АҒЫРСЫМНЫҒ СУРЫҒЛАРНЫ ПӦГЕРГЕ
18.08.2020
Хабарлар
Кӧні эфир. Хакасия пазы Валентин Коновалов кӧні эфирде чуртағҷылар сурығларына нандырған
Коронавирустаң имненіп алғаннарның санын паза хатығластар нымзадылчатханын санға алза, Сибирьдегі федеральнай округтағы регионнар аразында Хакасия иң чахсы салтарлар кӧзітче. Полған на неделяда Хакасияның правительствозы наа чарадығлар кирче. Мындағ оңдайнаң ол коронавирусты чиңіп аларға паза экономиканы тӧбін тӱзірбеске кӱстенче. Ағаа хоза, ӱр ниместең республикада школа алнындағы учреждениелер кӧместең тоғынып пастапчалар. Хайди таныхтаан кӧні эфир тузында Хакасия пазы Валентин Коновалов, COVID-19 ағырығ мыннаң мындар ідӧк амырапчатса паза тарапчатхан коэффициент 0,5 тӧбін полза, ибдең сыхпас режимнің ӱзінҷі чардығына кірерге тимненерге чарир. Че анзы соонаң, амды, тізең, піске санитарнай нормаларға тудынып чуртирға паза амғы ағырсымнығ сурығларны пӧгерге кирек.
Андағ сурығнаң кӧні эфирде айланған Боград аймаандағы Первомайскай аалның чуртағҷызы. Хайди ол теен, ӱр ниместе ӧрт сығызарынаң тоғыр кӱресчеткен службаның специалисттері аалдағы чалғыс олған садын чабысханнар, андар, тізең, тиксі 60 пала чӧрчеткен. Школа алнындағы ӱгредіг учреждениезі чабыл парғанда, тоғынчатхан паба-іҷелер иркеҷектерін хайда артызарын пілбинчелер.
- Мин, хаҷан-да Первомайская аалда полғанда, орындағы олған садын кӧргем. Сынап таа, андағы олған сады палаларның паза тоғынҷыларның чуртазына хорғыс ағылча. Аннаңар аны чабардаңар чарадығ алылған. Амды орындағы муниципальнай пӱдістің устағ-пастаа Хакасияның наука паза ӱгредіг министерствозынаң хада пу сурығны пӧгер оңдай тілепчелер. Аннаң пасха піс Первомайскай аалны «Демография» нацпроектке киріп аларға кӱсенчебіс. Пӧгінібісті толдырып алзабыс, аалда наа олған садын пӱдірербіс. Ідӧк Культура туразын пӱдірерге пӧгін тутчабыс. Аны Хакасияның культура министерствозы пӧкче, - нандырған Валентин Олегович.
Ӱгредіг темазын узарадып, Шира аймааның чуртағҷызы Валентин Коноваловтаң пасталығ класстардағы ӱгренҷілерні ізіг ас-тамахнаң азырирдаңар сурған. Хайди нандырған регион устағҷызы, пӱӱл 1 - 4 класстардағы ӱгренҷілерні школада тикке азырирлар, аннаңар іҷе-пабаларға ахча тӧлирге кирек чох полар.
Пандемия тузында имнег учреждениелері толдыразынаң тоғынмааннар. Ӱр ниместе Хакасия пазы Валентин Коновалов прай имнег учреждениелеріне тоғынарға чаратхан. Че пірее учреждениелер ам даа тың ағырчатханнарны ла имнепчеттірлер. Анзын искірген кӧні эфирде Саяногорсктың чуртағҷызы.
- Палаа тізін имнирге кирек, че городтағы стоматология тың ағырчатханнарны ла имнепче. Хайди поларға? - айланған ол регион устағҷызынзар.
Пу айланысты Валентин Олегович санға алып алған. Хайди ол теен, амды имнег учреждениелерінзер айланғаннарға прайзына полызығ пирілерге кирек.
Кӧні эфир тузында ідӧк Хакасия правительствозының кадрлар сурии ӱзӱрілген. Іди Хакасия пазы Валентин Коновалов республиканың пӱдіріг паза чурт-коммунальнай хоных министріне Валерий Келинні турғызарға пӧгін турғысчатханын искірген. Че Хакасияның хазых хайраллаҷаң министрі кем полары ам даа пілдізі чоғыл.
- Социальнай сетьтерде Владимир Костюш тоғыстаң пос кӧңнінең парбаан тіп пасчалар. Анзы сын нимес. Владимир Фёдорович тоғыстаң пос кӧңнінең саназыбысхан. Таныхтирға кирек, хайдағ даа тоғыста алызығлар полчалар, кем-де парча, кем-де килче. Ол чуртас, аннаңар кем-де тоғыстаң парыбысханында пір дее ӱрӱгістіг ниме чоғыл, - теен регион пазы.
Тӱрче полза чайғы тоозыл парар. Чылығ кӱннернің орнына соохтар килер. Соохтар чағдапчатханда, чылығ пирер сурығ улуғ хайығда. Хакасия пазы Валентин Коновалов чылығ тузында паза тудығ чох пирілерін позының хайиинда тутча. Тиктең нимес ол неделя сай муниципалитеттер пастарынаң Интернет пастыра чыылығ иртірче.
- Амды муниципалитеттерде тыхтағ тоғыстары хыызында парча. Улуғ нимес сидіксіністер Сорығ городта, Асхыс аймаанда, че чылығ пирер тус пасталғанҷа олар пӧгіл парарына ізеніс пар, - салтар иткен Валентин Олегович.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде