АРТИСТТЕР КӦРІГҶӀЛЕРНЕҢ ХАДА
17.04.2020
Хабарлар
Культура. Хакасияның чайаачылары, Интернет пастыра ойыннар кӧзідіп паза акциялар иртіріп, чонның кӧңнін кӧдірчелер
Россияның культура министерствозы чарадиинаң хазнадағы культура учреждениелері 17 мартта тоғыстарын тохтатханнар. Андада прайзы карантин ӱр нимеске кирілген тіп ізенген. Пӱӱлгі часхаа учреждениелернің пӧгіннері кӧп полған нооза.
Кӧзідімге, Хакас драма театрының ӧмезі, саблығ артист Виктор Коковтың 70 чазын таныхтап, 25-26 мартта «Брак поитальянски» кӱлкістіг ойынны кӧзідерге пӧгінген. «Читігеннің» артисттері Георгий Сагалаковтың пайрамнығ тӧреен кӱніне чарыдылған иир иртірерге сағынғаннар. Ибдең сыхпас режим кирілер алнында, театрда репетициялар хыызында парчатханнар. Ағаа хоза, апрельнің ортызында «Читіген» пастағызын на Калмыкиязар чорыхха сығарға кирек полған. Кізілер «Нымахтың» паза Орыс драма театрының наа ойыннарын кӧр полбин халғаннарына ачырғанчалар. Анзы пілдістіг. Кӧклӧ театрының «Кічіг принц» наа спектакльы хайхатча, аны кічіглерге ле нимес, ідӧк улуғларға кӧріп аларға тузалығ поларҷых. Орыс драма театрының «Ганди субботаларда чоохтаспаҷаң» ойыны, тізең, саарбахтарның сағыс-кӧрізін чахсы оңарып аларға полысча.
Че культура сферазында тыс пілбес кізілер істенчелер. Артисттер Илбек Ада чаа тузында даа чонның кӧңнін кӧдірерге оңдай тапчаңнар. Тиктең нимес Хакас драма театрының иң саблығ «Алаахтыртхан Хорхло» ойыны 1942 чылда турғызылған. Ол чыл Ленинград фашисттернің хурчаанда полған, чабал азымахчылардаң тоғыр СССР чалғызан чааласхан (союзниктер Ікінҷі фронтты 1944 чылда ла асханнар). Че пістің пик сындырлығ чоныбыс, совет чааҷылары ыырҷыны унада сабызарына ізеніп, Хорды инейнің хылынчатханына, Хорхло пай алаахтыртчатханына майыхханда хатхырған. Искусствоның кӱзі илбек.
Ибдең сыхпас режим кирілгенде, артисттер хынчатхан кӧрігҷілерін Интернет пастыра ӱтертчелер. 10 апрельде республиканың культура министерствозы ютубта позының каналын азыбысхан. Ол «Хакасияның культуразы онлайн» адалча. Анда видеоға суурылған театрларның ойыннары, филармонияның концерттері сығарылчалар. Пӱӱнгі кӱнде каналда «Тимірхол-табырға», «Арғаас харындастар Мергеннең Муклайдаңар кип-чоох» нымахтарны (Хакас драма театры), «Садығҷы Калашниковтаңар ыр» спектакльны (Орыс драма театры), «Кавказский меловой круг» ойынны («Нымах») кӧріп аларға чарир. Ідӧк культура учреждениелері аймах видеоны сайттарынзар, социальнай сетьтерзер сығарчалар.
Акцияларны алында таныхтирға кирек. Кӧклӧ театрының артисттері, ибде одырып, аймах кибелістер хығырчалар. Оларны, палаларға ла нимес, улуғларға даа истерге хынығ. «Нымахтың» ӧӧн хоосчызы Мария Муштаева Хызыл нымырха ӱлӱкӱнге чарыдылған открытканы чайирға ӱгретче. «Читігеннің» флешмобы хакас тілінең иртче. Сизінгенде, «Читіген» сетьте» акцияда ӧӧнінде абахайлар араласчалар. Артист Евгения Костякова, поэт Валентина Татарованың «Алтын Теек» кибелізін истілдіре хығырып, кӧрігҷілерге ӧрініс сыйлаан. Музыкант Ирина Чугунекова пос туста аймах чазанҷыхтар чайапчаттыр. Сибер холлығ ипчі, мастер-класс иртіріп, ызырғалар идерге ӱгреткен. «Читігендегілер» ырлирға хынадырлар. Театрның страницазында Степанида Саможикованың, Айсили Майнагашеваның сарнапчатханнарын истіп аларға чарир. Театрның акциязына саблығ ырды Зинаида Аршанова хозылған. Ол хызы Алина Майнашеванаң хада «Кӱмӱс тӱстер» сарынны чӱрекке теерте толдырған. Артисттернің чайаачызынаң театрларның социальнай сетьтердегі страницаларында танызып аларға чарир.
Коронавирус тариры хаҷан полза тохтир, аннаңар кізее пос салынарға пір дее чарабас. Ибдең сыхпас режимге хомзынарға кирек чоғыл, ол пісті чуғынҷах ағырығдаң арачылапча. Хайди пасхан хакас поэт Василий Барашков:
Пирік тее тағлар орта пол парза,
Пиліне сыхпин, ноға тохтаӌаң.
Хара пазың на хыйын парбаза,
Хайдағ хыйалға кізі хомзынӌаң.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде