ХАЙДИ МЫННАҢ МЫНДАР ЧУРТИРБЫС?
14.04.2020
Хабарлар
Кӧні эфир. Коронавирус чуғынҷах ағырығ прай чуртағҷыларның иптел парған чуртазын алыстырыбысты. Амды піс наа оңдайнаң чуртирға, ӱгренерге кӧнiкчебiс. Ирткен неделяда коронавирус тема хоостыра Хакасия пазы Валентин Коновалов республика чуртағҷыларынаң кӧні эфирге сыххан
Иң пастап Хакасия пазы таныхтаан: республикада ибдең сыхпас режим аннаң андар узарадылча, 19 апрельге теере. Ол коронавирусты тохтадып алар иң чахсы оңдай, чуртағҷылар удур-тӧдір тоғаспасха киректер.
- Пазох искірчем, коронавирус чуғынҷах ағырығны нимее салбин полбаалар, ибдең сыхпас режимге тудыналар. Постарыңны паза чағыннарыңны хайраллаңар. Я, піс прайзыбыс майых парғабыс, кӧнік парған чуртасха айланарға сағынчабыс, че ибдең сыхпас режимні сайбабаалар, - айланған Валентин Коновалов.
«Кӧні эфир» пір час артиинаң ирткен. Пу тусха республика пазы 20-ҷе сурыға нандырығ пирген. Сизінгенде, кічіг паза ортын бизнесы ибдең сыхпас режим узарадылғаны иң сағыссыратча. Анзы пілдістіг, сілігленҷең, сас хырыхтырҷаң салоннар, спортнаң айғасчаң заллар паза даа пасха кӧп чон чӧрҷең орыннар чабылчалар. Идінҷектернің аренда, чурт-коммунальнай полызығлар ӱчӱн паза чал ахчазын тӧлеҷең оңдайы чоғыл. Аннаңар сағыссырастар илееде.
- Парыстанар оңдай чох халған идінҷектерге Ағбандағы «Минің бизнезім» кінзер айланарға кирек. Анда оларға хабасчаң оңдайлардаңар чарыт пирерлер. Санға алылбин тоғынған чуртағҷыларға, тізең, хайзылары ідӧк парыстанҷаң оңдай чох халғаннар, Хакасияның чонға тоғыс тапчаң кінзер айланарға. Россия президентінің чарадиинаң тоғыс чох кізілерге ахча сині хозылған, - теен Валентин Олегович.
Сизінгенде, Хакасияда коронавируснаң ағырыбысханнарның прайзы даа пасха хазналардаң алай регионнардаң килген. Аннаңар «Кӧні эфир» тузында чуртағҷылар Ағбандағы аэропортты чабызар сурығнаң айланғаннар. Хайди нандырған регион пазы, пу сурығ федеральнай синде пӧгілче, республиканың аэропортты чабар алай ба азар правозы чоғыл. Че Хакасияның правительствозы чуртағҷыларның хазиин арачылап халарында тоғысты сыбыра апарча. Іди Москвазар рейстер хызырылча паза аннаң килгеннер ікі неделяа карантинге ызылчалар.
Халғанҷы туста социальнай сетьтерде чуртағҷылар республика ӱлгӱлері чуғынҷах ағырығнаң ағырыбысханына чігленістіг кізілер санын чазырча тіп найнапчалар. Чонның сурынызын санға алып, республика правительствозы коронавируснаң ағырыбысханнардаңар ла нимес, ідӧк ағырыбысханына чігленістіг кізілер санын искірче.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде