Харатаста паза Саяногорскта ковид кiннерiн азарға тимнепчелер
22.11.2020
Хабарлар
********************************************************************************
Пу туста Хакасия правительство туразында коронавирус чуғынӌах ағырығ тарапчатханынаң тоғыр кӱрезерiнӌе оперативнай штаб чыылии иртче.
Чыылығның ööн сурығларының пiрсi - ол Саяногорскта паза Харатаста ковид амбулатория кiннерiн азары. Хайди искiрген Хакасияның хазых хайраллаӌаң министрi Виктор Шевченко, 23-24 ноябрьда городтарда кiннер тоғынып пастир. Амды анда тимнеглiг тоғыстар парча. Хакасия пазы Валентин Коновалов амбулатория кiннерiн сöö тартпин азарға чахығ пирген.
Коронавируснаң паза даа пасха ағырығнаң ағырыбысхан чуртағӌылар табырах пирчеткен службазар сығдырат полбинчатханы сурығ ӱзӱрiлгенöк, ööнiнде пу ағырсымнығ сурығ Харатас городха теелче. Чыылығ араласчылары операторларның, табырах пирӌең машиналарның санын хозарға кирек тiп чöпке килгеннер.
Хакасияда чатчаң орғаннар читкiӌе дее полза, кислород концентраттары асхынах. Амды пис ле кислородтығ орған пос. Хакасия ӱр ниместе республиказар кислород концентраттарын алар чöптезiг иткен. Пу кӱннерде пастағы партия килген, ол муниципалитеттернiң аразында тарадылған, амды декабрьның пастағы кӱннерiнде iкiнӌi партиязы чидер.
22 ноябрьға Хакасияда 175 кiзi коронавируснаң ағырыбысханы iлезiне сыххан, 32 кiзi хазыхтанып алған, 30 кiзi имнег турадаң сығарылған. Пӱӱн Хакасиязар Москвадаң хоза имнер читкеннер. Пу чағында олар коронавируснаң ибде имненчеткеннернiң аразында тарадыларлар.
********************************************************************************
Автор :
Оксана Сунчугашева
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы