ЛЬГОТАЛЫҒ ИМНЕР АЛЧАТХАННАРНЫҢ САНЫ АЛҒЫДЫЛАР
10.04.2020
Хабарлар
Ӧӧркі Чӧп. Ӧӧркі Чӧп президиумы 8 апрельде теестегі чыылиин иртірген.
Хайди искірче Ӧӧркі Чӧптің хабарлар пӧлии, президиумдағылар пу чыылығда льготалығ имнер алчатхан кізілернің санын алғытчатхан закон проектін ӱзӱрібіскеннер. «Хакас Республика чуртағҷыларының хазиин хайраллаҷаң сферадағы алынҷа хайызығларны оңдайлирдаңар» республика законынзар алызығ федеральнай законодательство алыс парған сылтаанда кирілчеттір.
Закон проекті хоостыра региондағы льготалығ имнер алчатханнарның санынзар чуртастарына хорғыс ағылчатхан паза арам учурапчатхан чӧреес ағырығларнаң ағырчатхан кізілерні хоза кир салары кӧрілче. Оӧркі Чӧптің хазых хайраллирынҷа паза социальнай политикаҷа комитедінің устағҷызы Евгений Молостовтың искіриинең, законзар алызығ киргені ол категорияа кірчеткен кізілерге федеральнай бюджет ахча полызиинаң кирек имнер аларға паза аарлыға тур парчатхан имнегні иртерге оңдай пирер.
- Оларға киректелчеткен имнер уғаа аарлыға турчалар, - таныхтаан Оӧркі Чӧп кнезі Владимир Штыгашев. - Чылда пір кізее ле нинӌе-де чӱзерлеп муң кирек пол парча. Аннаңар мындағ арам учурапчатхан ағырығларнаң ағырчатханнарға ікінҷілес чох хабас пирерге кирек.
Президиумдағылар, закон проектіне хабазып, аны чағынғы сессияның ӱзӱриине сығарарға чарат салғаннар. Теестегі сессия 24 апрельде иртер тіп пӧгінілче. Коронавирус тарапчатханын тохтадар кӧстегнең пу сессияа хығыртылар кізілернің саны хызыра полар. Хайди таныхтаан Владимир Штыгашев, апрель ай пасталғаннаң Россияның чибіргі субъектінде закон сығарҷаң ӱлгӱ органнары сессияларын иртірібіскеннер. Пілдістіг, олар прайзы санитарнай кирексіністерге тудынып иртірілгеннер.
Оӧркі Чӧп президиумы пу чыылығда ідӧк идінҷектерге хабасчаң федеральнай закон проектіне ӱндезер сурығны кӧрібіскен. Закон проектін Россия правительствозы тимнептір. Аның кӧстее - кічіг паза ортын бизнеске хабазары, пос киреенең ахча тоғынчатханнарны санға алыларға кӧӧктірері.
Кӧзідімге, пос киреенең ахча тоғынып алчатхан кізілерге андағох хабазығ, хайдағ пирілче кічіг паза ортын бизнеске, пир турары кӧрілче. Иң не пурун кредит, гарантия алай пасха даа ахчалығ хабазығ, искіріг-чӧптер пирҷең паза ӱгретчең оңдайлардаңар чоох парча. Ідӧк олар ӧнетін льготалығ налог режимінең тузалан турарлар - «Профессиянаң палғалыстығ парысха налог».
Закон проектінің авторлары мындағ режим кирерінҷе эксперимент ирткен чылдаң сығара Россияның тӧрт субъектінде (Москвада, Москва паза Калуга областьтарында, Татарстан Республикада) чуртасха тӱзімніг кирілчеткенін таныхтапчалар. Россияның федеральнай налог службазының искіриинең, 2019 чылның октябрьына «профессиянаң палғалыстығ парысха налог» налог режимінең тузаланарына санға алылған кізілер 195 муңны ас парыбысхан. 2020 чылдаң пу льготалығ налог режимін кӧместең пасха даа регионнарда киріп пастирға пӧгінчелер.
Пу закон сығарҷаң пастағ хоостыра сағыс-кӧрізінең ӱлескен Оӧркі Чӧптің экономика политиказынҷа, промышленностьча, пӱдірігҷе паза транспортча комитедінің кнезі Василий Шулбаев.
- Льготалығ налог режимы кирерінҷе эксперимент пос киреенең ахча тоғынчатханнарның саны улуғ полчатханын кӧзіткен, - таныхтаан ол. - Че олар кічіг паза ортын бизнес субъекттерінің санынзар кірбинчелер. Хазна пу категориядағы идінҷектерге хабазығ пирерін кирексіпче, аннаңар оларны алынӌа налог режимінең тузаланчатханнарның санына кирче. Піске кічіг паза ортын бизнес субъекттерінің санын ӧекірібізерге ле нимес, че ідӧк конкуренцияны тилідібізерге кирек. Пӱӱнгі кӱнде пар идінҷектер, хайзылары тоғынчалар паза налог тӧлепчелер, че пар ідӧк тоғынчатхан, олох туста налог тӧлебинчеткеннер. Ол - «кӧлектегі бизнес», мындағлары хазна хабазиин ал полбастар.
Автор :
Тимнеен Альберт ТОЛМАШОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде