САЙБАҒҶЫЛАРҒА ШТРАФТАР САЛАРҒА
10.04.2020
Хабарлар
Ӱлгӱ. Хакасия правительствозындағы штабтың теестегі чыылиинда регионда эпидемиянаң палғалыстығ киректер, имнег учреждениелерінің тимненіс сині, прай ведомстволарның хада-пірге тоғыс салтарлары паза коронавирус ағырығны таратпас хоза хайдағ тоғыс апарары ӱзӱрілген
Хайди Хакасия пазы Валентин Коновалов таныхтаан, республиканың имнег тураларының имҷілеріне алынҷа хайығ айландырарға кирек, олар ағырчатханнарның паза хада тоғынчатханнарның хазиина хорғыс ағылбас ӱчӱн. Ӧӧн имҷілерге имнег тоғынҷыларының хазиин хатығ сыныхтағда тударға чахығ пирілген.
- Пістің республикадағызынаң илееде сидік эпидемиялығ регионнарда отпускта полған прай имнег тоғынҷылары хайди даа ікі неделя карантинде поларға киректер, - теен Валентин Коновалов.
Ідӧк Хакасияның пазы іҷе поларға тимненчеткеннернің, улуғ частығларның паза чазылбас ағырығлығ кізілернің хазиин алынҷа хайығда тударға кирек полчатханнаңар чоохтаан.
Профилактика тоғызынаңар чоох апарза, таныхтирға кирек, халых орыннарында, ӧӧнінде туралар подъездтерінде, дезинфекция хайди апарылчатханы хатығ сыныхтаға алылған. Прай ла устапчатхан компаниялар ол тоғысты чахсы апарбинчалар, піреезі ол тоғысха пір дее хайығ салбинча. Коммунальщиктерге аны толдырарға пічіктер ле пирілче, оларны ахчанаң хатығлир полномочиелер пӱдіріг паза ЖКХ министерствозының чоғыл.
- Чидер оларны сизіндір чӧрерге, штрафтар саларға кирек, - хығырған Валентин Коновалов.
Хакасия пазының чахиинҷа чуғынҷах ағырығны чох идер правилолар хайди толдырылчатханын сыныхтағда тудар полномочиеліг орган табылар. Ол чағынғы туста ӧнетін пічікнең тыыдыл парар. Таныхтирға кирек, устапчатхан компанияларға улуғ штрафтар полары кӧрілче - 100 - 300 муң салковай. Ідӧк улуғ штрафтар салылар чонны тартчатхан коммерческай транспорт ээлеріне, хайзылары санитария-эпидемиология правилоларын сайбапчалар.
Ибдең сыхпас режим хайди толдырылчатханы кӱннің сай сыныхтағда тудылча. Аны сайбаан олаңай кізілерге 15 - 40 муң салковай штраф салылча. Хакасияда андағ сайбағҷыларға 150 азыра протокол пазылған.
Хакасияда коронавирус ағырығнаң палғалыстығ киректерҷе прай официальнай искіріглер сығарылча регионның сайтында: стопкоронавирус.хака-сия.рф.
Автор :
Хакасия пазының пресс-службазы
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде