СИДІК ТУСТА ХАДА-ПІРГЕ ТУДЫНАРҒА
28.04.2020
Хабарлар
Полызығ. Коронавирус чонға ӱрег ағылды. Улам сидік пасха хазналардаң ахча тоғынарға килген мигранттарға. Амды олар тоғыс таа чох халдылар, ибзер дее айлан полбинчалар. Мындағ хыйалға кір парғаннарында, республикадағы хай пірее диаспоралар Хакасия пазынзар полызығ сурап айланғаннар
ӰР ДЕЕ ПОЛБААНДА, ХАКАСИЯ ПАЗЫНЫҢ ЧАХИИ ХООСТЫРА РЕСПУБЛИКАНЫҢ НАЦИОНАЛЬНАЙ ПАЗА ТЕРРИТОРИАЛЬНАЙ ПОЛИТИКА МИНИСТЕРСТВОЗЫ ПУ СУРЫҒНЫ ПӦКЧЕҢ ОҢДАЙ ТАПХАН.
«Россиядағы нацияларның пірге полчатханын тыыдары паза нациялар аразындағы хайызығны ипти идері» федеральнай программа хоостыра регионнарға национальнай ӱлӱкӱннерні иртірерге ахча позыдылча. Че эпидемия тузында пайрамнардаңар сағынарға киліспинче.
Аннаңар Россияның национальностьтар киректерінҷе федеральнай агентствоның чарадиинҷа, пайрамнар иртірерге пирілген ахчаа Хакасиязар тоғынарға килген хырығ озариндағы чуртағҷыларға полызығ пирерге айланғабыс. Хабазыға тиксі 100 муң салковай хорадылған, - чоохтапча министр орынҷызы Лев Сафьянов.
Полызығнаң айланған хырғыстарның, азербайджаннарның паза таджик-узбектернің диаспоралары кемге полызығ пирерін постары таллааннар. Тоғыс чох халған палалығ чииттерге, кӧп палалығ паза чуға чуртапчатхан сӧбірелерге улуғ хайығ салылған.
- Пістің чир-суғҷыларыбыстың кӧбізі садығда, чиис тимнеҷең орыннарда тоғынча. Че мартта ибдең сыхпас режим кирілгенде, рыноктар паза кафелер чабыл парғаннар. Садығ чохта, парыс таа чоғыл. Пу тоғыстаң пасха, пістің ахча алҷаң паза оңдайыбыс чоғыл, - тіпче «Менин Кыргызстаным» халых организациязының кнес орынҷызы Марс Жумабаев.
Ағаа хоза, садығнаң айғасчатхан чуртағҷылар Москвада, Хызылчарда, Новосибирске часхы кип-азах, ӧдіктер ал салғаннар, че рынок чабыл парғанда, олар аны сат полбадылар, чайғы кип-азах алҷаң ахча, тізең, чоғыл. Аннаңар ибдең сыхпас режим тоозылза даа, хырығ озаринаң килген мигранттар мыннаң мындар хайди чуртирын пілбинчелер. Коронавирус ағырығ ирт парза даа, хатап азахха турып аларға ӱр тус паза ахча кирек полар. Аннаңар хай піреезі амох ибзер парарға сағынча, че хазналар аразында хырығлар чабыхтаңар паза
коронавирус ағырығны чухтырып албас ӱчӱн, пірдеезі тибіреп полбинча.
- Хайдағ даа сидік полза, піс чахсы тус чидеріне ізенчебіс. Ӧӧні - ол хазых поларға паза ибдең сыхпасха. Чуртас аннаң андар парча, - чооғын узаратча Марс Садыралиевич.
- Сағынчам, хачан полза пу аар тус ирт парар, анаң амыр чуртас пасталар. Ам, тізең, удур-тӧдір хабазып чуртирға кирек. Сидік туста піс хада поларға кирекпіс, - чоохтапча Лев Николаевич.
Тиксі алза, полызығны 60 сӧбіре алған. Ағаа олар, пілдістіг ноға, уғаа ӧрінчелер. Сӧбірелерге аймах чарбалар, сахар, чағбан хайах, ун паза палаҷахтарына конфет-печенье пирілген. Сыйыхтарны мусульманнар Рамадан алнында алғаннар. Пу ӱлӱкӱнде оларның столларында хайди даа татхыннығ чиис поларға кирек
Таныхтирға кирек, Хакасиядағы диаспоралар ідӧк республиканың чуртағҷыларына полысчалар. 2015 чылда республикада хорғыстығ ӧрттер полғанда, диаспоралар ӱреге кіргеннерге чииснең паза кип-азахнаң хабасханнар. Хайди чоохтапча Марс Жумабаев, амды олар Хакасиядағы имҷілерге полызарға сағыс тутчалар.
- Диаспоралар, чыылызып, Хакасияның имҷілеріне полызарға сағынчалар. Коронавируснаң ағырчатханнарның саны хозылчатханда, имчілернің дее тоғыс кӧп. Аннаңар піс, чӧптезіп, Харатастағы чуғынҷах ағырығлар имнег туразының имҷілеріне чиис ӧнетін тимнеп турарға сағынчабыс. Кӧзідімге, плов, аймах салаттар, лепешкалар, - сағызынаң ӱлесче Марс Садыралиевич.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде