УЧЁНАЙ ПОЛАРЫ КІЧІГДЕҢ
22.04.2020
Хабарлар
Пӧзік чидіг. Н.Ф.Катановтың адынаң национальнай гимназия-интернаттың 7-ҷі класстағы ӱгренҷізі Михаил Кичеев Россия синіндегі Вернадскийнің адынаң чиит істезігҷілер мариинда иң артыхтарның санында пол парған. Ол «В.И.Вернадскийнің пастағлары чолынҷа» номинацияда чиңісчі полыбысхан
Тиксі Россия синіндегі марығның тӧстегҷілерi М.В.Ломоносовтың адынаң хазна университеді, Москвадағы ӱгретчілер университеді, В.И.Вернадскийнің адынаң 1553 № лицей паза чайаачы ӱгретчілернің «Істезігҷі» халыхтар чӧрімі полчалар.
Аның региондағы чардығы чыл сай февраль айда иртірілче, хазна синіндегізі - апрель айда. Пӱӱл іди халғанҷы чардыхта иң артых 770 тоғыс талластырыл парған. Тиксі марығда, тізең, 550 азыра ӱгредіг учреждениезі араласхан. Хакасияның адын анда 13 ӱгренҷі арачылаан. Салтарында, Н.Ф.Катановтың адынаң национальнай гимназия-интернаттың 7-ӌі класстағы ӱгренҷізі Михаил Кичеев иң артыхтар санында пол парған. Ол чиит істезігҷілернің 27-ӌі наука марииның «В.И.Вернадскийнің пастағлары чолынҷа» номинациязында чиңісчі полыбысхан!
Михаил Кичеев Н.Ф.Катановтың адынаң национальнай гимназияда ӱзінҷі чылы ӱгрен парир. Ағбанзар ол Шира аймаандағы Наа чир аалдаң килген. Чоохтирға кирек, оолахтың піліске тартылызын орыс тілі ӱгретчізі Екатерина Владимировна Субракова сах андох сизін салған. Анаң чайаачы кӧңніліг ӱгренҷіні наука чолынзар кӧстирге чаратхан.
- Миша - уғаа хыйға оолах. 5-ҷі класстаң сығара саңай «пистерге» ӱгренче. Уроктарда иртчеткен темаларны сах андох піліп алча. Кӧп хығырча. Істезігліг тоғыстарнаң уламох хынып айғасча. Прай материалларны позы тілирге кӱстенче. Хазнабыста карантин чарлалғанда, ӱгренҷілерге піліс ибдең сығара пирілче нооза. Оларға кӧрілген марығлар сағам ідӧк Интернет пастыра иртірілчелер. Чиит істезігҷілер марииның халғанҷы чардығында олғаннар тоғыстарынаң андағох оңдайнаң таныстырғаннар,- чарытхан Н.Ф.Катановтың адынаң национальнай гимназияның орыс тілі ӱгретчізі Екатерина Субракова.
Паза Михаил Кичеев турғысхан пӧгінін хайди даа толдырча тиирге кирек. Пылтыр ол Вернадскийнің адынаң марығда араласханох, Москвазар чӧрген, сыйыхтығ орынға турысхан. Андада олар ӱгретчізі Екатерина Владимировнанаң хада хакастарның аттарынаңар «Ат - нинҷе кӧп танығ пу сӧсте» проект тимнееннер. Ол хакас национальнай гимназияда 6-7 класстарда ӱгренчеткен оолах-хызыҷахтарның аттары хоостыра істезіг иртірген. Оларның кӧбізінің хакас аттар нооза: Айсили, Аяс, Айана, Аймир, Ай Тана, Каскар... Мындағ аттар пасха нацияларда чоғыл! Миша, олғаннарнаң, іче-пабаларнаң чоохтазып, полған на ат ниме таныхтапчатханын ілезіне сығарған.
Пӱӱл, тізең, хакас гимназияның чайаачы ӱгренҷізі Вернадскийнің адынаң чиит істезігҷілер марииның чарғыҷылары хайиина «Ир кізінің омазы орыс паза хакас тілінде» істезігліг тоғызын сығарған.
- Мин «ирен» сӧстің тузазын чарытчам. Кӧзідімге, орыс тілінде «ирен» сӧс кӱстіг кізіні таныхтапча, хакас тілін-де, тізең, сӧбіре пазын, - таныхтаан оолах.
Тиксі Россия синіндегі марығның кибірі хоостыра Н.Ф.Катановтың адынаң национальнай гимназия-интернаттың ӱгренҷізі Михаил Кичеевтің чиңіс тутхан пу істезии пасха иң артых тоғыстарнаң хада наука чыындызында сығарылар. Пістің кічіг частығ чир-суғҷыбыс пу чыл ідӧк «Істезігнің ағырсымнығ сари» ӧнетін номинация сыйиинаң таныхтатхан.
Сағынчабыс, Михаил, піди ле парза, мыннаң мындар хайди даа саблығ ученай пол парар. Ӧӧні - чӱрекке килістіре кӧстегні таллап алары. Пӱӱнгі кӱнде ол прай даа предметтерче пӧзік пілістер кӧзітче нооза.
Автор :
Тимнеен Александра КАРАМЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде