РАДИОЛОГИЯ КОРПУЗЫНЫҢ ПӰДІРИИ ТОХТАДЫЛБИНЧА
14.04.2020
Хабарлар
Нацпроект. Коронавирус наа чуғынҷах ағырығ тарапчатханда, тиксі хазнада ибдең сыхпас режим кирілген дее полза, национальнай проекттерҷе апарылчатхан пӱдіріг тоғыстары тохтадылбинчалар. Андағ улуғ паза кирек пӱдіріглернің санында - республиканың онкология диспансерінің радиология корпузы
РАДИОЛОГИЯ КОРПУЗЫНЫҢ ПӰДІРИИ ПЫЛТЫР ЧАЙҒЫЗЫН «ХАЗЫХ ХАЙРАЛЛИРЫ» НАЦПРОЕКТ ХООСТЫРА ПАСТАЛҒАН. ОЛ АҒБАНДА ЦУКАНОВАНЫҢ ОРАМАЗЫНДА ОРНЫХЧА.
АНДА ХАКАСИЯНЫҢ, ТУВАНЫҢ, ХЫЗЫЛЧАР КРАЙЫНЫҢ ӰСТӰНЗАРХЫ АЙМАХТАРЫНЫҢ ОНКОЛОГИЯНАҢ АҒЫРЧАТХАН ЧУРТАҒҶЫЛАРЫ ИМНЕГ ПОЛЫЗИИН АЛАРЛАР. АНЫҢ КӰЗІ - ЧЫЛДА 100 МУҢ КІЗЕЕ ТЕЕРЕ ИМНИРІ ( АЛАЙ ПІР КӰНГЕ 400 ЧУРТАҒҶЫ). РАДИОЛОГИЯ КОРПУЗЫНЫҢ УЛИИ 4300 КВАДРАТ МЕТР ПОЛАР, ПОДВАЛДАҒЫ ПӦЛІКТЕРІНІҢ ТИКСІ УЛИИ - 900 АЗЫРА КВАДРАТ МЕТР.
Радиология корпузында консультация кіні, ӱгредіг-методика кіні, топометрия паза радиотерапия пӧліктері полар. Анда ағырығ кізілернің диагнозын орта турғызарында паза имнирінде рентгеннең, компьютер томографынаң, магнит-резонанс томографынаң, рентгенотерапия аппарадынаң тузаланарлар. Радиология корпузының ӧӧн пӧгіні - онкологиянаң ағырчатхан кізілерні пӧзік имнег технологиялары полызиинаң имнирі.
Радиология корпузы 2021 чылның декабрьында пӱдіріл парарға кирек. Амғы туста тиксі тилекейде, ол санда пістің хазнада, коронавирус ағырығ тарапчатханда, кӧп предприятие тоғынминыбысхан. Ӱлгӱлер чонны ибде одырар режимге тудынарға сурынчалар. Анзы ағырығ тарабас ӱчӱн иділче. Че мындағ улуғ пӱдіріглерде тоғыс тохтадылбинча.
Хакасия пазының орынчызы, пӱдіріг паза чурт-коммунальнай хоных министрі Сергей Новиков радиология корпузының пӱдірии хайди парчатханын паза андағы тоғынҷылар коронавирус чуғынҷах ағырығдаң арачыланҷаң чӧптерге тудынчатханын неделя сай сыныхтапча. 10 апрельде ол теестегі сыныхтағны иртірген.
- Радиология корпузының пӱдірии табырах парча. Пӱӱн объектте 47 кізі тоғынча. Олар прайзы коронавирус ағырығдаң арачыланӌаң кирексіністерге тудынчатханы кӧрінче. Коронавирус тарапчатханда, подрядчикке хоза хорадынарға килісче. Мин эпидемиядаң тоғыр мероприятиелер хайди иртірілчеткенін сыныхтирға килгем, - теен Сергей Новиков.
Радиология корпузы пӱдіриинің ӧӧн подрядчигі - «Синодекор» ООО. Ол полған на тоғынҷаа кӧп хати тузаланҷаң маскалар пирче. Тоғысты пастир алнында пӱдірігҷілернің иді ізии сыныхталча. Анзынаң пӱдіріг апарылчатхан чирзер кірер алнында хадағҷы Андрей Костенко айғасча.
Пӱдірігҷілер вагончигінде COVID-19 ағырығдаң арачыланҷаң искіріг іл салғаннар. Холлар чуғчаң сабыннар паза дезинфекция иртірчең спирттіг суғ пар. Пӱдірігҷілер удур-тӧдір ікі метр оортах поларға киректер.
Ӧӧн подрядчиктің кізізі Павел Норның чооғынаң, пӱдірігҷілер иртеннең кӱн хонғанҷа ікі сменанаң тоғынчалар. Пӱдіріг пір дее кӱнге тохтадылбинча. Тоғысчылар теестезіп тынанчалар. Амғы туста корпустың ікінҷі хадылын пӱдір сыхханнар. Пастағы хадылының стенелері тимде. Объектте краннар, автобетон насостары, полуприцептер тоғынчалар. Понедельниктең сығара экскаватор хозылар. Ол канализацияның тастын тимнир. Суғ паза чылығ пирҷең трубалар салыл парғаннар.
- Пӱдіріг материалларын сатчатхан поставщиктернің кӧбізі тоғынминыбысхан. Че іди дее полза, піс чӧптесчебіс, тілепчебіс. Пу пӱдіріг объекті федеральная нооза, аннаңар кізілер піске удур парчалар, ахча даа тузында пирілче. Июньға теере піс стенелерні, хырны тимге сығар саларға кирекпіс. Амғы туста план хоостыра тоғыстар апарчабыс, маңнанчабыс, - теен Павел Нор.
Таныхтирға кирек, радиология корпузына киректелчеткен имнег оборудованиезін аларға чахығ иділ парған, поставщиктернең контракттарда хол салыл парған паза хорадығларның 30 проценті тӧлел парған. Сергей Новиковтың чооғынаң, имнег оборудованиезін доллар паазы ӧскенҷе сала ниикке садызып аларға киліскен. 2021 чылның декабрьына кирек оборудованиені ағыл килерлер. Ол тусха радиология корпузы пӱт парарға паза имнег оборудованиезі ӱчӱн 50 процент тӧлел парарға кирек. Анаң ол сыныхталар, турғызылар. Сыныхтап турғызыл парған соонда, оборудование ӱчӱн прай тӧлег пиріл парар.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде