УЗАРАДЫЛҒАН ПАЗА ХАТЫҒЛАЛҒАН
14.04.2020
Хабарлар
Ӱлгӱ. Хакасия ӱлгӱлері тиксі чонға ибдең сыхпас режимні узарадыбызарға чарадығ алған
Коронавирус тарапчатханын тохтадар кӧстегнең мындағ режим республикада хосхар айының 1-ғы кӱнінең кирілген, анаң пір неделяа узарадылған, хосхар айының 12-ҷі кӱніне теере. Амды режимнің тоғынар наа тузы - хосхар айының 19-ҷы кӱніне теере.
Олох туста наа чарадылбас нимелер кирілче. Олар республиканың оперативнай штаб чыылиинда ӱзӱрілгеннер паза чарадыға алылғаннар. Алызығлар Хакасияда COVID-19 ағырығ чухтырып алғаннарның саны ӧсчеткенінең палғалыстығ. Ағырығ республика істінде тарапчатханы ілезіне сығысхан. Андағ оңдайнаң, Хакасияда коронавирус тарапчатханы ӱзінҷі чардығына чит парған, тиксі тӧрт чардых.
Хакасия МВД-зының, ідӧк Роспотребнадзорның чӧбінде. палаларнаң хада тасхар чӧрерге чарабас. Сығысчатхан сылтағлар кӱрезіг оңдайларының хатығлирын кирексіпче. Іҷе-пабаларның прайзы ла палаларын чахсы кӧрбинче, анзынаң оларның чуртазына паза хазиина хорғыс ағылчалар. Ідӧк олғаннар итчеткен сайбағлар саны ӧс сығарына хорғыс пар.
Халых чонны азырапчатхан орыннардаң чиис сығарып, садығ апарары чарадылған полған, амды ол ідӧк чарадылбин сыххан. Олох туста тимде ас-тамахты ибзер читірері чарадылча.
Паза пір алызығ хазиина хорғыс пар ӧмезер кірчеткен кізілерге теелче. Чоох парча Хакасияның 65 час ас парған паза чӧреес ағырығларнаң (диабет, лейкоз, тындаң органнарынаң, хан ойлаҷаң, хоох системаларынаң палғалыстығ ағырығлар осхас) ағырчатхан чуртағҷылардаңар. Тоғыс пирчеткеннер мындағ тоғынҷыларны хайдағ-да тус тоғындырбасха алай кирек справкалар алып, больничнайға ыс турарға киректер. 65 час ас парған тоғынҷыларның ідӧк больничнайға парыбызар правозы пар. Ідӧк оларға отпуск алып аларға алай ибде одырып тоғынҷаң оңдайға кірерге чарир.
Анзынаң пасха, амды Хакасияда кӱснең ікі неделялығ карантинге ызыл турарлар хырығ озаринаң паза Москвадаң на килгеннер нимес, че ідӧк Санкт-Петербургтаң айлан килгеннер. Таныхтирға кирек, пастап республиканың ӧӧн санитарнай имҷізі андағ чарадығ кирген полған. Амды ол Хакасия правительствозының чарадиинда тыыдыл парған.
Иң кирек ниме-ноолар санына арачыланҷаң жилеттер, резиналығ ӧдік, кимелер, спецслужба тоғынҷыларының чылығ кип-азаа хозыл парған. Регион пазының чахиинда ӱстӱнде адалған прай алызығлар паза тӱзедіглер Хакасия правительствозының пӧзік тимненіс режимін кирердеңер чарадиинзар кирілгеннер паза хосхар айының 10-ҷы кӱнінең пасти кӱзіне кірібіскеннер.
Ідӧк алында чарадығнаң административнай сайбағдаңар протокол итчең праволығ хазна ӱлгӱзі органнары паза должностьтығ кізілер чарадыға алылғаннар. Олар Хакасияда кирілген режимні сайбаан кізілерні нандырыға тартарлар. Ол санда, туралар подъездтерінде дезинфекция итпинчеткені паза предприятиенің тоғызын тохтатпаан ӱчӱн хатығлирлар. Штраф 300 муң салковайға теере чидер. Ол сайбағлар сылтаанда кізі хазиина ӱрег иділген полза, хатығлас сині 1 миллион салковайға теере ӧс парар.
Автор :
Хакасия пазының паза правительствозының пресс-службазы
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде