ӦӦНІ - ӰГРЕДІГ ПРОГРАММАЗЫН ТУЗЫНДА ИРТЕРІ
10.04.2020
Хабарлар
Ӱгредіг. Пу наадаң пістің хазнада «Минің школам онлайнда» платформа тоғынып пастады. Анда Россиядағы ӱгренҷілерге, ол санда Интернет чох орыннарда чурттығларға, тиксі ӱгредігліг программаны ибдең сығара иртібізерге чарир
ХАЙДИ ОЛ ЧАРЫТХАН, ОЛ ОРЫНДА ӰГРЕТЧІЛЕРГЕ ПАЗА 1 - 11 КЛАССТАРДАҒЫ ӰГРЕНҶІЛЕРГЕ ИБДЕҢ СЫҒАРА ПІЛІС ПИРЧЕТКЕН ПАЗА АЛЧАТХАН ТУСТА ЧАХСЫ КАЧЕСТВОЛЫҒ МАТЕРИАЛЛАРНАҢ ТУЗАЛАНАР ОҢДАЙ ПИРІЛЧЕ. МАТЕРИАЛЛАР ПРАЙ ФЕДЕРАЛЬНАЙ СИНДЕГІ КИРЕКСІНІСТЕРНІ ТОЛДЫРЧАТХАН УЧЕБНИКТЕР ХООСТЫРА ТИМНЕЛГЕННЕР. АНДА ІДӦК ӰГРЕТЧІЛЕРГЕ, ІҶЕ-ПАБАЛАРҒА ПАЗА ӰГРЕНҶІЛЕРГЕ, ОЛ-ПУ СУРЫҒЛАР СЫҒЫС КИЛЗЕ, СПЕЦИАЛИСТТЕРНЕҢ ТӦРЕМІЛ ПАЛҒАЛЫС ПОЛАРЫ КӦРІЛЧЕ. ПАЗА «МИНІҢ ШКОЛАМ ОНЛАЙНДА» ӰГРЕДІГ ПЛАТФОРМАЗЫНАҢ ИНТЕРНЕТ ТЕЕ ЧОХ ЧИРЛЕРДЕ ТУЗАЛАН ПОЛАРЛАР!
- Платформа полған на сай нааҷылалар, андар наа курстар кирілер. Ӧӧні - олғаннарға ӱгредіг программазындағы предметтерҷе пілістерні тузында пирері. Сағынчабыс, мыннаң мындархы чуртазыбыста ол уламох тың кирексіністе полар, - теен министр.
«Просвещение» компания ӧмезінің президенті Михаил Кожевниковтың искіриинең, платформазар сығарылған материалларны кӱстіг авторлар паза методисттер тимнееннер. «Российский учебник» корпорацияның ӧӧн редакторы Руслан Гагкуев пу четвертьке кӧрілген ӧӧн предметтерҷе ӱгредіг материалларынаң ідӧк пос тузаланарға чарир теен.
Россияның просвещение министрі Сергей Кравцов «Ибдегі час» онлайн-марафонда ирткен андағох онлайн-конференцияда хазнадағы чонны сағыссыратчатхан пасха даа сурығларға нандырығлар пирген.
- ЕГЭ-даңар чоохтаза, проекттің кӧрілген расписаниезі хоостыра, пӱӱл пірге хазна сыныхтағлары 8 июньнаң пасталарлар. Хайдағ-да алызығлар полза, хоза искіріглер хайди даа пирлер, - теен министр Сергей Кравцов.
Паза устағҷы кізі таныхтаан: ол-пу технологияларнаң тузаланып, чон палазына ибдең сығара піліс пирчеткен ӱгретчілернің чал ахчазы хызырылбас.
- Сынап андағ киректер пол парғанын піл салзаңар, сах андох просвещение министерствозынзар айланыңар. Мин ол сурығны позым хайығда тударбын, - айланған ол ӱгретчілерзер.
Тиксі чоохтаза, хазнадағы ӱгредіг учреждениелері специалисттеріне, іҷе-пабаларға ибдең сығара ӱгредігдеңер толдыра искіріглерні министерствоның сайтында таап аларға чарир. Ідӧк «ізіг линия» хараа-кӱнӧрте тоғынча. Аның номері мындағ: 8(800) 200-91-85.
Хакасияның ӱгредіг паза наука министерствозынзар телефонҷа, сығдырадып, сурығлар пирерге чарир. Іди специалисттер, республика чуртағҷыларына нандырып, понедельниктең пятницаа теере 9.00 -13.00, 14.00 - 18.00 часта тоғынчалар.
Россияның просвещение министерствозының «Ибдегі час» онлайн-марафоны кӱннің иртче. Пасталғаны 10.00 часта (Москва тузынаң). Ол азых эфирлер ідӧк іҷе-пабаларға, ибдең сығара піліс алчатхан ӱгренҷілерге паза студенттерге полызар пӧгіннең апарылчалар.
Автор :
Марина СЕРГЕЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде