған садтары тыхталча, ӱгредіг учреждениелерінде инфраструктура паза оборудование наачылалча, кӧп хадыллығ туралар хыринда олған площадкалары турғызылча, наука фестивальлары паза пасха даа мероприятиелер иртірілче. Прай ол ниме чуртас синін паза ӧсчеткен тӧлнің, ол санда компанияның таңдағы тоғынҷылары полҷаң палаларның, ӱгредиин кӧдіреріне кӧстелген. 2020 чылда РУСАЛ компания позытхан ахчаа республиканың 37 ӱгредіг учреждениезінде кабинеттер тыхталар, оларда «Ӧзіс точказы» саннығ паза гуманитарнай профиль кіннерін тӧстир ӱчӱн. Паза 76 ӱгредіг учреждениезінде амғы тусха килістіре саннығ искіріглер кіннерін тӧстиріне информатика кабинеттерін тыхтиры кӧрілче. Тыхтағ тузында учреждениелерде ізіктер, чарытхы проводтары алыстырылар, кабинеттер істі нааҷылалар паза пасха даа тоғыстар толдырылар.
Кіннер тӧстирінің кӧстее - ӱгренҷілерге амғы тусха килістіре пілістер паза «Технология», «Математика паза информатика», «Физическай культура паза хорғыс чох чуртас тӧстеглері» предметтерҷе кӧнігістер пирері".
- РУСАЛ-ның устағ-пастаана республиканаң удур-тӧдір тузалығ хайызығлар тутчатхан ӱчӱн алғызым читірчем. Хакасияның чуртазында ӧткін араласчатханнарыңны, республиканың тилізіне кирек проекттерге ахчанаң полысчатханнарыңны піс пӧзік паалапчабыс. Пістің тӱзімніг пірге тоғызыбыс мыннаң мындар узарадыларына ізенчем, - таныхтаан Валентин Коновалов тоғазығ тузында.
Паза пу чӧптезіг хоостыра РУСАЛ Саяногорсктағы 6 № школаның ікінҷі корпузында тиксі тыхтағ тоғыстарын тоозарына ахча ызар. Ол тоғыстар пасталығ класс ӱгренҷілерін пастағы сменада ӱгрет турар кӧстегнең иділче. 2018-2019 чылларда компания ол учреждениеде тыхтағ тоғыстарын толдырарына 60 миллион салковай позытхан.
- РУСАЛ компания республиканың чуртазында хаҷан даа ӧткін аралас турған, - таныхтаан Елена Безденежных. - Кӧзідімге, ирткен чылда правительствонаң чӧптезіг иткені хоостыра компанияның ахчазына Хакасияның ӱгредіг объекттерінде хорғыс чох системалары турғызылған. Чағынғы чылларда, социальнай сфералардағы программаларны чуртасха кирерінең пасха, піс республика правительствозынаң пасха даа кӧстеглерҷе пірге тоғынарға пӧгінчебіс.
Автор :
Хакас Республика пазының аппарады
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде