ХАЙДИ ПОСТЫ ОРТА ТУДЫНАРҒА?
15.04.2020
Хабарлар
Психолог чӧптері. Тиксі тилекейде коронавирус хайынчатханда, іҷе-пабаларға, ӱгренҷілерге, ӱгретчілерге хатығ чухча. Уламох ибдең сығара ӱгредіг чуртасха киріл парғанда. Пӱӱн чоох парар ол тусты хайди психология саринаң сайбағлар чох амыр иртіріп аларынаңар
Хайди таныхтапчалар специалисттер, олғаннарға паза саарбахтарға коронавирус чухса даа, олар ол ағырығны ниик иртірібісчелер. Че андағ даа полза, прай чонға кӧріл парған кирексіністер олған-саарбахтарға теелбин полбинчалар: тасхар пар килген соонаң холларны хайди даа сабыннаң чуурға, хайди даа 7,5 час узуп турарға, тосханда азыранарға паза зарядка ит турарға.
Иң ӧӧні - кирексініс чох ибдең сыхпасха! Паза пір чӧп. Коронавирустаңар хабар-искіріглерні кӧп испеске. Олар мииске тың сиипчелер. Аннаңар кӱнде ікі хати - иртен паза иирде - онар минута истіп алза, читкіҷе полар тіп санапчам. Олғаннар ідӧк хормачыланарға ундутпазыннар. Хай пірее оолах-хызыҷахтар, тилекейде тарапчатхан чуғынҷахтаңар хынығ сарыннар толдырып, видео суурыбысчалар. Пасхазына даа андағ чайаачы тоғыс тузалығ полар.
Че саарбахтарға, сағыссырастарынаң іӌе-пабазынаң ӱлес полбинчатсалар, киртініс телефонында сығдырадарға чарир. Аның пірге номері мындағ: 8-800-2000-122. Ол чуртастың сидік оңдайларына кір парған палаларға ӧнетін тӧстелген. Андар тикке сығдыратчалар. Ады-фамилиязын, хынминчатсалар, чоохтирға кирек чоғыл. Киртініс телефонының сайты: www.telefon-doveria.ru. Паза социальнай сетьтерде аның группаларын таап аларға чарир. Іҷе-пабаларға «Я - родитель» порталнаң тузаланарға чӧп пирілче.
Ідӧк іҷе-пабалар палаларын пір дее нимедең хорыхпасха ӱгрет саларға киректер. Сидік тустарда олғаннар чағыннарынзар уламох тың тартылчалар. Олғаннар іҷе-пабалары хайди тудынчатханын ситкіп кӧрчелер, анаң ідӧк поларға кӱстенчелер. Паза улуғлар, вирустың нациязы чоғыл тіп, пасха нациялығ оолах-хызыҷахтарға хыртыстанмастаңар ӱгреде чоохтазыннар.
Ӱгретчілерге, тізең, пу туста уламох нандырығлығ тоғыс артылча. Олар ибдең сығара ӱгренчеткен палаларны, тоғыстарны постары алынҷа толдырчатхан ӱчӱн, махтап ла турзыннар паза тӧбін паалағлар турғызарға кӱстенмезіннер. Ӧӧні - посты чобаға пастыртпасха. Андада олғаннарнаң даа чахсы пілізіп ал турарға чарир. Посты посха ла хайраллирға киректелче.
Чоохтирға кирек, прай пу чахығлар тиксі тилекейдегі хазых хайралладаң пірігістің (ВОЗ) паза Москвадағы психология паза педагогика институдының чӧптеріне тӧстеніп пазылғаннар. Прайзы хазых полыңар!
Автор :
Инна БОРГОЯКОВА, Н.Ф.Катановтың адынаң национальнай гимназия-интернаттың ӱгретчі-психологы
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде