ОПЕРШТАБ: школаларда ибдең ӱгренер режим узарадылча
20.11.2020
Хабарлар
Пӱӱн Хакасия правительствозында Covid-19 чуғынӌах ағырығ тарапчатханынаң тоғыр кӱрезерiнӌе оперативнай штабтың теестегi чыылии ирткен. Анда Хакасия пазы Валентин Коновалов Харатас паза Саяногорск городтарда ковид кiннерiн азар оңдай тiлирге чахығ пирген. Хайди чоохтаан республиканың хазых хайраллаӌаң министрi Виктор Шевченко, пу сурығ амды ӱзӱрiлче:
- Ковид кiнi азылза, анда тоғынар кӱс кирек, Хакасияда, тiзең, кöп имӌiлер постары коронавируснаң ағырчалар. Олар имненiп алзалар ла, тоғысха сығарға чарадылча. Мыннаң мындар пiс пу сурығны пöгiбiзер оңдай тiлирбiс, арса, килчеткен неделяда имӌiлер, имненiп алып, тоғысха айланарлар.
Таныхтирға кирек, Ағбанда ковид кiнi тöстелгенде, илееде чуртағӌы андар полызығнаң айланған, табырах полызығ пирӌең службаның хығыртығлары даа асхынах пол парған. Ирткен неделяда Ағбанда пiр суткада 320 хығыртығ полған полза, амды 215-че.
Iкiнӌi сурығ - ол имнер. Хайди пiс пiлчебiс Хакасиязар Москвадаң 15 муң упаковка им читкен. 19 ноябрьда волонтерлар 425 кiзее им читiр пиргеннер. Пу тоғыс аннаң андар узарадылча.
Оперштабтың теестегi чыылиинда Ағбанның, Харатастың, Саяногорсктың паза Ағбан пилтiрi аймааның 5-11 класстағы ӱгренӌiлерiне ибдең сығара ӱгренер режим 30 ноябрьға теере узарадарға чарадығ алылған.
Автор :
Оксана Сунчугашева
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы