75 чыл – Илбек Чиңiске!!!
29.04.2020
Хабарлар
Аарлығ чир-суғҷылар!!!
Пӱӱл тиксi Россияа паза Совет Союзына кiрген хазналарға уғаа танығлығ чыл. 1941-1945 чыллардағы Илбек Ада чаа тоозылғаннаң 75 чыл толча.
75 чыл – Илбек Чиңiске!!! Хакас чон фашист азымахчыларны чиңерiне улуғ хозым иткен.
"Хакас автоном облазынаң прай чаа чыллары тузында 62 муңҷа кiзi араласхан алай ба пiстiң областьтың полған на пизiнҷi чуртағҷызы чааға парыбысхан. Оларның аразында 8 муңҷа хакастар полғаннар, хайзылары чаада пастағызын на араласханнар, пiр муң чарым артиинаң ипчiлер паза хыстар парғаннар,» - пасча «Хумартхы книгазындағы» кiрiс сӧзiнде профессор Степан Павлович Ултургашев.
ӦЛӀМӀ ЧОХ ПОЛК – чаа араласчыларын, партизаннарны, тоғырланыстарда араласханнарны, тыл iстенҷiлерiн сағысха кирерге полысчатхан чӧрiм. 2012 чылда Томск городтаң пасталған акция пӱӱнгi кӱнде Чоннар аразындағы чӧрiмге ӧс парған. Чылдаң чылға акцияда араласчатханнар саны, ағаа хозылчатхан хазналар саны ӧсче.
Кӧбiзiне кир ағазының сомын тудынып, ӧӧн орамаҷа пастырғаны – улуғ поғдархас паза чеес.
2020 чыл ол оңдайны пiске пирбеске итче. Кӧбiзi хазналарда, Россияда ла нимес, ибде одырҷаң режим тоғынча. Аннаңар чӧрiм онлайн оңдайнаң иртер.
ХАКАС ЧИРӀ газета чир-суғҷыларыбысха андағ оңдайны позының сайтында ӧнетiн тӧстелген пӧлiкте паза социальнай сетьтердегi ӧмелерде пирче. Пiс сағыпчабыс аға-ууҷаларыңның чаа тузындағы чолынаңар искiрiглернi.
Пазыңар!!!
Пiс, тiзең, матырларыбыстаңар искiрiглернi сайтта паза пу ӧмеде сығарарбыс!!! (вконтакте - https://vk.com/public194721279)
Ниме кирек идерге?
Ыс пирiңер пiске пу искiрiгнi:
1) чаа араласчызының ады-солазын;
2) кем сiрерге килiсче;
3) чаа араласчызының сомын (пар полза);
4) чуртаан чылларын;
5) чаа чолы: хаҷан чааға хығыртылған, хайда чааласхан, званиезi (пiлчетсер);
6) сыйыхтары: ниме ӱчӱн пирiлгенiн пiлчетсер, уламох чахсы полар.
Сағыпчабыс!!!
Автор :
Наталья СУБРАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы